ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໃຫ້ຄວາມສຳຄັນ ວັນເດັກນ້ອຍສາກົນ ວັນທີ 1 ມີຖຸນາ 2018

ໃນບັນຍາກາດ ທີ່ບັນດາປະຊາຊາດ ພວມສະເຫຼີມສະຫຼອງວັນເດັກສາກົນ ເພື່ອປົກປ້ອງ ແລະ ສົ່ງເສີມເດັກໃນທົ່ວໂລກ,ພວກເຮົາພ້ອມກັນສະເຫຼີມສະຫຼອງວັນເດັກນ້ອຍສາກົນ ວັນທີ 1 ມີຖຸນາ 2018 ຢ່າງເປັນຂະບວນຟົດຟື້ນ.ທຸກໆປີບັນດາ ພັກ ແລະ ລັດຖະບານຂອງພວກເຮົາ ກໍ່ໄດ້ມີໂອກາດຮ່ວມວັນສຳຄັນນີ້ ເພື່ອທົບທວນຄືນການຈັດຕັ້ງປະຕິບັດຕາມແນວທາງນະໂຍບາຍຂອງພັກ ແລະ ລັດເຮົາທີ່ມີຕໍ່ເດັກ ກໍ່ຄືພັນທະສາກົນ

ພາກພື້ນໃນວຽກສິດທິຂອງເດັກໂດຍສະເພາະໃນວຽກປ້ອງກັນ ລົບລ້າງການໃຊ້ຄວາມຮຸນແຮງຕໍ່ເດັກ ເພື່ອຮັບປະກັນການຢູ່ລອດ,ການພັດທະນາ,ການປົກປ້ອງ ແລະ ມີສ່ວນຮ່ວມຂອງເດັກນ້ອຍລາວບັນດາເຜົ່າໃຫ້ມີຄວາມຜາສຸກ ໄດ້ຮັບຄວາມຮັກອັນອົບອຸ່ນເບີ່ງແຍງເອົາໃຈໃສ່ເປັນຢ່າງດີ ຈາກພໍ່ແມ່,ຄອບຄົວ,ສັງຄົມ ແລະ ການຈັດຕັ້ງທຸກຂັ້ນ.  ເພື່ອຄວາມຮັບຮູ້ ແລະເຂົ້າໃຈຂອງສັງຄົມທີ່ເຫັນວ່າມີບົດບາດສຳຄັນໃນຊີວິດ ເຊີ່ງນອກຈາກເດັກຍັງເປັນຕົວແທນຂອງການປ່ຽນແປງ ສຶບທອດການພັດທະນາ ແລະ ການສ້າງສາປະເທດໃນອະນາຄົດຢ່າງໝັ້ນຄົງ ເພາະຄວາມສຳຄັນແຕ່ລະປີ ພັກ ແລະ ລັດຖະບານໄດ້ຖືໂອກາດວັນເດັກນ້ອຍສາກົນ ເພື່ອສະເຫຼີມສະຫຼອງວັນເດັກເປັນການປູກຈິດສຳນຶກໃຫ້ທົ່ວປວງຊົນລະນຶກເຖີງຄວາມສຳຄັນຂອງເດັກຍົກສູງຄວາມຮັບຜິດຊອບຂອງຕົນ ແລະ ການມີສ່ວນຮ່ວມຂອງເດັກນ້ອຍ ທີ່ເປັນລູກຫຼານຂອງພວກເຮົາ ໃຫ້ມີໄວເດັກທີ່ສົດໃສ ເພື່ອກ້າວເປັນຜູ້ໃຫຍ່ທີ່ມີອະນາຄົດຂອງຊາດ .ຂ້າພະເຈົ້າຂໍອວຍພອນໄຊ ໃຫ້ການສະເຫຼີມສະຫຼອງວັນເດັກນ້ອຍສາກົນນີ້ ໃຫ້ມີຄວາມສຳເລັດ ແລະ ສຸກກາຍສຸກໃຈ ທຸກພາກສ່ວນ.