ນາຍົກລັດຖະມົນຕີ ຕ້ອນຮັບ ຄະນະຜູ້ແທນ ສສ ຫວຽດນາມ

ຂປລ. ​ໃນ​ວັນ​ທີ 21 ກໍລະກົດ 2015 ຢູ່​ຫ້ອງ​ວ່າການ​ລັດຖະບານ ທ່ານ ທອງ​ສິງ ທຳ​ມະ​ວົງ ນາຍົກລັດຖະມົນຕີ ​ແຫ່ງ ສປປ ລາວ ​ໄດ້​ໃຫ້ກຽດຕ້ອນ​ຮັບ ​ການ​ເຂົ້າ​ຢ້ຽມ ຄຳນັບ​ຂອງ​ທ່ານ ກາວ ດຶກ ຟາດ ລັດຖະມົນຕີ​ວ່າ ການ​ກະຊວງກະສິກຳ ​ແລະ ພັດທະນາ​ຊົນນະບົດ ​ແຫ່ງ ສສ ຫວຽດນາມ, ພ້ອມ​​ຄະນະ ​ໃນ​ໂອ​ກາດ​ທີ່​ເດີນທາງ​ ມາ​ຢ້ຽມຢາມ ​ແລະ ​ເຮັດ​ວຽກຢູ່ ສປປ ລາວ ​ແຕ່​ວັນ​ທີ 19-21 ກໍລະ​ກົດ 2015.

​ໃນ​ໂອກາດ​ນີ້ ທ່ານ ນາຍົກລັດຖະມົນຕີ ​ໄດ້​ສະ​ແດງ​ຄວາມ​ຍິນ​ດີ​ ຕ້ອນ​ຮັບ​ອັນ​ອົບ​ອຸ່ນ ​ແລະ ຕີ​ລາຄາ​ສູງ ຕໍ່​ການ​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກ ຢູ່ ສປປ ລາວ ຂອງ​ທ່ານ ກາວ ດຶກ ຟາດ ພ້ອມ​ຄະນະ ​ໃນ​ຄັ້ງ​ນີ້ ​ເຊິ່ງ​ເປັນ​ການ​ປະກອບ​ສ່ວນ​ອັນ​ສຳຄັນ​ ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ ມິດຕະພາບ​ແບບ​ພິ​ເສດ ​ແລະ ການ​ຮ່ວມ​ມື​ຮອບດ້ານ ລະ​ຫວ່າງ ສອງພັກ-ລັດຖະບານ ກໍ​ຄື​ປະຊາຊົນ​ສອງ​ຊາດ ​​ລາວ-ຫວຽດນາມອ້າຍ​ນອງ. ​ເວົ້າ​ສະ​ເພາະ ສອງ​ກະຊວງ​ກະສິກຳ ​ແລະ ປ່າ​ໄມ້ ​ແຫ່ງ ສປປ ລາວ ​ແລະ ກະຊວງ​ກະສິກໍາ ​ແລະ ພັດທະນາ​ຊົນນະບົດ ​ແຫ່ງ ສສ ຫວຽດນາມ ກ່ຽວກັບ​ການ​ຮ່ວມ​ມື ​ໃນ​ຂົງ​ເຂດ​ກະ​ສິກຳ, ປ່າ​ໄມ້, ການ​ປະມົງ ​ແລະ ພັດທະນາ​ຊົນນະບົດ ​ຂອງ​ສອງ​ປະ​ເທດ ​ໃຫ້​ນັບ​ມື້​ນັບ​ໄດ້​ຮັບ ​ການ​ເສີມ​ຂະ​ຫຍາ​ຍຂຶ້ນ​ຢ່າງ​ບໍ່​ຢຸດ​ຢັ້ງ.

ທ່ານ ກາວ ດຶກ ຟາດ ກໍ​ໄດ້​ສະ​ແດງ​ຄວາມ​​ຂອບໃຈຕໍ່ ທ່ານ​ ນາຍົກລັດຖະມົນຕີ ທີ່​ໄດ້​ຕ້ອນຮັບ​ການ​ເຂົ້າ​ຢ້ຽມ ຄຳນັບ​ໃນ​ຄັ້ງ​ນີ້, ພ້ອມ​ແຈ້ງ​ຈຸດປະສົງ ​ຂອງ​ການ​ເດີນທາງ​ຢ້ຽມຢາມ ​ແລະ ​ເຮັດ​ວຽກ ​ເພື່ອ​ແລກປ່ຽນຂໍ້​ມູນ, ການ​ຮ່ວມ​ມືໃນ​ຄັ້ງ​ນີ້​ ​ໃຫ້​ທ່ານ ນາຍົກ​ລັດຖະມົນຕີຮັບ​ຊາບ.

……………………………………………………………………………………………………………………………..................

ທີ່​ມາ: http://kpl.gov.la/detail.aspx?id=4919