ນາຍົກລັດຖະມົນຕີ ຕ້ອນຮັບທູດ ດານມາກຄົນໃໝ່

ໃນ​​ວັນ​ທີ 10 ກັນຍາ 2015 ນີ້,  ທ່ານ ທອງ​ສິງ ທຳ​ມະ​ວົງ ນາ​ຍົກ​ລັດຖະມົນຕີ ​ແຫ່ງ ສປປ ລາວ ​ໄດ້​ຕ້ອນຮັບ​ການ​ເຂົ້າ​ຢ້ຽມຄຳນັບ​ຂອງ​ ທ່ານນາງcharlotte Laursen ເອກອັກຄະລັດຖະທູດວິສາມັນ ຜູ້ມີອຳ ນາດເຕັມ ແຫ່ງ ​ດານ​ມາກ ປະຈຳ ສປປ ລາວ ເຊິ່ງມີສຳນັກງານຕັ້ງຢູ່ຮ່າ​ໂນ​່ຍ ສສ ຫວຽດນາມ. ​ໃນ​ໂອກ​າ​ດມາ ດຳລົງ​ຕຳ​ແໜ່ງ ​ເປັນ​ເອກອັກຄະລັດຖະທູດ ຄົນ​ໃໝ່ ປະຈຳ​ສປປ ລາວ​.

ທ່ານ​ ທອງ​ສິງ ທຳ​ມະ​ວົງ ນາຍົກລັດຖະມົນຕີ ​ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ ​ແລະ ຊົມ​ເຊີຍຕໍ່ ທ່ານນາງ charlotte Laursen ທີ່​ຖືກ​ແຕ່ງ​ຕັ້ງ​ໃຫ້​ມາດ​ຳລົງ​ຕຳ​ແໜ່ງ​ເປັນ ​ເອກອັກຄະລັດຖະທູດ ຄົນ​ໃໝ່ປະຈຳ​ສປປ ລາວ​ ​ໃນ​ຄັ້ງ​ນີ້ ພ້ອມ​ທັງ​ສະ​ແດງ​ຄວາມ​ຫວັງ​ວ່າ ການ​ມາດ​ຳລົງ​ຕຳ​ແໜ່ງຂອງ​ທ່ານ​ທູດ ​ຢູ່ ສປປ ລາວ ​ຄັ້ງ​ນີ້ ຈະ​ເປັນ​ການ​ປະກອບສ່ວນ​ສຳ​ຄັນ ​ເຂົ້າ​ໃນ​ການ​ເພີ​່ມທະ​ວີ​ສາຍ​ພົວພັນ ​ແລະ ການ​ຮ່ວມ​ມື ລະ​ຫວ່າງ ສປປ ລາວ ​ແລະ ​​ດານ​ມາກ ​ໃຫ້​ມີ​ບາດກ້າວ​ຂະຫຍາຍຕົວ​ຍິ່ງໆຂຶ້ນ, ພ້ອມ​ທັງ​ອວຍພອນ​ໃຫ້​ທ່ານ​ທູດ ຈົ່ງ​ປະສົບ​ຜົນສຳ​ເລັດ​ຕະຫລອດ​ໄລຍະ​ການ​ມາ​ປະຕິບັດ ໜ້າທີ່​ການ​ທູດ ​ຢູ່ ສປປ ລາວ ອີກ​ດ້ວຍ.

ໃນ​ໂອກາດ​ນີ້ ທ່ານນາງ charlotte Laursen ກໍ​ໄດ້​ສະ​ແດງ​ຄວາມ​ຂອບ​ໃຈ ​ເປັນ​ຢ່າງ​ຍິ່ງຕໍ່​ການ​ຕ້ອນ ຮັບ​ອັນ​ອົບ​ອຸ່ນ ຈາກ ທ່ານ​ ນາ​ຍົກ​ລັດຖະມົນຕີ ​ໃນ​ຄັ້ງ​ນີ້,ພ້ອມ​ທັງ​ສະ​ແດງ​ຄວາມ​ຢືນຢັນ​ວ່າ ຈະ​ສຸມ​ທຸກ​ຄວາມ​ພະ ຍາຍາມ ​ເຫື່ອ​ແຮງ ​ແລະ ສະຕິ​ປັນຍາ ​ເພື່ອ​ປະກອບສ່ວນ​ເຂົ້າ​ໃນ​ການ​ເສີມ​ຂະຫຍາຍສາ​ຍພົວພັນ ລະຫວ່າງ ສອງ​ປະ​ເທດ​ພວກ​ເຮົາ ​ໃຫ້ນັບ​ມື້​ກ້າວໜ້າຂະຫຍາຍຕົວ​ໄປ​ເລື້ອຍໆ​.

 

.....................................................................................................................................................................................................................

ທີ່ມາ: www.kpl.gov.la