ນາໂປລີເຊັງ ມິລິກເອັນເຂົ່າຈີກມີໂອກາດນັ່ງຍາວ 6 ເດືອນ

 

ນາໂປລີ ໄດ້ຮັບຂ່າວຮ້າຍເມື່ອ ອາຄາດິອຸສ ມິລິກ ຫົວຫອກທີມຊາດໂປແລນເອັ່ນເຂົ່າຊ້າຍຈີກຕອນລົງຮັບໃຊ້ທີມໃນເກມຊະນະເດັນໝາກ 3-2 ຂອງຮອບຄັດເລືອກບານໂລກ 2018 ວັນເສົາທີ່ຜ່ານມາ ຄາດວ່ານັກເຕະອາດຈະຕ້ອງນັ່ງຕັ່ງຍາວດົນເຖິງ 6 ເດືອນ.

 

ອາຄາດິອຸສ ມິລິກ ກອງໜ້າຕົວເກັ່ງຂອງ ນາໂປລີ ສະໂມສອນຍັກໃຫຍ່ຂອງ ກັນໂຊ ຊີຣີ ອາ ອີຕາລີໄດ້ຮັບບາດເຈັບເອັນຫົວເຂົ່າຊ້າຍຈີກລະຫວ່າງການລົງຫຼິ້ນຮັບໃຊ້ທີມຊາດໂປແລນໃນເສິກບານໂລກ 2018 ຮອບຄັດເລືອກໂຊນເອີຣົບຂອງ ກຸ່ມອີ ທີ່ຊະນະ ເດັນໝາກ 3-2 ເມື່ອວັນເສົາທີ່ 8 ຕຸລາທີ່ຜ່ານມາ.

 

ນັກເຕະເຈັບຈາກຈັງຫວະທີ່ຖືກຄູ່ແຂ່ງສຽບ ແລະ ທີມໄດ້ຈຸດໂທດເຊິ່ງ ໂຣເບີດ ເລວານດອຟສະກີ້ ສັງຫານບໍ່ພາດເປັນປະຕູ 2-0 ແລະ ເຮັດແຮັດທຣິກໃນເກມນີ້ໂດຍ ມິລິກ ຮັບການສະແກນອາການດ້ຽງໄປແລ້ວຫຼັງຈາກກັບໄປທັບ “ອັດຊູຣ້າ” ເມື່ອວັນອາທິດທີ່ຜ່ານມາ.

 

ດ້ານ ນາໂປລີ ຖະແຫຼງການພຽງສັ້ນໆວ່າ “ຜົນການກວດຢືນຢັນວ່າເອັນໄຂວ່ໜ້າຂໍ່ເຂົ່າຂ້າງຊ້າຍຈີກຂາດ”.

 

ທັງນີ້ມີກະແສຂ່າວລືວ່າ ມິລິກ ອາດຈະຕ້ອງພັກຮັກສາອາການບາດເຈັບດົນເຖິງ 6 ເດືອນ.

 

ບົດຄວາມໃຫມ່ໆ