ນັກສຶກສາລາວ ຍາດໄດ້ຫຼຽນທອງ ໃນການແຂ່ງຂັນງານວິໄຈ ໃນເວທີ ສາກົນ

ນັກຮຽນ 6 ນ້ອງ ທີ່ເປັນຕົວແທນ ສປປ ລາວ ສາມາດຍາດໄດ້ ຫຼຽນທອງ ຈາກການແຂ່ງຂັນ ເຮັດການວິໄຈ ທີ່ໄດ້ຈັດຂຶ້ນ ຢູ່ ສາທາລະນະລັດ ປະຊາຊົນຈີນ ເພື່ອສະເຫຼີມສະຫຼອງ ວັນປະຫວັດສາດທໍາມະຊາດ ຂອງໂລກ.

ກຸ່ມນັກຮຽນ ຈາກ ສປປ ລາວ ທີ່ຍາດໄດ້ລາງວັນດັ່ງກ່າວ ແມ່ນມາຈາກ ໂຮງຮຽນມັດທະຍົມ ສົມປັນຍາ, ໂຮງຮຽນປະຖົມ ໜອງບົວທອງ ຈາກນະຄອນຫຼວງວຽງຈັນ, ແລະ ໂຮງຣຽນ SOS ແຂວງ ຊຽງຂວາງ.

ນ້ອງນັກຮຽນ ທັງ 6 ຄົນ ປະກອບມີ ທ້າວ ຊາຍນາໂດ ລະດີຫານົງໄຊ, ທ້າວ ຊາວວະລິດ ດວງແສງ, ນາງ ສົມຄໍາ ບຸນຄໍາຄອນ, ນາງ ຈັນສະໝອນ ໄຊຍະເກດ, ນາງ ນໍ້າທິບ ເກດພູວົງ ແລະ ນາງ ພິນນະພາ ວິພອນ ຮຽນ.

ຈໍານວນກຸ່ມນັກຮຽນ ທີ່ເຂົ້າຮ່ວມການແຂ່ງຂັນໃນເທື່ອນີ້ ແມ່ນມາຈາກ 6 ປະເທດ ລວມມີທັງໜົດ 32 ຄະນະ ໂດຍແຕ່ລະຄະນະ ຈະຕ້ອງໄດ້ນໍາສະເໜີ ຜົນງານການວິໄຈຂອງຕົນ ກ່ອນທີ່ຄະນະກໍາມະການ ຈະເປັນຜູ້ຕັດສິນ ໃຫ້ຄະແນນ ແລະ ໃຫ້ລາງວັນແກ່ ຄະນະ ທີ່ມີຜົນຂອງການນໍາສະເໜີ ທີ່ດີທີ່ສຸດ.

ຜ່ານການນໍາສະເໜີ ກຸ່ມທີ່ເຮັດການນໍາສະເໜີໄດ້ດີທີ່ສຸດ ແມ່ນ ກຸ່ມຂອງນ້ອງນັກຮຽນ ທີ່ມາຈາກປະເທດເຈົ້າພາບ ສປ ຈີນ, ທີມ ຈາກຮອງກົງ ແລະ ປະເທດໄທ ໄດ້ອໍາດັບສອງ ແລະ ທີມຈາກປະເທດລາວ ສາມາດຍາດໄດ້ອັນດັບທີ່ສາມ ມາຄອງ. ຫົວຂໍ້ ທີ່ນັກສຶກສາລາວ ນໍາມາສະເໜີແມ່ນ "ເຫດການໄພທໍາມະຊາດ ທີ່ໃຫຍ່ທີ່ສຸດ" ຊຶ່ງນ້ອງນັກຮຽນ ຈາກສປປ ລາວ ແມ່ນສາມາດນໍາສະເໜີ ຜົນງານການວິໄຈ ໄດ້ເປັນຢ່າງດີ ແລະ ສາມາດຍາດໄດ້ຫຼຽນທອງມາຄອງໄດ້ ທີ່ສູນ ໂອລິມປິກ ຂອງເມືອງຊານດົງ, ແຂວງຢູນນານ ສປ ຈີນ ລະຫວ່າງວັນທີ 16-20 ກໍລະກົດ 2015.

ທີ່ມາ CRI-FM93

ບົດຄວາມໃຫມ່ໆ