ທ່ານ ບຸນຍັງ ວໍລະຈິດ ກ່າວຄຳເຫັນຕໍ່ກອງປະຊຸມຈີ 20


ໃນໂອກາດເຂົ້າຮ່ວມກອງປະຊຸມສຸດຍອດກຸ່ມຈີ 20 ຄັ້ງທີ 11, ຊຶ່ງຈັດຂຶ້ນທີ່ສູູນກາງວາງສະແດງສາກົນ ຫາງໂຈ (HIEC), ເມືອງ ຫາງໂຈ, ແຂວງ ເຊສຽງ, ສປ ຈີນ, ໃນລະຫວ່າງວັນທີ 2-5 ກັນຍາ 2016, ທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ, ໄດ້ປະກອບຄຳເຫັນຢູ່ກອງປະຊຸມ ໃນພາກທີ V ພາຍໃຕ້ຫົວຂໍ້: “ປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບບັນຫາອື່ນໆ ທີ່ມີຜົນກະທົບຕໍ່ເສດຖະກິດໂລກ”, ໃນຕອນ ບ່າຍຂອງວັນທີ 5 ກັນຍາ 2016.
ໃນການກ່າວຄຳເຫັນຄັ້ງນີ້, ໃນນາມລັດຖະບານ ແລະ ປະຊາຊົນ ແຫ່ງ ສປປ ລາວ ແລະ ໃນຖານະປະ ທານໝູນວຽນອາຊຽນປີ 2016, ທ່ານ ບຸນຍັງ ວໍລະຈິດ ໄດ້ສະແດງຄວາມຮູ້ສຶກປິຕິຍິນດີຢ່າງຍິ່ງ ທີ່ໄດ້ຮັບການເຊື້ອເຊີນເຂົ້າຮ່ວມກອງປະຊຸມສຸດຍອດກຸ່ມຈີ 20 ຄັ້ງທີ 11 ໃນຄັ້ງນີ້. ພ້ອມກັນນີ້, ທ່ານ ກໍກ່າວວ່າ ກອງປະຊຸມປະຊຸມຄັ້ງນີ້ ໄດ້ຈັດຂຶ້ນໃນທ່າມກາງທີ່ສະພາບການພາກພື້ນ ແລະ ສາກົນ ຍັງມີຄວາມສັບສົນ, ເສດຖະກິດໂລກຍັງບໍ່ມີຄວາມໝັ້ນທ່ຽງ ເຊັ່ນ: ປະກົດການເໜັງຕີງຂອງລາຄານ້ຳມັນ ແລະ ວັດຖຸດິບ, ບັນຫາການເງິນສີຂຽວ, ການປ່ຽນແປງດິນຟ້າອາກາດ, ການຕ້ານການກໍ່ການຮ້າຍ ແລະ ການເຄື່ອນຍ້າຍຖິ່ນຖານແບບຜິດປົກກະຕິ, ອັນໄດ້ສ້າງຄວາມວິຕົກກັງວົນໃຫ້ວົງຄະນະຍາດສາກົນ ກໍຄືທຸກປະເທດໃນໂລກ. ຕໍ່ບັນຫາດັ່ງກ່າວ, ບັນດາຜູ້ນໍາທີ່ເຂົ້າຮ່ວມກອງປະ ຊຸມຄັ້ງນີ້ຈະຕ້ອງຕັດສິນໃຈສູງ ເພື່ອຮ່ວມມືກັນແກ້ໄຂໃຫ້ໄດ້ ໂດຽການປັບປຸງນະໂຍບາຍເງິນຕາໃຫ້ສອດຄ່ອງ, ປະ ຕິຮູບໂຄງສ້າງເສດຖະກິດແບບໃໝ່ ເພື່ອຊຸກຍູ້ການຈະເລີນເຕີບໂຕ ແລະ ການພັດທະນາຢ່າງທົ່ວເຖິງ, ສົມດູນ, ຍືນຍົງ ແລະ ເຂັ້ມແຂງ.
ນອກຈາກນັ້ນ, ທ່ານປະທານປະເທດ ຍັງໄດ້ກ່າວເຖິງການສ້າງປະຊາຄົມເສດຖະກິດອາຊຽນ ຢູ່ໃນໄລຍະເລີ່ມຕົ້ນ, ຊຶ່ງມີເປົ້າໝາຍກ້າວສູ່ການເຊື່ອມໂຍງພາກພື້ນ,ທັງພະຍາຍາມປະກອບສ່ວນຢ່າງຕັ້ງໜ້າເຂົ້າໃນການແກ້ໄຂວິກິດການຂອງສາກົນ, ເປັນຕົ້ນ ແມ່ນການຮັກສາສະຖຽນລະພາບທາງດ້ານເສດຖະກິດ-ການເງິນ ແລະ ອັດຕາການຂະຫຍາຍຕົວຢ່າງຕໍ່ເນື່ອງ ໃນລະດັບ 4.9% ໃນປີ 2016, ຊຶ່ງໄດ້ສະແດງອອກຢູ່ໃນແຜນປະຕິບັດງານຍຸດທະສາດການເຊື່ອມໂຍງດ້ານການເງິນ-ເງິນຕາ ປີ 2016-2025ຮັບຮອງເອົາໃນກອງປະຊຸມລັດຖະມົນຕີການເງິນ ແລະ ຜູ້ວ່າການທະນາຄານກາງອາຊຽນ ຢູ່ນະຄອນຫລວງວຽງຈັນ ໃນເດືອນ ເມສາ 2016, ໄດ້ສ້າງຕັ້ງຄະນະເຮັດວຽກກ່ຽວກັບການເຂົ້າເຖິງການບໍລິການດ້ານການເງິນຂອງອາຊຽນ ເພື່ອສົ່ງເສີມການພັດທະນາ ແລະ ອຳນວຍໃຫ້ແກ່ການເຕີບໂຕເສດຖະກິດ, ລືບລ້າງຄວາມທຸກຍາກ ແລະຫລຸດຜ່ອນຄວາມແຕກໂຕນດ້ານລາຍຮັບຂອງປະຊາຊົນໃນພາກພື້ນອາຊຽນ. ພ້ອມດຽວກັນນັ້ນ, ອາຊຽນຍັງໃຫ້ຄວາມສຳຄັນຕໍ່ການພົວພັນຮ່ວມມືກັບບັນດາປະເທດເພື່ອນມິດ ທັງຢູ່ພາຍໃນ ແລະ ນອກພາກພື້ນ, ລວມທັງ ກຸ່ມປະເທດ ຈີ 20, ຊຶ່ງເປັນກຳລັງແຮງໃນການຊຸກຍູ້ໃຫ້ອາຊຽນ ສາມາດບັນລຸເປົ້າໝາຍໃນການເຊື່ອມໂຍງເສດຖະກິດ ໃຫ້ກາຍເປັນຕະຫລາດດຽວກັນ ແລະ ພື້ນຖານການຜະລິດນຶ່ງດຽວໃນຕໍ່ໜ້າ.
ທ່ານ ບຸນຍັງ ວໍລະຈິດ ຍັງໄດ້ສະແດງຄວາມຊົມເຊີຍຢ່າງຈິງໃຈ ຕໍ່ຜົນສຳເລັດຂອງກອງປະຊຸມສຸດຍອດຈີ 20 ຄັ້ງທີ 11 ທີ່ປະທານກອງປະຊຸມ ແລະ ບັນດາຜູ້ນຳ ໄດ້ມີຂໍ້ລິເລີ່ມ ແລະ ຮັບຮອງເອົາຫລາຍໆເອກະສານ ຊຶ່ງຈະເປັນພື້ນຖານອັນໜັກແໜ້ນ ໃຫ້ແກ່ການຈະເລີນເຕີບໂຕທາງດ້ານເສດຖະກິດຂອງກຸ່ມ ຈີ 20 ກໍຄືຂອງໂລກ ໃຫ້ມີຄວາມໝັ້ນທ່ຽງ, ໃນນັ້ນ ກໍລວມທັງການເຕີບໂຕທາງດ້ານເສດຖະກິດຂອງອາຊຽນ ແລະ ສະແດງຄວາມຍິນດີຕໍ່ການຮັບຮອງເອົາແຜນປະຕິບັດງານ ວ່າດ້ວຍວາລະ 2030ກ່ຽວກັບການພັດທະນາທີ່ຍືນຍົງ ແລະ ແຜນງານການພັດທະນາການຫັນເປັນອຸດສາຫະກຳຢູ່ ອາຟຣິກກາ ແລະ ປະເທດດ້ອຍພັດທະນາ ຊຶ່ງຈະເປັນທ່າແຮງໃຫ້ແກ່ບັນດາປະເທດກຳລັງພັດທະນາ ແລະ ດ້ອຍພັດທະນາ ໃຫ້ສາມາດກ້າວໄປຕາມທ່າອ່ຽງລວມຂອງໂລກ ໃນຍຸກປະຈຸບັນ. ໃນໂອກາດນີ້, ທ່ານປະທານປະເທດ ສປປ ລາວ, ໃນນາມປະທານໝູນວຽນອາຊຽນ, ກໍໄດ້ແຈ້ງເຖິງການກຽມພ້ອມ ແລະ ຍິນດີຕ້ອນຮັບບັນດາປະມຸກລັດ ແລະ ຫົວໜ້າລັດຖະບານ ຂອງບັນດາປະເທດສະມາຊິກອາຊຽນ ແລະ ຄູ່ເຈລະຈາ ທີ່ຈະເດີນທາງເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 28 ແລະ 29 ເຊິ່ງຈະເປີດຂຶ້ນຢູ່ທີ່ນະຄອນຫລວງວຽງຈັນ, ໃນລະຫວ່າງວັນທີ 6-8 ກັນຍາ 2016 ນີ້.
ໃນຕອນຄໍ່າວັນທີ 5 ກັນຍາ 2016 ນີ້ ທ່ານ ບຸນຍັງ ວໍລະຈິດ, ພ້ອມຄະນະ ກໍໄດ້ເດີນທາງກັບຄືນປະເທດດ້ວຍຄວາມສະຫວັດດີພາບ.

=====================

ພາບແລະຂ່າວ: Pathedlao Lao