ທ້າວ ສອນໄຊ ຄວ້າຫຼຽນຄຳ ເທຄວັນໂດຊີງແຊັມອາຊຽນຄັ້ງທີ 13 ຫຼັງເອົາຊະນະເຈົ້າພາບ

ທ້າວ ສອນໄຊ ຄວ້າຫຼຽນຄຳ ເທຄວັນໂດຊີງແຊັມອາຊຽນຄັ້ງທີ 13 ຫຼັງເອົາຊະນະເຈົ້າພາບ

ທ້າວ ສອນໄຊ ມັງເຄືອ ນັກກີລາເທຄວັນໂດຊາຍຈາກ ສປປ ລາວ ສ້າງຊື່ສຽງໃຫ້ກັບປະເທດອີກຄັ້ງຫຼັງຈາກເອົາຊະນະນັກເທຄວັນໂດຈາກມາເລເຊຍ ຂາດລອຍ 11 – 6 ຄະແນນ ໃນຮອບຊີງຊະນະເລີດລຸ້ນ 80 ກິໂລກຣາມ ຂອງການແຂ່ງຂັນເທຄວັນໂດຊີງແຊັມອາຊຽນ ຄັ້ງທີ 13 ທີ່ປະເທດມາເລເຊຍ ເມື່ອທ້າຍອາທິດທີ່ຜ່ານມາ, ຂະນະທີ່ລາວຍົກໃຫ້ຜົນງານນີ້ວ່າເປັນແຊັມແຮກໝານໃນປີ 2017 ແລະ ຈະສືບຕໍ່ໃນການຝຶກຊ້ອມຕໍ່ເນື່ອງ ແລະ ຄວາມຫວັງລຸ້ນຕິດທີມຊາດລຸຍ ຊີເກມ ປີນີ້.
ການແຂ່ງຂັນເທຄວັນໂດຊີງແຊັມອາຊຽນ ຄັ້ງທີ 3 ປະຈໍາປີ 2017 ຈັດຂຶ້ນທີ່ລັດເປລິສ ປະເທດມາເລເຊຍ ລະ ຫວ່າງວັນທີ 21 – 26 ມີນາ ທີ່ຜ່ານມາ ໂດຍ ສປປ ລາວ ສົ່ງນັກກີລາເຂົ້າຮ່ວມແຂ່ງຂັນຈໍານວນ 9 ຄົນ ເຊິ່ງ ທ້າວ ສອນໄຊ ມັງເຄືອ 1 ໃນຈອມເຕະຈາກ ສປປ ລາວ ທີ່ເຂົ້າຮ່ວມການແຂ່ງຂັນໃນຄັ້ງນີ້ລົງແຂ່ງຂັນໃນວັນທີ 23 ມີນາ ທີ່ຜ່ານມາ ສາມາດຍາດໄດ້ຫຼຽນຄໍາ ໂດຍຖືເປັນຂອງຂວັນໃຫ້ແກ່ປະເທດຊາດຂອງພວກເຮົາເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 62 ປີ ໄດ້ສໍາເລັດ.


ປັດຈຸບັນ ທ້າວ ສອນໄຊ ກັບມາເຖິງ ສປປ ລາວ ແລ້ວ ແລະ ເປີດເຜີຍຕໍ່ໜັງສືພິມ ເສດຖະກິດ – ການຄ້າ ວ່າ: “ ນ້ອງໄດ້ລົງແຂ່ງຂັນໃນລຸ້ນ 80 ກິໂລກຣາມ ເຊິ່ງມີນັກກີລາ 4 ຄົນເຂົ້າຮ່ວມ, ລົງແຂ່ງຮອບທໍາອິດສາມາດເອົາຊະນະນັກກີລາຈາກກໍາປູເຈຍ ແລະ ສາມາດຜ່ານເຂົ້າໄປຊີງຊະນະເລີດກັບນັກກີລາເຈົ້າພາບ ແລະ ໃນຮອບຊີງຊະນະເລີດນ້ອງກໍ່ສາມາເອົາຊະນະນັກກີລາຈາກມາເລເຊຍ 11 – 6 ຄວ້າຫຼຽນຄໍາມາຄອງໄດ້ສໍາເລັດ, ສໍາລັບການແຂ່ງຂັນຄັ້ງນີ້ພົບກັບຄວາມຫຍຸ້ງຍາກຫຼາຍດ້ານເນື່ອງຈາກມີເວລາໃນການເກັບຕົວຝຶກຊ້ອມໜ້ອຍ ເຊິ່ງເຮັດໃຫ້ເວລາທີ່ພົບກັບຄູ່ຕໍ່ສູ້ທີ່ກຽມຕົວມາດີກໍ່ຈະເຮັດໃຫ້ພົບກັບ ຄວາມລໍາບາກພໍສົມຄວນ; ສໍາລັບຜົນງານໃນຄັ້ງນີ້ນ້ອງກໍ່ມີຄວາມຮູ້ສຶກດີໃຈຫຼາຍທີ່ໄດ້ເລີ່ມຕົ້ນປີ 2017 ດ້ວຍຫຼຽນຄໍາໃນການແຂ່ງຂັນລະດັບຊີງແຊັມອາຊຽນ ແລະ ຖືວ່າເປັນນິມິດໜາຍອັນດີ. ຢ່າງໃດກໍ່ຕາມ, ແຜນການໃນຕໍ່ໜ້າກໍ່ຈະໝັ່ນຝຶກຊ້ອມຕໍ່ເນື່ອງ ແລະ ຈະໄປເກັບຕົວທີ່ປະເທດ ສ.ເກົາຫຼີ ເພື່ອກຽມຕົວໄປແຂ່ງຂັນເທຄວັນໂດຊີງແຊັມໂລກ ທີ່ ສ.ເກົາຫຼີ ໃນໄວໆນີ້ ແລະ ຈະເຂົ້າຮ່ວມການແຂ່ງຂັນທີ່ສະຫະພັນຈັດໃຫ້ ໂດຍສະເພາະ ຊີເກມ ປີນີ້ທີ່ນ້ອງເອງຕ້ອງໃດ້ຫຼຸດນ້ຳໜັກລົງມາແຂ່ງຂັນໃນລຸ້ນ 74 ກິໂລກຣາມ ເຊິ່ງຈະພົບກັບປະເທດທີ່ມີນັກກີລາເກັ່ງໆຫຼາຍຄົນ ໂດຍສະເພາະແມ່ນປະເທດໄທ; ສ່ວນ ຊີເກມ 2015 ທີ່ປະເທດສິງກະໂປ ນ້ອງໄດ້ເສຍໃຫ້ກັບນັກກີລາຈາກປະເທດໄທ ແລະ ຫວັງວ່າ ຊີເກມ ທ້າຍປີນີ້ທີ່ ປະເທດມາເລເຊຍ ຈະຕັ້ງໃຈຝຶກຊ້ອມຫຼາຍຂຶ້ນຕື່ມເພື່ອຄວາມຫວັງທີ່ຈະສ້າງຜົນງານໃຫ້ດີກວ່ານັ້ນ ”.
ສໍາລັບ ທ້າວ ສອນໄຊ ມັງເຄືອ ເປັນອີກນັກກີລາຄວາມຫວັງຂອງເທຄວັນໂດລາວ ເພາະວ່າຜົນງານທີ່ຜ່ານມາຖືວ່າບໍ່ທໍາມະດາ ໂດຍສະເພາະເຄີຍຍາດໄດ້ຫຼຽນຄໍາໃນ ຊີເກມ ຄັ້ງທີ 26 ທີ່ປະເທດອິນໂດເນເຊຍ ເມື່ອປີ 2011, ຄວ້າຫຼຽນຄໍາໃນງານມະຫະກໍາກີລາວິທະຍາໄລອາຊຽນ ປະຈໍາປີ 2012 ທີ່ນະຄອນຫຼວງວຽງຈັນ ສປປ ລາວ, ຄວ້າຫຼຽນຄໍາໃນງານກີລາແຫ່ງຊາດ ຄັ້ງທີ 10 ທີ່ແຂວງອຸດົມໄຊ ໃນປີ 2014 ແລະ ຄວ້າຫຼຽນຄໍາໃນງານມະຫະກໍາກີລາມະຫາວິທະຍາໄລລາວ ເມື່ອປີ 2016.