ນິວຊີແລນໃຫ້ທຶນຄວບຄຸມພະຍາດປາກເປື່ອຍລົງເລັບຢູ່ 3 ແຂວງ

ນິວຊີແລນໃຫ້ທຶນຄວບຄຸມພະຍາດປາກເປື່ອຍລົງເລັບຢູ່ 3 ແຂວງ
………………………………………………………..
ຂປລ. ລັດຖະບານ ນິວຊີແລນໃຫ້ທຶນຊ່ວຍເຫລືອມູນຄ່າຫລາຍກວ່າ 3 ລ້ານໂດລາສະຫະລັດ ຫລື ປະມານ 25 ຕື້ກວ່າກີບ ເພື່ອນໍາໃຊ້ເຂົ້າໃນການຄວບຄຸມພະຍາດປາກເປື່ອຍລົງເລັບຢູ່ 3 ແຂວງ ຄື: ແຂວງສະຫວັນນະເຂດ, ຈໍາປາສັກ ແລະ ແຂວງຊຽງຂວາງ ເຊິ່ງຈະເລີ່ມຈັດຕັ້ງປະຕິບັດແຕ່ປີ 2016-2020. ໃນນີ້ ແມ່ນຈະເນັ້ນໃສ່ການສັກຢາກັນພະຍາດ, ການຄວບຄຸມການເຄື່ອນຍ້າຍສັດ, ການໂຄສະນາເຜີຍແຜ່ຂໍ້ມູນຂ່າວສານກ່ຽວກັບພະຍາດ ລວມທັງການປະຕິບັດບັນດາກົດລະບຽບການ ແລະ ກົດໝາຍຕ່າງໆທີ່ກ່ຽວຂ້ອງ, ການບໍລິການດ້ານສັດຕະວະແພດ ແລະ ອື່ນໆ. ໂຄງການດັ່ງກ່າວແມ່ນສືບເນື່ອງມາຈາກແຜນງານແຫ່ງຊາດ ໃນການຄວບຄຸມພະຍາດປາກເປື່ອຍລົງເລັບ 2015-2018 ຂອງ ສປປ ລາວ ແລະ ແຜນງານຄວບຄຸມພະບາດດັ່ງກ່າວ ຂອງອົງການພະຍຸສັດສາກົນ ເພື່ອແນ່ໃສ່ເຮັດໃຫ້ຂົງເຂດອາຊີ ຕາເວັນອອກສ່ຽງໃຕ້ ປອດຈາກພະຍາດປາກເປື່ອຍລົງເລັບພາຍໃນປີ 2020. 
ພິທີມອບ-ຮັບໄດ້ຈັດຂຶ້ນໃນວັນທີ 26 ກໍລະກົດ ນີ້ ທີ່ນະຄອນຫລວງວຽງຈັນ, ລະຫວ່າງທ່ານ ລຽນ ທິແກ້ວ ລັດຖະມົນຕີກະຊວງກະສີກໍາ ແລະ ປ່າໄມ້ ແລະ ທ່ານ ເມີເຣ ແມກຄູລິ( HE.Murray McCully ) ລັດຖະມົນຕີກະຊວງການຕ່າງປະເທດ ແລະ ການຄ້າ ນິວຊີແລນ, ມີບັນດາອົງການຈັດຕັ້ງສາກົນ, ຜູ້ຕາງໜ້າອົງການສຸຂະພາບສັດສາກົນ ປະຈໍາພາກພື້ນອາຊີຕາເວັນອອກສຽງໃຕ້, ພ້ອມດ້ວຍພາກສ່ວນກ່ຽວຂ້ອງທັງຝ່າຍເຂົ້າຮ່ວມເປັນສັກຂີພິຍານ.

==========================

ພາບແລະຂ່າວ: Pathedlao Lao