ນິ​ໄສ​ 6 ຢ່າງຂອງ​ຄົນ​ທີ່ປະ​ສົບ​ຄວາມ​ສຳ​ເລັດ​ມີ

 

ເຊື່ອ​ວ່າທຸກໆຄົນກໍ​ມີ​ຄວາມ​ຝັນ​ທີ່​ຢາກ​ຈະ​ປະ​ສົບ​ຄວາມ​ສຳ​ເລັດ​ໃນ​ຊີວິດ​ຄືກັນໝົດ​ທຸກ​ຄົນ ​ແຕ່​ເຮົາ​ຈະ​ຮູ້​ໄດ້​ແນວໃດວ່າ​ ປະຈຸບັນ​ນີ້​ເຮົາ​ຢູ່​​ສ່ວນ​ໃດ​ຂອງ​ເສັ້ນ​ທາງ​ຄວາມ​ຝັນ​ຂອງ​ເຮົາ​ແລ້ວ​? ເລື່ອງ​ແບບ​ນີ້ທ່ານ​ຄົນ​ດຽວ​ເທົ່າ​ນັ້ນ​ທີ່​ຮູ້​ ແຕ່​ການ​ທີ່​ຈະ​ປະ​ສົບ​ຄວາມ​ສຳ​ເລັດ​ໄດ້​ນັ້ນ​ ພື້ນ​ຖານ​ຫຼັກ​ໆ​ຂອງ​ຄົົນທີ່​ປະ​ສົບ​ຄວາມ​ສຳ​ເລັດ​ທັງ​ຫຼາຍ​ຈະ​ມີ​ຄືກັນ​ແມ່ນ​:

1. ຈົດ​ຈໍ່​ຢູ່​ກັບ​ເປົ້າ​ໝາຍ​ຕະຫລອດ​ເວລາ​

ເປົ້າ​ໝາຍ​ຄວາມ​ສຳ​ເລັດ​ຂອງ​ທ່ານແມ່ນຫຍັງ​ ທ່ານເທົ່າ​ນັ້ນ​ທີ່​ຮູ້​ ບາງ​ຄົນ​ອາດຈະ​ຢາກ​ກະສຽນ​ກ່ອນ​ອາ​ຍຸ 40 ບາງ​ຄົນ​ຢາກ​ຈະ​ມີ​ເງີນ​ໃຊ້​ເດືອນ​ລະ​ 5,000,000 ລ້ານຫຼັງ​ຢຸດ​ເຮັດວຽກ​ ບາງ​ຄົນ​ອາດຈະ​ພາ​ພໍ່​ແມ່​ໄປ​ທ່ຽວ​ອ້ອມ​ໂລກ​ ມື້​ນີ້​ເຈົ້າ​ຈົດ​ຈໍ່​ຢູ່​ກັບ​ເປົ້າ​ໝາຍ​ຂອງ​ທ່ານຫຼາຍ​ນ້ອຍ​ຊໍ່າ​ໃດ​ ແລະ​ ທ່ານຄິດ​ໄວ້​ຫຼືຍັງວ່າ​ເຮັດແນວໃດເຖິງ​ຈະ​ໄດ້​ມັນ​ມາ​ ຄົນ​ປະ​ສົບ​ຄວາມ​ສຳ​ເລັດ​ບໍ່​ໄດ້​ເປັນ​ຄົນ​ໂລບ​ທຸກ​ຄົນ​ ແຕ່​ຄົົນທີ່​ບໍ່​ມີ​ເປົ້າ​ໝາຍ​ ແມ່ນ​ຄົົນທີ່​ໃຊ້​ຊີວິດ​ໄດ້​ໜ້າ​ເສຍ​ດາຍ​ທີ່ສຸດ​

 

2. ຮຽນຮູ້ທີ່ຈະປະຕິເສດຄົນອື່ນແນ່

ເຄີຍ​ບໍ່​ ທີ່​ແຕ່ລະມື້​​ມີ​ໃຜ​ກໍ​ບໍ່​ຮູ້​ ຍັດ​ຍຽດ​ສະເໜີ​ຫຍັງ​ມາ​ໃຫ້​ເຮົາ​ທັງ​ໆ​ທີ່​ເຮົາ​ບໍ່​ຕ້ອງ​ການ​ ບໍ່​ວ່າ​ຈະ​ໝູ່ເພື່ອນ​ຮ່ວມ​ງານ ​ທີ່​ໂຍນວຽກ​ມາ​ໃຫ້,​ ພີ່​ນ້ອງພີ່ນຸ່ງ ​ທີ່​ຢູ່ບໍ່ຢູ່​ກໍ​ຊວນ​ອອກ​ໄປ​ທ່ຽວ​ທັງ​ໆ​ທີ່​​ເຮົາ​ກໍ​ຍັງມີ​ອີກ​ຫຼາຍຢ່າງທີ່ຕ້ອງເຮັດໃຫ້ແລ້ວ​ Skill ການ​ປະຕິເສດ​ນີ້​ຕ້ອງຮຽນຮູ້​ໄວ້​ແດ່ເດີ​ ເພື່ອ​ຄວາມ​ກ້າວ​ໜ້າ​ຂອງ​ຊີວິດ​ ການ​ທີ່​ເຮົາ​ຮັບ​ທຸກ​ຢ່າງ​ເຂົ້າ​ມາ​ໃນ​ຊີວິດ​ໂດຍ​ບາງຢ່າງ​ກໍ​ບໍ່​ໄດ້​ຢາກ​ຮັບ​ນັ້ນ​ ເສຍແຮງ​ເສຍ​ເວລາ​​ໄປ​ລ້າໆ

 

3. To Do List ມື້​ອື່ນນີ້​ຈະ​ເຮັດ​ຫຍັງ​ຕໍ່​?

ຖ້າຫາກ​ເປົ້າ​ໝາຍ​ຂອງທ່ານ​​ຄື​ພູຄູນ ໝາຍ​ຄວາມ​ວ່າ​ທາງ​ທີ່​ຈະ​ໄປ​ພູຄູນ ​ທ່ານຕ້ອງ​ຄິດ​ແລ້ວ​ວ່າ​ຈະ​ໄປ​ແນວໃດ ສິໄປພັກຢູ່ໃສ​​ ກຽມ​ເຄື່ອງຫຍັງໄປແດ່​ເຖິງຈະພຽງ​ພໍ​ ຊີວິດ​ກໍ​ຄືກັນ​ ການ​ຈະ​ປະ​ສົບ​ຄວາມ​ສຳ​ເລັດ​ກໍ​ຕ້ອງ​ມີ​ເປົ້າ​ໝາຍ​ ແຜນ​ການ​ ແລະ​ ແນວ​ທາງ​ ຖ້າ​ຄິດ​ແຕ່​ຈະ​ໄປ​ຢ່າງ​ດຽວ​ແຕ່​ບໍ່​ມີ​ແຜນ​ຫຼັກ, ​ແຜນ​ສຳຮອງ​ ສິເຮັດແນວ​ໃດ​ກໍ​ໄປ​ບໍ່​ເຖິງ​ແນ່ນອນ​

 

4. ຮຽນຮູ້ທີ່ຈະ​ຟັງ​ຄົນ​ອື່ນ​ແນ່ 

ຂໍ້​ນີ້​ຕ້ອງ​ຍອມ​ຮັບ​ວ່າຄົນ​ສ່ວນ​ໃຫຍ່​ມັກ​ທີ່​ຈະ​ຟັງ​ຄຳ​ຍ້ອງຍໍຫຼາຍກວ່າ​ຄຳ​ຕຳນິຕິຊົມ​ ເຊິ່ງ​ຄົົນທີ່​ປະ​ສົບ​ຄວາມ​ສຳ​ເລັດ​ສ່ວນ​ໃຫຍ່​ນັ້ນ​ບໍ່ມັກ​ໃສ່​ໃຈ​ຄຳ​ຍ້ອງຍໍ​ ແຕ່​ຢາກ​ຟັງ​ຄຳ​ຕຳນິຕິຊົມ ​ຄຳ​ວິ​ຈານ​​ຫຼາຍກວ່າ​ ເພາະ​ນັ້ນ​ແມ່ນ​ເຄື່ອງ​ມື​ທີ່​ດີ​ ທີ່​ຈະ​ເຮັດໃຫ້​ເປົ້າ​ໝາຍ​ຂອງ​ທ່ານ​ມີ​ຄວາມ​ສົມບູນ​ແບບ​ຫລາຍ​ຂຶ້ນ​

 

5. ຄວາມ​ຄິດ​ແວັບ​ທຳອິດ ເປັນຈິງ​ສະເໝີ​

ທັງ​ນີ້​ກໍ​ຂຶ້ນ​ຢູ່​ກັບ​ປະສົບການ​ນຳ ວ່າ​ແຕ່​ວ່າ​ ເຄີຍ​ບໍ່​ ເມື່ອທ່ານ​ຮັບ​ຮູ້​ຫຍັງ​ມາ​ບາງຢ່າງ​ ມັນ​ຈະ​ມີ​ຄວາມ​ຄິດ​ແວັບ​ຂື້ນມາ​ວ່າ​ສິ່ງ​ນັ້ນ​ແມ່ນ ຫຼື ​ບໍ່​ແມ່ນ​ ນັ້ນ​ຄື​ສັນ​ຊາດຕະ​ຍານ​ ແລະ​ ຫຼັງ​ຈາກ​ສິ້ນ​ສຽງ​ສັນ​ຊາດ​ຕະຍານ​ແລ້ວ​ ມັນ​ຈະ​ມີ​ເຫດຜົນ​ຮ້ອຍ​ແປດ​ພັນ​ປະ​ການ​ທະ​ລຸ​ເຂົ້າ​ມາ​ໃນ​ຫົວ​ທີ່​ສະໜັບ​ສະໜູນ ​ແລະ ​ຕໍ່​ຕ້ານ​ ຂໍ​ໃຫ້​ເຊື່ອໃນ​ສັນ​ຊາດ​ຕະຍານ​ ນັ້ນ​ແມ່ນ​ສິ່ງ​ທີ່​ຈະ​ນຳ​ພາ​ທ່ານ​ທະ​ລຸ​ຜ່ານ​ບັນຫາ​ໄປ​ໄດ້​

 

6. ສ່ຽງ​

ໃນ​ບ່ອນ​ນີ້​ ສ່ຽງ​ ແມ່ນ​ສ່ຽງ​ເທິງ​ພື້ນ​ຖານ​ຂອງ​ຄວາມ​ຮູ້​ ແລະ ​ສັນຊາດຕະ​ຍານ​ເດີ ບໍ່​ແມ່ນ​ສ່ຽງ​ແບບ​ບໍ່​ຮູ້​ຫຍັງ​ເລີຍ​ ການ​ທີ່​ຈະ​ເຮັດ​ຫຍັງ​ຈັກ​ຢ່າງ​ກໍ​ຕ້ອງ​ມີ​ການສຶກສາ​ຄົ້ນ​ຄວ້າ​ຂໍ້​ມູນ​ພ້ອມ ​ເພື່ອ​ການ​ຕັດ​ສິນ​ໃຈ​ ແຕ່​ຖ້າ​ທ່ານ​ບໍ່​ຮູ້​ຫຍັງ​ເລີຍ​ກັບ​ສິ່ງ​ທີ່​ທ່ານກຳ​ລັງ​ເຮັດ​ຢູ່​​ ​ໝາຍ​ເຖິງ​ໂອ​ກາດ​ທີ່​ຈະ​ລົ້ມ​ເຫຼວ​ເປັນ​ 100% ເລີຍ​

ຄົນ​ສຳ​ເລັດ​ມີ​ພື້ນ​ຖານ​ຂອງ​ສິ່ງເຫຼົ່ານີ້​ຄືກັນ​ ຖ້າຫາກ​ຢາກ​ເປັນ​ຄົນ​ສຳ​ເລັດ​ ລອງ​ຮຽນ​ເຮັດ​ມື້​ເລັກ​ມື້​ລະ​ໜ້ອຍ​ ບໍ່​ດົນ​ຈະ​ຕິດ​ເປັນ​ນິ​ໄສຂອງທ່ານເອງ​

 

ບົດຄວາມໃຫມ່ໆ