ນັກກີລາບານເຕະທີມຊາດລາວ ກຽມລົງສະໜາມແຂ່ງຂັນ ພົບກັບ ທີມຊາດກູເວດ ໃນວັນທີ 08 ກັນຍາ 2015 ນີ້

         ພິທີຖະແຫຼງຂ່າວການແຂ່ງຂັນເຕະບານລະຫວ່າງ ທີມຊາດລາວຊຸດໃຫຍ່ຈະລົງສະໜາມ ພົບກັບ ທີມຊາດກູເວດ ຮອບຄັດເລືອກ ໄປບານເຕະໂລກ ໃນລາຍການ 2018 FIFA World cup Russia and AFC Asian cup UAE 2019 ໄດ້ຈັດຂຶ້ນໃນຕອນເຊົ້າວັນທີ 07 ກັນຍາ 2015 ທີ່ໂຮງແຮມແລນມາກ ຣີເວີໄຊ ນະຄອນຫຼວງວຽງຈັນ ໂດຍການຖະແຫຼງຂ່າວຕໍ່ສື່ມວນຊົນຂອງທ່ານ ສະຕິບ ດາວີ ຄູເຝິກທີມບານເຕະຊາດລາວ ໂດຍມີນັກກີລາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

          ທ່ານ ສະຕິບ ດາວີ ໄດ້ກ່າວວ່າ ການແຂ່ງຂັນລະຫວ່າງ ທີມຊາດລາວ ພົບກັບ ທີມຊາດກູເວດ ໃນຄັ້ງນີ້ ຈະລົງສະໜາມແຂ່ງຂັນໃນວັນທີ 08 ກັນຍາ 2015 ທີ່ສະໜາມກີລາແຫ່ງຊາດ ຫຼັກ 16 ນະຄອນຫຼວງວຽງຈັນ ເລີ່ມແຕ່ເວລາ 19:00 ໂມງ ເປັນຕົ້ນໄປ ເຊິ່ງກໍເປັນວຽກທີິ່ໜັກພໍສົມຄວນ ເນື່ອງຈາກນັກເຕະທີມຊາດລາວ ຫາກໍສໍາເລັດການເຂົ້າຮ່ວມແຂ່ງຂັນຢູ່ ສ.ເກົາຫຼີ ໃນທ້າຍອາທິດຜ່ານມາ ແລະ ນັກກີລາເຕະບານທີມຊາດກູເວດ ສ່ວນຫຼາຍກໍເປັນນັກເຕະບານທີ່ມີຮູບຮ່າງໃຫຍ່ ມີຫຼາຍຄົນເປັນນັກເຕະບານທີ່ໄປຄ້າແຄ່ງໃນສະໂມສອນທີ່ມີຊື່ສຽງລະດັບໂລກ ແລະ ໄດ້ປຽບດ້ານປະສົບການກວ່າທີມຊາດລາວເຮົາ ເຖິງຢ່າງໃດກໍຕາມ ຈະພະຍາມຍາມກະຕຸ້ນໃຫ້ນັກກີລາບານເຕະທີມຊາດລາວເຮັດໃຫ້ດີທີສຸດໃນນັດສໍາຄັນນີ້ ເຊິ່ງກໍເປັນໂອກາດອັນດີໃຫ້ນັກເຕະບານທີມຊາດລາວໄດ້ແລກປ່ຽນປະສົບການເພື່ອພັດທະນາຕົນເອງໃຫ້ກ້າວໄກທຽມທັນກັບພາກພື້ນ ແລະ ສາກົນເທື່ອລະກ້າວ ພ້ອມກັນນີ້ ກໍຂໍເຊີນຊວນມວນຊົນທຸກໆທ່ານ ເຂົ້າຮ່ວມຊົມ ຮ່ວມເຊຍ ເປັນກໍາລັງໃຈ ໃຫ້ແກ່ນັກເຕະບານທີມຊາດລາວ ແລະ ເປັນເຈົ້າພາບທີ່ດີຕ້ອນຮັບແຂກບ້ານແຂກເມືອງທີ່ມາຢ້ຽມຢາມ.

ຂ່າວ/ພາບ: ເທບພະວົງ

……………………………………………………………………………………………………………………………………………………………………………………

ທີ່​ມາ: Vientiane today