ນາຍົກລັດຖະມົນຕີແນະນຳການຍົກຍ້າຍເທສະບານແຂວງຜົ້ງສາລີໃຫ້ວາງແຜນລະອຽດເພື່ອສ້າງເປັນເມືອງຕົວແບບ

ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີຂອງທ່ານນາຍົກລັດຖະມົນຕີ ທອງລຸນ ສີສຸລິດ ໃນວັນທີ 13 ສິງຫານີ້, ທ່ານນາຍົກ ໄດ້ແນະນຳໃຫ້ການນຳແຂວງດັ່ງກ່າວໃຫ້ມີການຈັດສັນ ແລະ ວາງແຜນລະອຽດກ່ອນຈະຍົກຍ້າຍເທສະບານແຂວງໄປຢູ່ແຫ່ງໃໝ່ທີ່ມີຄວາມສະດວກດີກວ່າ ເພື່ອສ້າງເປັນຕົວເມືອງທັນສະໄໝ, ມີຄວາມເປັນລະບຽບຮຽບຮ້ອຍ, ສະອາດງາມຕາ ເພື່ອກາຍເປັນຕົວເມືອງເທສະບານຕົວແບບຂອງບັນດາແຂວງພາກເໜືອ, ແຕ່ສິ່ງສຳຄັນແມ່ນບົນຈິດໃຈປະຢັດມັດທະຍັດໃນການນຳໃຊ້ງົບປະມານກໍ່ສ້າງພື້ນຖານໂຄງລ່າງຕ່າງໆ ແລະ ໃຫ້ສາມາດນຳໃຊ້ໄດ້ຍາວນານ ແລະ ໃນໂອກາດດຽວກັນ, ທ່ານນາຍົກ ຍັງໄດ້ແນະນຳໃຫ້ແຂວງເອົາໃຈໃສ່ການພັດທະນາເສດຖະກິດ-ສັງຄົມ ໂດຍຖືເອົາການລຶບລ້າງຄວາມທຸກຍາກຂອງປະຊາຊົນເປັນບູລິມະສິດ ເພື່ອຍົກລະດັບຊີວິດການເປັນຢູ່ຂອງ

ເຂົາເຈົ້າໃຫ້ດີຂຶ້ນກວ່າເກົ່າ. ເພື່ອຢາກໄດ້ແນວນີ້ ແຂວງຕ້ອງຮູ້ນຳໃຊ້ທ່າແຮງບົ່ມຊ້ອນທີ່ມີຢູ່ຂອງທ້ອງຖິ່ນ ແລະ ເອົາໃຈໃສ່ສົ່ງເສີມການຜະລິດກະສິກຳ ແລະ ຂະຫຍາຍອຸດສາຫະກຳປຸງແຕ່ງໃຫ້ຫລາຍຂຶ້ນ ແລະ ເອົາໃຈໃສ່ຮັດແໜ້ນການພົວພັນຮ່ວມມືກັບຕ່າງປະເທດ ເພື່ອດຶງດູດການລົງທຶນໃຫ້ຫລາຍຂຶ້ນ. ແຕ່ຂະນະດຽວກັນ ກໍຕ້ອງເພີ່ມທະວີວຽກງານກວດກາຄຸ້ມຄອງໂຄງການລົງທຶນຕ່າງໆໃຫ້ມີປະສິດທິຜົນ, ຖ້າເຫັນວ່າໂຄງການໃດບໍ່ປະຕິບັດຕາມສັນຍາ ຫລື ແກ່ຍາວເວລາຈັດຕັ້ງປະຕິບັດໃຫ້ລາຍງານລັດຖະບານທັນທີ ເພື່ອຊອກວິທີແກ້ໄຂໃຫ້ທັນການ.

    ໃນໂອກາດດັ່ງກ່າວ, ທ່ານ ຄຳເຈນ ວົງໂພສີ ເຈົ້າແຂວງຜົ້ງສາລີ ກໍໄດ້ລາຍງານໃຫ້ທ່ານນາຍົກຊາບໂດຍຫຍໍ້ກ່ຽວກັບສະພາບທົ່ວແຂວງໃນໄລຍະ 9 ເດືອນຜ່ານມາ ການພັດທະນາເສດຖະກິດ-ສັງຄົມໄດ້ຂະຫຍາຍຕົວຕໍ່ເນື່ອງ, ສະເລ່ຍລະດັບ 9,32%, ລາຍຮັບສະເລ່ຍປະມານ 840 ໂດລາສະຫະລັດຕໍ່ຄົນຕໍ່ປີ; ໄດ້ຮັບຮອງບ້ານພັດທະນາໄດ້ 77 ບ້ານ, ບ້ານວັດທະນະທຳ 123 ບ້ານ, ຄອບຄົວພັດທະນາ 13.602 ຄອບຄົວ ກວມ 37,24%, ບ້ານທຸກຍາກຍັງ 329 ບ້ານ ກວມ 63,03%. ຂະບວນການຜະລິດເປັນສິນຄ້າເພື່ອແກ້ໄຂຄວາມທຸກຍາກ ແລະ ຍົກລະດັບຊີວິດການເປັນຢູ່ຂອງປະຊາຊົນແມ່ນໄດ້ຈັດຕັ້ງປະຕິບັດຕາມ 6 ທາງອອກທີ່ແຂວງກຳນົດໄວ້; ການຂຸດຄົ້ນລາຍຮັບສາມາດປະຕິບັດໄດ້ 45,98  ຕື້ກີບ ເທົ່າກັບ 90,22% ຂອງແຜນການປີ, ດ້ານລາຍຈ່າຍສາມາດປະຕິບັດໄດ້ 262,65 ຕື້ກີບ ເທົ່າກັບ 77,73% ຂອງແຜນການປີ.

ໄດ້ເອົາໃຈໃສ່ປັບປຸງຍົກລະດັບຕາໜ່າງການສຶກສາ ໂດຍໄດ້ຕອບສະໜອງອຸປະກອນການຮຽນ-ການສອນຂະຫຍາຍໂຮງຮຽນໄປສູ່ເຂດຊົນນະບົດຫ່າງໄກສອກຫລີກຫລາຍຂຶ້ນ ອັນໄດ້ເຮັດໃຫ້ອັດຕາເຂົ້າຮຽນສຸດທິໃນຊັ້ນຮຽນຕ່າງໆນັບມື້ເພີ່ມຂຶ້ນ, ອັນພົ້ນເດັ່ນແມ່ນສາມາດປະກາດຈົບຊັ້ນປະຖົມແບບບັງຄັບທົ່ວແຂວງ.

ຂໍ້ມູນຈາກ: laophatthananews.blogspot.com