ນອກແວ ໃຫ້ການຊ່ວຍເຫຼືອເກັບກູ້ລະເບີດຕົກຄ້າງ ຢູ່ເມືອງບົວລະພາ

ບັນຫາ​ລະເບີດ​ບໍ່​ທັນ​ແຕກ​ຕົກຄ້າງ ຍັງ​ເປັນ​ໄພ​ຂົ່ມຂູ່​ອັນ​ຮ້າຍແຮງ​ຕໍ່​ການ​ພັດທະນາ​ເສດ​ຖະກິດ-ສັງຄົມ​ຂອງ​ຊາດ ໂດຍ​ສະເພາະແມ່ນ​ ການ​ດຳລົງ​ຊີວິດຂອງ​ປະຊາຊົນ​ລາວ​ບັນດາເຜົ່າ ເຂດ​ຫ່າງ​ໄກ​ສອກຫຼີກ ເພື່ອ​ແກ້​ໄຂບັນຫາ​ດັ່ງກ່າວ​ໃຫ້​ນັບ​ມື້​ດີ​ຂຶ້ນ ແລະ ທັງ​ເປັນ​ການ​ສະໜອງ​ເນື້ອທີ່​ການ​ຜະລິດ​ກະສິກຳ ​ໃຫ້​ແກ່​ປະຊາ​ຊົນ​ທ້ອງຖິ່ນ ລັດຖະບານ ແລະ ປະຊາຊົນ​ປະເທດນອກ​ແວ ໄດ້ໃຫ້ການ​ຊ່ວຍເຫຼືອ​ວຽກ​ງານ​ການສຳ​ຫຼວດ ແລະ ເກັບ​ກູ້​ລະເບີດ​ບໍ່ທັນ​ແຕກ​ຕົກ​ຄ້າງ ຢູ່​ເມືອງ​ບົວ​ລະພາ ແຂວງ​ຄຳ​ມ່ວນ ມູນ​ຄ່າ 530.000 ໂດ​ລາ​ສະຫະລັດ ຫຼື ປະມານ 3,4 ຕື້​ກີບ ເຊິ່ງ​ມີ​ໄລຍະປະຕິບັດ​ງານ 5 ເດືອນ (1/10/2015-29/2/2016) ທັງ​ນີ້ ເພື່ອເປັນ​ການ​ປະກອບສ່ວນ​ເຂົ້າ​ໃນການຈັດຕັ້ງ​ປະຕິບັດ ​ແຜນ​ພັດ​ທະນາ​ແຫ່ງ​ຊາດ​ຂອງ​ລັດຖະບານລາວ ໃນ​ການ​ລຶບລ້າງ​ຄວາມທຸກ​ຍາກ​ໃຫ້​ປາກົດ​ຜົນ​ເປັນ​ຈິງ.

ພິທີ​ລົງ​ນາມ​ບົດ​ບັນທຶກ​ຄວາມເຂົ້າໃຈ ລະຫວ່າງຄະນະ​ກຳ​ມະການ​ຄຸ້ມ​ຄອງ​ແຫ່ງ​ຊາດ ເພື່ອການ​ແກ້​ໄຂ​ບັນຫາ​ລະເບີດ​ບໍ່​ທັນແຕກ​ຕົກ​ຄ້າງ​ຢູ່ ​ສປປ ລາວ (​ຄຊກລ) ແລະ ອົງການເກັບ​ກູ້ລະເບີດ​ແມັກ ປະຈຳ​ລາວ ຈັດ​ຂຶ້ນວັນ​ທີ 1 ຕຸລາ 2015 ທີ່​ຫ້ອງການ ​ຄຊກລ ຮ່ວມ​ລົງ​ນາມ​ມີ​ທ່ານ ບຸນເພັງ ສີສະ​ຫວັດ ຮອງ​ຫົວໜ້າຫ້ອງການ ​ຄຊກລ ແລະ ທ່ານ ໄຊ​ມອນ ເຣ ຫົວໜ້າ​ຫ້ອງການເກັບ​ກູ້​ລະເບີດ​ແມັກ ມີ​ຜູ້ຕາງໜ້າຈາກ​ກະຊວງ ອົງການ​ປົກຄອງທ້ອງຖິ່ນ ແລະ ພະນັກງານ-ວິຊາການ​ກ່ຽວຂ້ອງ​ເຂົ້າ​ຮ່ວມ.

ໂຄງການ​ສຳ​ຫຼວດ ແລະ ເກັບ​ກູ້​ລະເບີດ​ບໍ່​ທັນ​ແຕກ​ຕົກ​ຄ້າງ ຢູ່​ເມືອງ​ບົວລະພາ ຈະ​ໄດ້​ຈັດ​ຕັ້ງປະຕິບັດ​ຢູ່ 30 ບ້ານ​ເປົ້າ​ໝາຍ ແລະ 6 ບ້ານ​ຈຸດ​ສຸມ​ລັງ​ຄັງ (ກຸ່ມບ້ານ​ທົດ​ລອງ​ວຽກ​ງານ 3 ສ້າງ ແຂວງ​ຄຳ​ມ່ວນ) ເຊິ່ງ​ກິດຈະກຳຫຼັກ​ຂອງ​ໂຄງການ​ປະກອບ​ມີ: ການ​ສຳ​ຫຼວດ​ທົ່ວ​ໄປ ການ​ສຳຫຼວດ​ທາງ​ວິຊາ​ການ ແລະ ການກວດ​ກູ້​ລະເບີດ​ ເປັນຕົ້ນ ໂດຍ​ການຈັດ​ຕັ້ງ​ປະຕິບັດ​ໂຄງການ​ດັ່ງກ່າວ ແມ່ນ​ໄດ້​ຮັບ​ການ​ສະໜັບສະໜູນດ້ານ​ງົບປະມານ​ຈາກ​ລັດຖະບານ ແລະ ປະຊາຊົນປະເທດ​ນອກແວ.

ທີ່ມາ vientianemai