ນະຄອນຫຼວງວຽງຈັນເພີ່ມການປັບໃໝຜູ້ລະເມີດກົດຈະລາຈອນຂຶ້ນ 10 ເທົ່າ

ໄດ້​​ນຳ​​ໃຊ້​ລົດ​ເຄນ​ມາ​ຍົກ​ເອົາ​ລົດ​ໃຫຍ່​ຫລາຍ​ສິບ​ຄັນ ທີ່​ຈອດ​ຢ່າງຊະຊາຍ​ລຽບ​ຕາມ​ສາຍ​ທາງ​ດັ່ງກ່າວ ​ເຊິ່ງ​ເປັນ​ເຂດ​ຫ້າມ​ຈອດ​ລົດ​ທຸກ​ຊະນິດ, ພ້ອມ​ຍັງເປັນການລ່ວງລະເມີດລະບຽບຈະລາຈອນອີກດ້ວຍ.

             ​ເຈົ້າ​ໜ້າ​ທີ່ ຈະລາຈອນ ໃຫ້ຮູ້ວ່າ: ອີງ​ຕາມມະຕິ​ຕົກລົງ​ຂອງ​​ເຈົ້າຄອງ​ນະຄອນຫລວງ​ວຽງ​ຈັນ ທີ່​ໄດ້​ເລີ່​ມປະກາດ​ໃຊ້​ຢ່າງ​ເປັນ​ທາງ​ການ, ນັບ​ແຕ່​ຕົ້ນ​ເດືອນ​ພະຈິກ 2015 ​ເປັນ​ຕົ້ນ​ມາ, ໂຄງການ​ວຽງຈັນ​ສະອາ​ດ ​ແລະ ຮັບປະກັນ​ຄວາມ​ເປັນ​ລະບຽບ​ຮຽບຮ້ອຍ​ຕາມ​ເສັ້ນທາງ, ​ເຄຫາ​ສະຖານ, ພາ ຫະນະ​ຂົນ​ສົ່ງ,
ສາທາລະນຸປະ​ໂຫຍ​ດ, ​ໂຮງ​ຈັກ​ໂຮງງານ, ການ​ບໍລິ​ໂພ​ກນ້ຳ ​ແລະ ທ້ອງຟ້າ​ ​ໃຫ້​ມີ​ຄວາມ​ສະ​ອາດຈົບງາມດີ ຕາມມາດຖານວ່າ: ຫ້າມນຳໃຊ້ລະບຽງທາງຂອງຖະໜົນຫລວງ​ແຫ່ງ​ຊາດ, ​ເສັ້ນທາງ​ໃຫຍ່, ກາງ, ທາງ​ຄົນ​ຍ່າງ​​ໃນຕົວເມືອງແມ່ນບໍ່​ໃຫ້​ມີ​ສິ່ງ​ກີດຂວາງ​ຢ່າງ​ເດັດຂາດ ​ແລະ ສະເພາະຢູ່ໃຈກາງນະຄອນຫລວງວຽງຈັນ ແມ່ນຈະ​ໄດ້​ເລີ່​ມຈັດ​ຕັ້ງປະຕິ​ບັດຢູ່​ໃນ 21 ​ເສັ້ນທາງ​​ເຊັ່ນ: ຖະໜົນ​ສຸພາ​ນຸວົງ-ຖະໜົນຫລວງ​ພະ​ບາງ (ສາມ​ແຍກ​ສີ​​ໄຄ-​ໄຟ​ແດງ​ວັດ​ອິນ​ແປງ), ຖະໜົນ​ເສດ​ຖາ​ທິລາດ, ຖະໜົນ​ສາມ​ແສນ​ໄທ, ຖະໜົນ​ຟ້າ​ງຸ່ມ, ຖະໜົນ​ລ້ານ​ຊ້າງ, ຖະໜົນ​ອາຊຽນ, ຖະໜົນ​ກຳ​ແພງ​ເມືອງ ​ແລະ ຖະໜົນ​ອື່ນໆ, ພ້ອມ​ນີ້ ຍັງຈະ​ໄດ້​ປັບ​ໄໝ​ຜູ້​ທີ່​ຈອດ​ລົດ​ຢູ່​ເຂດ​ຕ້ອງ​ຫ້າມເປັນ​ສິບ​ເທົ່າ​ຕົວ​ຂອງ​ມູນ​ຄ່າ​ການ​ປັບ​ໄໝ​​ເຊັ່ນ: ລົດຈັກ 30 ພັນ​ກີບ ຄູນ 10 ​ເທົ່າ​ກັບ 3 ​ແສນ​ກີບ​ຕໍ່​ຄັ້ງ, ລົດ​ສາມ​ລໍ້​ຕິດ​ເຄື່ອງ​ຈັກ 50 ພັນ​ກີບ ຄູນ 10 ​ເທົ່າ​ກັບ 5 ​ແສນ​ກີບຕໍ່​ຄັ້ງ, ລົດ​ເບົາ ປະ​ເພດ​ເກັງ, ກະບະ, ຈິບ ​ແລະ ລົດ​ຕູ້ 70 ພັນ​ກີບ ຄູນ 10 ​ເທົ່າ​ກັບ 7 ​ແສນ​ກີບຕໍ່​ຄັ້ງ, ລົດ​ໂດຍສານ 4 ລໍ້ 1 ​ແສນ​ກີບ ​ເປັນ 1 ລ້ານ​ກີບຕໍ່​ຄັ້ງ, ລົດ​ບັນທຸກ 6 ລໍ້ ຈາກ 150.000 ກີບ ​ເປັນ 1,5 ລ້ານ​ກີບ​ຕໍ່​ຄັ້ງ ​ແລະ ລົດ​ບັນທຸກ 10 ລໍ້​ຂຶ້ນ​ໄປ 2 ​ແສນ​ກີບ ​ເປັນ 2 ລ້ານ​ກີບ​ຕໍ່​ຄັ້ງ. ​ໃນ​ເບື້ອງ​ຕົ້ນ ​ເຈົ້າ​ໜ້​າທີ່ ຈະ​ໄດ້​ນຳ​ກຸນແຈ​ມາ​ລ໋ອກລໍ້​ລົດໄວ້ ​ເພື່ອ​ເປັນ​ການ​ຕັກ​ເຕືອນ ​ແລະ ປັບ​ໄໝຕາມ​ລະບຽບ​ການ, ​ແຕ່​ເມື່ອ​ຜູ້​ລະ​ເມີດ​ບໍ່​​ເຂັດ​ຫລາບ ​ແລະ ຍັງ​ຈອດ​ລົດ​ຊະຊາຍ​ຕາມ​ເສັ້ນທາງ​ຕ່າງໆ ​ແມ່ນ​ຈະ​ໄດ້​ໃຊ້​ມາດ​ຕະການ​ຂັ້ນ​ເດັດຂາດ​ຄື: ​ນຳ​ເອົາລົດ​ເຄນ​ມາ​ຍົກລົດ​ຂອງ​ຜູ້​ລະ​ເມີດ​ລະບຽບ​ຕ່າງໆ ​ເພື່ອ​ນຳ​ໄປ​ຮັກສາ​ໄວ້​ຢູ່ຫ້ອງການຈະລາຈອນ​​ແຕ່ລະເມືອງ ​ຫລື ນະຄອນບານ​ຕາມ​ຄວາມ​ເໝາະ​ສົມ​, ພ້ອມ​ທັງ​ປັບ​ໄໝ 10 ​ເທົ່າ ດັ່ງ​ທີ່​ໄດ້​ກຳນົດ​ໄວ້​ຕາມມະຕິ​ຄຳ​ສັ່ງ​ຂອງ​ທ່ານ​ເຈົ້າ​ຄອງ​ນະຄອນຫລວງ​ວຽງ​ຈັນ​ວາງ​ອອກ​ຢ່າງ​ເຂັ້ມ​ງວດ.

ໜັງສືພິມ: ລາວພັດທະນາ.