ທ່ຽວພາກໃຕ້ໄປແວ່ພັກຜ່ອນທີ່ ດອນຄອນ-ດອນເດດ

 

ເຫຼືອເວລາອີກບໍ່ພໍເທົ່າໃດເດືອນຂ້າງໜ້າ, ການສົ່ງທ້າຍປີເກົ່າຕ້ອນຮັບປີໃໝ່ສາກົນກໍຈະໜູນວຽນມາຄົບຮອບອີກວາລະໜຶ່ງ, ບາງທ່ານມີແຜນວ່າຈະໄປທ່ຽວໃສດີ ຫຼືບາງທ່ານຍັງບໍ່ທັນມີແຜນວ່າຈະໄປໃສ?ແຕ່ຫາກວ່າບັນດາທ່ານເລືອກທີ່ຈະໄປທ່ຽວທາງພາກໃຕ້ຂອງລາວ, ຂໍແນະນຳລອງໄປພັກຜ່ອນ, ທີ່ດອນຄອນ-ດອນເດດ ຊຶ່ງເປັນສະຫວັນຂອງຜູ້ທີ່ຕ້ອງການມາພັກຜ່ອນຢ່າງແທ້ຈິງ.

     ດອນຄອນ-ດອນເດດ ເມືອງໂຂງ ແຂວງຈຳປາສັກ ເປັນສະຖານທີ່ທ່ອງທ່ຽວທີ່ໄດ້ຮັບຄວາມນິຍົມ, ໂດຍສະເພາະໃນກຸ່ມນັກທ່ອງທ່ຽວໄວໜຸ່ມຕ່າງປະເທດໃນລະຫວ່າງ 5-10 ປີຜ່ານມາ, ແຕ່ກ່ອນຢູ່ດອນແຫ່ງນີ້ບໍ່ມີກະແສໄຟຟ້າໃຊ້, ມີລັກສະນະທໍາມະຊາດແບບດັ່ງເດີມ, ຈິ່ງເປັນທີ່ນິຍົມຂອງບັນດານັກທ່ອງທ່ຽວແບບພະຈົນໄພ, ປະຊາຊົນໃນຂົງເຂດນັ້ນໃຊ້ຊີວິດຕິດພັນກັບທຳມະຊາດຢ່າງແທ້ຈິງ, ນັກທ່ອງທ່ຽວບາງຄົນໄດ້ມາພັກເຊົາຢູ່ດອນ ຄອນ-ດອນເດດປະມານ 2-3 ມື້, ບາງຄົນອາໄສຢູ່ເປັນອາທິດ ຫຼື ຫຼາຍກວ່ານັ້ນຍ້ອນຕິດໃຈທຳມະຊາດກາງດອກອັນຫງຽບສະຫງົບ.

     ດອນເດດຢູ່ທາງເໜືອດອນຄອນຢູ່ທາງໃຕ້ທັງສອງດອນເຕັມໄປດ້ວຍກິ່ນອາຍຂອງບ້ານເຮືອນເກົ່າສະໄໝອານານິຄົມຝຣັ່ງ, ມີຫາດຊາຍຫຼາຍແຫ່ງ, ເຮືອນພັກບັງກະໂລໄມ້ໄຜ່ລາຄາປະຫຍັດແບບທຳມະຊາດ, ມີສະຖານທີ່ ທ່ອງທ່ຽວທີ່ໜ້າສົນໃຈເຊັ່ນ: ທາງລົດໄຟເກົ່າ, ຊາກຫົວລົດໄຟ, ຂົວທີ່ສ້າງໃນສະໄໝຝຣັ່ງນ້ຳຕົກນ້ອຍ-ໃຫຍ່ທີ່ມີເປັນຈຳນວນຫຼາຍ,ມີສິ່ງອຳນວຍຄວາມສະດວກກະຈາຍຢູ່ທົ່ວທັງດອນຖືເປັນສະຫວັນຂອງນັກທ່ອງທ່ຽວທີ່ຕ້ອງການມາພັກຜ່ອນກັບທຳມະຊາດຢ່າງປະຕິເສດບໍ່ໄດ້.

     ວິທີການໄປກ່ອນອື່ນທ່ານຕ້ອງໄປຮອດປາກເຊໂດຍທາງລົດ ຫຼື ທາງອາກາດກໍແລ້ວແຕ່ຕໍ່ມາໄປຫາຂີ່ລົດສອງແຖວບໍລິເວນຕະຫຼາດດາວເຮືອງມີລົດໄປນາກະສັງລາຄາປະມານ 3 ສິບພັນກີບຕໍ່ຄົນ (ແຕ່ໄປດອນໂຂງ 4 ສິບພັນກີບຕໍ່ຄົນ) ໄປຮອດນາກະສັງຕ້ອງໄດ້ຂີ່ເຮືອໄປດອນເດດ-ດອນຄອນຄ່າເຮືອປະມານ 10 ພັນກີບຕໍ່ຄົນ, ໃນດອນເດດ-ດອນຄອນມີຫ້ອງພັກລາຄາແຕ່ 3 ສິບພັນກີບຈົນຮອດໂຮງແຮມລາຄາ 2-3 ແສນກີບຕໍ່ຄືນຕໍ່ຄົນ.

     ຮູ້ແນວນີ້ຫາກບັນດາທ່ານມີແຜນທີ່ຈະໄປທ່ຽວບັນດາ 4 ແຂວງ ພາກໃຕ້ຂອງລາວກໍຢ່າງລືມໄປສຳຜັດກັບບັນຍາກາດອັນສຸດແສນບັນຍາຍໃນເຂດມະຫານະທີສີພັນດອນ ທີ່ເປັນເຂດເກາະດອນນ້ອຍໃຫຍ່ທີ່ຊ່າລືພືຜ້າເລື່ອງເລົ່າຂານຕຳນານພື້ນເມືອງລາວ, ນັບແຕ່ດອນພະກ່ຳເມືອງຈຳປາສັກຈົນຮອດຊຸມດອນທີ່ຕັ້ງຢູ່ຫົວຄັນເຫວຄອນພະເພັງ, ທີ່ມີຕຳນານພື້ນເມືອງມາຫຼາຍເຊັ່ນຄົນເປັນຕົ້ນ: ເລື່ອງດອນນາງໂລງ, ດອນນາງລອຍ, ເລື່ອງສອງບ່າວສາວລ່ອງເຮືອລົງຄອນພະເພັງຈົນຮອດດອນໄຊທີ່ເປັນສະຫວັນຂອງຜູ້ທີ່ຕ້ອງການມາພັກຜ່ອນໃນປະຈຸບັນ.