ນິວຢອກຕິດອັນດັບເມືອງຄ່າຄອງຊີບແພງທີ່ສຸດໃນໂລກ


ນະ­ຄອນນີວຢອກ ຂອງ ສ ອາເມຣິກາ ໄດ້ລ້ຳໜ້ານະ­ຄອນ­ຫຼວງ ລອນດອນ ຂອງອັງ­ກິດ ກາຍ­ເປັນປາຍ­ທາງຂອງການຄອງຊີບ ແລະ ເຮັດວຽກທີ່ແພງທີ່ສຸດໃນໂລກ ສຳ­ລັບພະ­ນັກ­ງານຫ້ອງການ ຊຶ່ງມັນເກີດຂຶ້ນຫຼັງຈາກທີ່ຊາວອັງ­ກິດ ຕັດ­ສິນໃຈໃຫ້ປະເທດຂອງຕົນ ອອກໄປຈາກສະ­ຫະພາບເອີຣົບ (EU) ໃນລະ­ຫວ່າງການລົງຄະ­ແນນສຽງເມື່ອບໍ່ດົນມານີ້.
ຜົນຂອງການສຳຫຼວດທີ່ໄດ້ນຳອອກມາເປີດ­ເຜີຍເມື່ອບໍ່ດົນມານີ້ຂອງກຸ່ມບໍ­ລິ­ສັດບໍ­ລິ­ການອະສັງຫາລິມະຊັບທົ່ວໂລກ Savills ໃຫ້ຮູ້ວ່າ ຍອດຄ່າໃຊ້ຈ່າຍສຳ­ລັບທີ່­ຢູ່ອາ­ໄສຂອງພະ­ນັກ­ງານຫ້ອງ­ການຄົນໜຶ່ງຢູ່ໃນນະ­ຄອນນີວຢອກ ໄດ້ຂຶ້ນເຖິງ 114.010 ໂດລາສະຫະລັດ/ປີ ໃນຈຸດເວ­ລາເດືອນກໍລະກົດ 2016 ເພີ່ມຂຶ້ນ 2% ເມື່ອທຽບ­ໃສ່ໃນເດືອນທັນ­ວາ 2015 ໃນຂະ­ນະດຽວກັນ ຕົວເລກໃນທຳ­ນອງດຽວກັນນັ້ນຢູ່ໃນນະຄອນຫຼວງລອນດອນ ພັດຫຼຸດລົງ 11% ມາຍັງເຫຼືອທີ່ 100.141 ໂດລາສະ­ຫະ­ລັດ/ປີ.
ໃນຕາ­ຕະ­ລາງຈັດອັນດັບດັ່ງກ່າວ ຮົງກົງ (ຈີນ) ຖືກຈັດຢູ່ໃນອັນດັບທີ 3 ໂດຍມີ­ຄ່າໃຊ້ຈ່າຍ 100.984 ໂດລາສະ­ຫະ­ລັດ/ປີ ແລະ ອັນດັບທີ 4 ກໍ່ແມ່ນນະຄອນຫຼວງໂຕກຽວ (ຍີ່­ປຸ່ນ) ດ້ວຍຄ່າໃຊ້ຈ່າຍ 85.334 ໂດລາສະຫະລັດ/ປີ ເພີ່ມຂຶ້ນ 22%.
ການຄົ້ນ­ຄວ້າຂອງ Savills ແມ່ນສຸມໃສ່ພຽງແຕ່ຄ່າໃຊ້ຈ່າຍໃຫ້ແກ່ທີ່­ຢູ່ອາ­ໄສຂອງບັນ­ດາພະນັກງານທີ່ເຮັດວຽກຢູ່ໃນຂົງ­ເຂດການບໍ­ລິ­ການການເງິນ ແລະ ບັນດາຂະ­ແໜງ­ການອຸດ­ສາ­ຫະ­ກຳປະ­ດິດຄິດແຕ່ງ ຊຶ່ງເປັນກຳ­ລັງແຮງຕົ້ນ­ຕໍໃຫ້ແກ່ຄວາມເຕີບໃຫຍ່ຂະ­ຫຍາຍ­ຕົວຂອງເສດ­ຖະ­ກິດຂອງນະ­ຄອນຕ່າງໆ.
ຄ່າໃຊ້ຈ່າຍດັ່ງ­ກ່າວແມ່ນສຳລັບພະ­ນັກ­ງານຄົນໜຶ່ງທີ່ດຳ­ລົງຊີ­ວິດຢູ່ໃນເຮືອນໃຫ້ເຊົ່າ ແລະ ເຮັດວຽກຢູ່ໃນຫ້ອງ­ການເປັນເວລາ 1 ປີ.

ແຫຼ່ງຂ່າວ: ປະເທດລາວ