ທ່ານ ບຸນຍັງ ວໍລະຈິດ ປະທານປະເທດ ໄດ້ເດີນທາງຢ້ຽມຢາມ ໂຄງການກໍ່ສ້າງເຂື່ອນໄຟຟ້າ ພະລັງນຳ້ ໄຊຍະບູລີ

ໃນວັນທີ 16 ກຸມພາ 2018 ທ່ານ ບຸນຍັງ ວໍລະຈິດ ເລຂາທິການໃຫ່ຍ ຄະນະບໍລິຫານງານສູນກາງພັກ,ປະທານປະເທດແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ໄດ້ຢ້ຽມຢາມໂຄງການ ກໍ່ສ້າງເຂື່ອນໄຟຟ້າພະລັງງານ-ນຳ້ຂອງ ແຂວງ ໄຊຍະບູລີ ໃຫ້ການຕອບຮັບ,ໂດຍ ທ່ານ ພົງສະຫວັນ ສິດທະວົງ ກຳມະການສູນກາງພັກ,ເລຂາພັກແຂວງ ເຈົ້າແຂວງ ໄຊຍະບູລີ ພ້ອມດ້ວຍການນຳຂອງແຂວງໃຫ້ການຕອບຮັບຢ່າງອົບອຸ່ນ.


ທ່ານ ບຸນຍັງ ວໍລະຈິດ ໄດ້ຮັບຟັງການ ລາຍງານຫຍໍ້ ການກໍ່ສ້າງເຂື່ອນ ຈາກທ່ານ ອານຸພາບ ວົງລະຄອນ ຮອງຜູ້ຈັດການ ບໍລິສັດ ໄຊຍະບູລີພາວເວີ ໂດຍກ່າວວ່າ ການກໍ່ສ້າງ ເຂື່ອນໄຟຟ້າພະລັງນຳ້ໄຊຍະບູລີ ມາຮອດປັດຈຸບັນ ແມ່ນມີຄວາມຄືບໜ້າແລ້ວ 90% ການກໍ່ສ້າງເຂື່ອນໄຟຟ້າພະລັງນຳ້ ໄຊຍະບູລີ ໄດ້ເລີ່ມລົງມືແຕ່ປີ 2012 ແລະ ຮອດປີ 2019 ແມ່ນຈະສຳເລັດ ແລະ ເປີດເຄື່ອງຜະລິດໄຟຟ້າ ຈຳ່ໜ່າຍຂາຍໃຫ້ປະເທດໄທ ແລະຈຳນວນໜຶ່ງ ໃຊ້ໃນປະເທດ ໂຄງການໄຟຟ້າພະລັງ ນຳ້ໄຊຍະບູລີ ມີລັກສະນະເປັນເຂື່ອນນຳ້ໄຫລໂດຍສະເລ່ຍ ການໄຫລຂອງນຳ້ແມ່ນ 4,000 ແມັດກ້ອນຕໍ່ວິນາທີ ມີຄວາມສູງ 28.5 ແມັດ ຄວາມກ້ວາງຂອງສັນເຂື່ອນ 820 ແມັດ ສາມາດຮັບຮອງເຮືອຂົນສົ່ງສິນຄ້າໄດ້ 500 ໂຕນ. ເຂື່ອນດັ່ງກ່າວມີກຳລັງຕິດຕັ້ງໄຟຟ້າ ທັງໝົດ 1,285 ເມກາວັດ ມີ 8 ຊຸດ ໃນນີ້ ມີເຄື່ອງກຳເນີດໄຟຟ້າຂະໜາດ 175 ເມກາວັດ 7 ຊຸດ ສົ່ງໄຟຟ້າຜ່ານລະບົບສາຍສົ່ງ 500 ກິໂລໂວນ ຂາຍໃຫ້ການໄຟຟ້າຜະລິດ ແຫ່ງປະເທດໄທ ແລະເຄື່ອງກຳເນີດໄຟຟ້າ 60 ເມກາວັດຈຳນວນ 1 ຊຸດແມ່ນຈະໄດ້ສົ່ງຜົນ ສາຍສົ່ງ 115 ກິໂລໂວນເພື່ອຮັບໃຊ້ໃນ ສປປ ລາວ.


ລວມມູນຄ່າ ການກໍ່ສ້າງທັງໝົດ 4 ຕື້ໂດລາສະຫາລັດ ສ່ວນປະຊາຊົນທີາຖືກຜົນກະທົບ ທາງບໍລິສັດນອກຈາກ ທົດແທນຜົນເສຍຫາຍແລ້ວຍັງໄດ້ປະກອບອາຊີບໃຫ້ປະຊາຊົນໂດຍການຝຶກ ວິຊາຊີບເຊັ່ນ ການປູກຜັກ ລ້ຽງສັດ ການຈັດສານ-ຫັດຖະກຳ ການແປຮູບ ຜະລິດຕະພັນສິນຄ້າໂອດອບ ການບໍລິການແລະອື່ນໆ ສະເລ່ຍລາຍຮັບໄດ້ 10-15 ລ້ານກີບຕໍ່ຄົວເຮືອນຕໍ່ປີ ຈາກນັ້ນ ທ່ານ ປະທານປະເທດ ພ້ອມດ້ວຍຄະນະ ກໍ່ໄດ້ເຂົ້າຢ້ຽມຢາມ ເບິ່ງໜ້າວຽກການກໍ່ສ້າງຕົວຈິງຢູ່ສັນເຂື່ອນຕື່ມອີກ

ບົດຄວາມໃຫມ່ໆ