ນະຄອນຫລວງເລັ່ງປະດັບປະດາຕົວເມືອງຕ້ອນຮັບກອງປະຊຸມໃຫຍ່ຄັ້ງທີ X ຂອງພັກ

ປັດຈຸບັນ ນະຄອນຫລວງວຽງຈັນ ໄດ້ເຮັດຫລາຍໜ້າວຽກທີ່ສຳຄັນ ແລະ ພົ້ນເດັ່ນຫລາຍດ້ານ ໂດຍສະເພາະວຽກງານອະນາໄມ ແລະ ປະດັບປະດາຕົວເມືອງ ໃຫ້ມີຄວາມສະອາດງາມຕາ ເພື່ອຂ່ຳນັບຮັບຕ້ອນກອງປະຊຸມໃຫຍ່ ຄັ້ງທີ X ຂອງພັກ ໃຫ້ມີບັນຍາກາດອັນຟົດຟື້ນ ແລະ ປະສົບຜົນສຳເລັດຢ່າງຈົບງາມ.
ນະຄອນຫລວງວຽງຈັນ ພວມເລັ່ງ ປັບປຸງຕີເສັ້ນ ແລະ ທາສີຂອບທາງຄືນໃໝ່ ໂດຍໄດ້ກຳນົດເສັ້ນທາງສາຍຫລັກ 6 ເສັ້ນ ຄື: ຖະໜົນສຸພານຸວົງ (ແຕ່ສາມແຍກສີໄຄຫາສາມແຍກຊ້າງ 3 ຫົວ, ໄລຍະທາງຍາວ 3.984 ແມັດ); ຖະໜົນລ້ານຊ້າງ (ແຕ່ຫໍຄຳຫາປະຕູໄຊ ໄລຍະທາງ1.600 ແມັດ); ຖະໜົນໄກສອນພົມວິຫານ (ແຕ່ປະຕູໄຊຫາສີ່ແຍກໄຟອຳນາດດົງໂດກ ໄລຍະທາງຍາວ 7.200 ແມັດ; ຖະໜົນສາມແສນໄທ (ແຕ່ 3 ແຍກຊ້າງສາມຫົວຫາ 3 ແຍກປ້ຳນ້ຳມັນສີເມືອງ ໄລຍະທາງຍາວ 2.235 ແມັດ); ຖະໜົນເສດຖາທິລາດ (ແຕ່ 3 ແຍກຊ້າງສາມຫົວຫາປັບນ້ຳມັນສີເມືອງ ໄລຍະທາງ 2.876 ແມັດ ແລະ ຖະໜົນທ່າເດື່ອ (ແຕ່ຫໍຄຳຫາສາມແຍກຈີ່ນາຍໂມ້ ໄລຍະທາງ 5.500 ແມັດ, ປັດຈຸບັນ ປັບປຸງສຳເລັດແລ້ວເກືອບ 50% ຄາດວ່າຈະໃຫ້ສຳເລັດ 100% ໃນກາງເດືອນນີ້. ສຳລັບ ວຽກງານຕົບແຕ່ງປະດັບປະດາ ທຸງຊາດ, ທຸງພັກ, ທຸງທີວ ແລະ ວຽກງານຕິດຕັ້ງປະດັບປະດາໄຟເອ້ທາງ, ໄຟສະຫວ່າງ ແລະ ຕິດປ້າຍຄຳຂວັນ ຕາມໜ້າບ້ານ, ທາງຮ່ອມ, ທາງຊອຍ ຄາດວ່າຈະໃຫ້ສຳເລັດໃນກາງເດືອນນີ້ ເຊັ່ນດຽວກັນ./
.