ທ່ານ ພັນຄຳ ວິພາວັນ ຮອງປະທານປະເທດ ໄດ້ຕ້ອນຮັບການເຂົ້າຢ້ຽມຄຳນັບອຳລາຂອງທ່ານ Michel Goffin

ວັນທີ 3 ສິງຫາ 2016 ທີ່ທຳນຽບປະທານປະເທດ ທ່ານ ພັນຄຳ ວິພາວັນ ຮອງປະທານປະເທດ ໄດ້ຕ້ອນຮັບການເຂົ້າຢ້ຽມຄຳນັບອຳລາຂອງທ່ານ Michel Goffin ອຸປະທູດອີຢູ ປະຈຳ ສປປ ລາວ ເນື່ອງໃນໂອກາດທີ່ທ່ານສຳເລັດປະຕິບັດໜ້າທີ່ການທູດຢູ່ລາວ.

ໂອກາດດັ່ງກ່າວ ທ່ານຮອງປະທານປະເທດ ໄດ້ສະແດງຄວາມຕ້ອນຮັບ ແລະ ຊົມເຊີຍທ່ານ Michel Goffin ທີ່ສຳເລັດປະຕິບັດໜ້າທີ່ດຳລົງຕຳແໜ່ງເປັນ ອຸປະທູດປະຈຳສຳນັກງານຜູ້ຕາງໜ້າສະຫະພາບເອີຣົບປະຈຳລາວ ພ້ອມທັງສະແດງຄວາມຂອບໃຈ ແລະ ຕີລາຄາສູງຕໍ່ການຊ່ວຍເຫຼືອຂອງອີຢູແກ່ລາວໃນໄລຍະຜ່ານມາ ໄດ້ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຢູ່ລາວ ເພື່ອໃຫ້ບັນລຸເປົ້າໝາຍ ນຳເອົາປະເທດຫຼຸດພົ້ນອອກຈາກສະຖານະພາບ ປະເທດດ້ອຍພັດທະນາ ໃນປີ 2020 ແລະ ຕອນທ້າຍທ່ານຮອງປະທານປະເທດ ຍັງໄດ້ອວຍພອນໄຊໃຫ້ທ່ານອຸປະທູດອີຢູ ຈົ່ງກັບຄືນປະເທດດ້ວຍຄວາມສະຫວັດດີພາບ ແລະ ປະສົບຜົນສຳເລັດໃນພາລະກິດອັນໃໝ່ຂອງຕົນ.

ໂອກາດດຽວກັນ ທ່ານ Michel Goffin ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຂອງທ່ານຮອງປະທານປະເທດ ພ້ອມທັງຖືໂອກາດນີ້ ສະແດງຄວາມຂອບໃຈຢ່າງຈິງໃຈ ມາຍັງບັນດາການນຳພັກ-ລັດຂອງລາວ ຕະຫຼອດຮອດປະຊາຊົນບັນດາເຜົ່າ ທີ່ໄດ້ໃຫ້ການຮ່ວມມືທີ່ດີ ແລະ ອຳນວຍຄວາມສະດວກທຸກຢ່າງ ຕະຫຼອດໄລຍະການປະຕິບັດໜ້າທີ່ວຽກງານຂອງຕົນ ຈົນໄດ້ຮັບຜົນສຳເລັດຢ່າງໜ້າພໍໃຈ.

================

ພາບແລະຂ່າວຈາກ: Pathedlao Lao