ນາຍົກຊີ້! ສື່ອອນລາຍຄືດາບສອງຄົມທີ່ມີອິດທິພົນຕໍ່ສັງຄົມຢ່າງມະຫາສານ

13/7/2016 ທີ່ຫໍວັດທະນະທໍາແຫ່ງຊາດ ນະຄອນຫລວງວຽງຈັນ, ເນື້ອໃນບາງຕອນໃນບົດໂອ້ ຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ຕໍ່ຄະນະຜູ້ແທນໃນຂົງເຂດວຽກງານຖະແຫລງຂ່າວ ວັດທະນະທໍາ ແລະ ທ່ອງທ່ຽວ ພ້ອມບັນດາສື່ມວນຊົນລາວ 400 ກວ່າຊີວິດເຂົ້າຮ່ວມ ເຊິ່ງ ທ່ານ ນາຍົກເນັ້ນຢໍ້າວ່າວຽກງານສື່ວິທະຍຸ, ໂທລະພາບ, ສິ່ງພິມ ແລະ ອື່ນໆເປັນສິ່ງສໍາຄັນທີ່ສຸດໃນຊີວິດປະຈໍາວັນຂອງພວກເຮົາບໍ່ສາມາດຕັດແຍກອອກຈາກັນນັ້ນ ແລະ ບໍ່ຕ່າງຫຍັງກັບອາຫານການກິນປະຈໍາວັນນັ້ນເອງ ທັງໝົດນັ້ນໄດ້ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດຢ່າງຕັ້ງໜ້າຈາກອະດີດຈົນເຖິງປັດຈຸບັນ ຍິ່ງສະພາບເງື່ອນໄຂທີ່ມີການປ່ຽນແປງໃນໂລກຢ່າງໄວວາກໍຍິ່ງເປັນສິ່ງທ້າທາຍຕໍ່ການພັດທະນາສື່ມວນຊົນຂອງພັກເຮົາ. ພິເສດ: ສື່ສັງຄົມອອນລາຍ ແລະ ອິນເຕີເນັດແມ່ນພາຫະນະອີກອັນໜຶ່ງໃນຍຸກປັດຈຸບັນທີ່ສໍາຄັນໃນການຕອບສະໜອງຂໍ້ມູນຂ່າວສານ, ສາລະໜ້າຮູ້, ວິທະຍາສາດ, ວັດທະນະທໍາ, ວິຖີຊີວິດ, ການເມືອງ, ເສດຖະກິດ ແລະ ອື່ນໆໄດ້ວ່ອງໄວທີ່ສຸດຈາກວິນາທີຕໍ່ວິນາທີ, ຈາກໂທລະສັບໜຶ່ງໄປຫາໂທລະສັບໜຶ່ງ, ຈາກຄອມພີວເຕີໜ່ວຍໜຶ່ງໄປຫາອີກໜ່ວຍໜຶ່ງ ສະນັ້ນ ສື່ສັງຄົມອອນລາຍມີທັງອັນມີປະໂຫຍດ ແລະ ບໍ່ມີປະໂຫຍດ ເຊິ່ງພວກເຮົາບໍ່ສາມາດປັດຕິເສດໄດ້ ຖ້າຫາກຮູ້ໝູນໃຊ້ ແລະ ຮູ້ຈັດການບໍລິຫານຄຸ້ມຄອງທີ່ດີກໍຈະເກີດເປັນຜົນໂຫຍດສູງສຸດເຊັ່ນກັນ. ກ່ອນໜ້ານັ້ນການເດີນທາງໄປເຮັດວຽກ ຫລື ໄປໂຮງຮຽນພົບວ່າພະນັກງານອຸ້ມເອກະສານ, ປື້ມກອງໃຫຍ່ໆໃສ່ຖົງ ສ່ວນນັກຮຽນຖືວັດຈະນານຸກົມຫົວໃຫຍ່ໆ ແລະ ເຂົ້າຊອກຂໍ້ມູນໃນຫໍສະໝຸດດ້ວຍຄວາມອົດທົນ ແລະ ຍຸ້ງຍາກ ແຕ່ປັດຈຸບັນນີ້ ພຽງແຕ່ມີສັນຍານອິນເຕີເນັດ ແລະ ສື່ອອນລາຍນັ້ນພວກເຮົາກໍສາມາດເຂົ້າຊອກຮູ້, ສຶກສາຮໍ່າຮຽນ ແລະ ອື່ນໆໄດ້ແບບງ່າຍດາຍ ເຊິ່ງບັນຫາດັ່ງກ່າວມີອິດທິພົນຫລາຍ ແລະ ກະທົບໄວທີ່ສຸດຕໍ່ສັງຄົມ. ແນວໃດກໍດີ ແນ່ນອນສື່ສັງຄົມອອນລາຍນັ້ນກໍມີສິ່ງບໍ່ດີ, ສິ່ງຂີ້ຕົວະ ແລະ ບັນຫາອື່ນໆທີ່ແອບແຝງໄວ້ເພື່ອຊັກຈຸງໃຫ້ເດັກນ້ອຍ, ໄວໜຸ່ມຍິງຊາຍ ແລະ ປະຊາຊົນຫລົງທາງໄປໃນສິ່ງທີ່ຜິດຕໍ່ຮີດຄອງປະເພນີ, ຄວາມບໍ່ສະຫງົບ, ຢຸຍົງສົ່ງເສີມເຮັດໃຫ້ຄົນມີຄວາມແຕກແຍກຄວາມສາມັກຄີ, ບິດເບືອນຄວາມຈິງ ແລະ ອື່ນໆ ດ້ວຍເຫດດັ່ງກ່າວພວກເຮົາກໍບໍ່ຄວນຖິ້ມໂທດໃຫ້ພຽງແຕ່ໜ່ວຍງານກ່ຽວຂ້ອງໃນການຄຸ້ມຄອງສື່ດັ່ງກ່າວ ແຕ່ພໍ່ແມ່ຜູ້ປົກຄອງເດັກນ້ອຍ ແລະ ຄູອາຈານກໍຕ້ອງເຂົ້າຮ່ວມຢ່າງຕັ້ງໜ້າໃນການສິດສອນຈະລິຍາທໍາ ຄຸນນະທໍາ, ຮູ້ແຍກອອກອັນໃດສໍາຄັນອັນໃດບໍ່ສໍາຄັນ ແລະ ແນະນໍາໃຫ້ເຂົາເຈົ້າຮູ້ວ່າອັນໃດຜິດອັນໃດຖືກ ແລະ ຕ້ອງລະມັດລະວັງແນວໃດ?. ຂ່າວ: ເກີດຂວັນໃຈ