ນະໂຍບາຍພິເສດເຮັດໃຫ້ມວນຊົນຮ່ວມສະຫລອງບຸນວັດພູປີນີ້ຢ່າງໜາແໜ້ນ

ປະຊາຊົນ, ນັກທ່ອງທ່ຽວພາຍໃນ ແລະ ຕ່າງປະເທດຫລາຍກວ່າ 3 ແສນຄົນຫລັງໄຫລເຂົ້າຮ່ວມສະຫລອງງານບຸນນະມັດສະການຜາສາດຫີນວັດພູຈຳປາສັກປີ 2016 ຢ່າງໜາແໜ້ນ ພາຍຫລັງອໍານາດການປົກຄອງແຂວງ ປະກາດບໍ່ໃຫ້ເກັບຄ່າຜ່ານປະຕູສໍາລັບຂຶ້ນໄປກາບໄຫວ້ບູຊາສະຖານທີ່ສິ່ງສັກສິດຢູ່ເທິງວັດພູພາຍໃນວັນທີ 20-22 ກຸມພານີ້ເພື່ອດຶງດູດການທ່ອງທ່ຽວ ແລະ ເພີ່ມທະວີການມີສ່ວນຮ່ວມຫລາຍຂຶ້ນຕາມວິຖີດັ້ງເດີມທີ່ເຄີຍປະຕິບັດມາ. 
ທ່ານ ບົວລິນ ວົງພະຈັນ ຮອງເຈົ້າແຂວງຈຳປາສັກ ຮອງປະທານຄະນະຮັບຜິດຊອບຈັດງານນະມັດສະການຜາສາດຫີນວັດພູ ປະຈຳປີ 2016 ທັງເປັນຜູ້ຊີ້ນຳໂດຍກົງເປີດເຜີຍວ່າ: ງານບຸນນະມັດສະການຜາສາດຫີນວັດພູປີນີ້ໄດ້ຈັດຂຶ້ນພ້ອມໆກັບການສະເຫລີມສະຫລອງຄົບຮອບ 15 ປີຂອງວັດພູຈຳປາສັກທີ່ໄດ້ຮັບຮອງເປັນມໍລະດົກໂລກທາງດ້ານວັດທະນະທຳນັບລະຫວ່າງ 16-22 ກຸມພາ 2016 ແຕ່ພວກເຮົາບໍ່ໃຫ້ມີການຕິດປ້າຍວົງກົມລົດປະເພດຕ່າງໆ ເພື່ອເຮັດໃຫ້ການສັນຈອນມີຄວາມສະດວກສະບາຍ ແລະ ບໍ່ເກັບຄ່າເຂົ້າຊົມ ຫລື ຂຶ້ນກາບໄຫວ້ວັດພູ 3 ວັນຄື: ວັນທີ 20-22 ກຸມພາ 2016.
ຂະນະທີ່ ທ່ານ ນາງ ສົມເລັດ ໂພສະລາດ ປະທານກຸ່ມບໍລິສັດຍິ່ງໂຊກໄຊ, ຜູ້ສໍາປະທານການໃຫ້ບໍລິການໃນຂອບເຂດວັດພູໄດ້ລາຍງານວ່າ: ງານບຸນນະມັດສະການວັດພູປີນີ້, ກຸ່ມບໍລິສັດຂອງພວກເຮົາໄດ້ປະກອບສ່ວນທຶນປະມານ 390 ລ້ານກີບເຂົ້າໃນການກິດຈະກໍາຕ່າງໆ ໃນນັ້ນມີ 100 ກວ່າເຂົ້າຮ່ວມວາງສະແດງສິນຄ້າເຊັ່ນ: ຕະຫລາດນັດວາງສະແດງສິນຄ້າອຸດສາຫະກຳ, ກະສິກຳ ແລະ ຫັດຖະກຳ ຈາກບັນດາເມືອງ, ບໍລິສັດ, ຫ້າງຮ້ານ ທັງພາຍໃນ ແລະ ຕ່າງປະເທດ ນອກຈາກນັ້ນກໍມີການແຂ່ງຂັນກິລາມວນຊົນ, ການສະແດງສິລະປະວັນນະຄະດີ, ຈາກພາຍໃນແຂວງ ແລະ ປະເທດເພື່ອນບ້ານ (ໄທ, ຫວຽດນາມ, ກຳປູ່ເຈຍ, ອິນເດຍ)ກ້ອນກໍາລັງທຸງຊາດ, ທຸງທິວ, ກ້ອນກໍາລັງປ້າຍຄໍາຂວັນ ແລະ ສັນຍາລັກທີ່ເປັນເອກະລັກຈາກ 10 ເມືອງໃນແຂວງຈໍາປາສັກ ແລະ ລາຍການສະແດງອື່ນໆ. ແນວໃດກໍດີ ປີນີ້ ພວກເຮົາໄດ້ເລັ່ງເຫັນຄວາມສໍາຄັນເພີ່ມຂຶ້ນກວ່າເກົ່າໃນການພັດທະນາການທ່ອງທ່ຽວແບບມີສ່ວນຮ່ວມຕິດພັນກັບການປົກປັກຮັກສາ ແລະ ອະນຸລັກຮັກສາຮີດຄອງປະເພນີດັ້ງເດີມແບບຍືນຍົງ ສະນັ້ນພວກເຮົາບໍ່ໄດ້ເກັບຄ່າຜ່ານປະຕູເຂົ້າທ່ຽວຊົມ ຫລື ກາບໄຫວ້ເປັນເວລາ 3 ວັນ; ບໍ່ໄດ້ເກັບຄ່າຕັ້ງຮ້ານຂາຍປີ້ງໄກ່, ຂາຍບັ້ງເຂົ້າຫລາມ ແລະ ຂາຍຍ່ອຍແບບເຄື່ອນທີ່ຂອງປະຊາຊົນເພື່ອເຮັດໃຫ້ປະຊາຊົນມີສ່ວນຮ່ວມໃນການສ້າງເສດຖະກິດຄອບຄົວ ແລະ ຍັງເປັນການຮັກສາແບບວິຖີຊີວິດອັນດັ້ງເດີມໄວ້; ມີນະໂຍບາຍຫລຸດຄ່າຈາກ 2 ລ້ານກີບມາເປັນ 1 ລ້ານກີບສໍາລັບຮ້ານຂາຍເຄື່ອງປະເພດອາຫານ, ສິ່ງອຸກປະໂພກ-ບໍລິໂພກ, ເຄື່ອງຜະລິດຕະພັນຫັດຖະກໍາ ແລະ ຜະລິດຕະພັນອື່ນໆ. ສ່ວນເກັບຄ່າຝາກລົດນັ້ນ ພວກເຮົາບໍ່ໄດ້ມີສ່ວນກ່ຽວຂ້ອງເພາະເມືອງເປັນຜູ້ເກັບເອງ. 
ພະແນກຖະແຫລງຂ່າວ ວັດທະນະທໍາ ແລະ ທ່ອງທ່ຽວໄດ້ເປີດເຜີຍວ່າ: ປີນີ້ມີນັກທ່ອງທ່ຽວພາຍໃນ ແລະ ຕ່າງປະເທດເຂົ້າຮ່ວມງານບຸນນະມັດສະການວັດພູຈໍາປາສັກປະມານ 3 ແສນກວ່າຄົນ ຖ້າປຽບທຽບໃສ່ປີຜ່ານມາຖືວ່າມີຈໍາຫລາຍທີ່ສຸດ ໃນນັ້ນເຫດຜົນຕົ້ນຍ້ອນມີການໂຄສະນາແຕ່ຫົວທີຜ່ານທາງສື່ສັງຄົມອອນລາຍ, ສິ່ງພິມ ແລະ ອື່ນໆ ແຕ່ອັນພິເສດເປັນສິ່ງດູດແຮງກວ່າໝູ່ແມ່ນບໍ່ໄດ້ເກັບຄ່າຜ່ານປະຕູ ແລະ ບໍ່ໄດ້ເກັບຄ່າຮ້ານຂາຍເຄື່ອງຍ່ອຍແບບເຄື່ອນທີ່ຂອງປະຊາຊົນ ເຊິ່ງເຮັດໃຫ້ປະຊາຊົນໄດ້ສ່ວນຮ່ວມຫລາຍຂຶ້ນກວ່າເກົ່າ.
ຂ່າວ: ເກີດຂວັນໃຈ

Pathedlao Lao