ທ່ານຮູ້ບໍ!! ຕໍາແໜ່ງບໍລິຫານຂອງພະນັກງານການນຳລະດັບສູງມີ ຈັກຊັ້ນ ແລະ ປະກອບມີຈັກ ຂັ້ນ? ກົດອ່ານເລີຍທີ່ນີ້ມີຄຳຕອບ

ຫຼາຍທ່ານໆທີ່ເປັນພະນັກງານມາຫຼາຍປີ ຫຼື ຍັງບໍ່ທັນໄດ້ເປັນພະນັກງານກໍ່ດີ ຄົງຈະມີຄວາມສົງໄສ ແລະ ຂ້ອງໃຈຢູ່ບໍ່ນ້ອຍກ່ຽວກັບ ລະບຽບການຈັດແບ່ງຕໍາແໜ່ງບໍລິຫານຂອງຜູ້ນຳລະດັບສູງ ແລະ ພະນັກງານລັດຖະກອນໃນ ສປປ ລາວ ວ່າເພີ່ນມີການຈັດແບ່ງກັນຄືແນວໃດ?

ມື້ນີ້, ພວກເຮົາຈະມານຳສະເໜີ ຕໍາແໜ່ງບໍລິຫານຂອງຜູ້ນຳລະດັບສູງໃນ ສປປ ລາວ ເຊິ່ງມີການແບ່ງຊັ້ນ ແລະ ຂັ້ນແຕກຕ່າງກັນຄືແນວໃດ?

ໂດຍອີງຕາມດໍາລັດ ຂອງລັດຖະບານ ເລກທີ 203/ລບ, ລົງວັນທີ 4 ກໍລະກົດ 2017 ວ່າດ້ວຍຕໍາແໜ່ງບໍລິຫານຂອງພະນັກງານ-ລັດຖະກອນ ໄດ້ບັນລຸໄວ້ໃນມາດຕາ 4 ຕໍາແໜ່ງບໍລິຫານຂອງພະນັກງານການນຳລະດັບສູງແມ່ນຈັດຢູ່ຊັ້ນ 6 ແລະ ປະກອບມີ 7 ຂັ້ນດັ່ງນີ້:

ຊັ້ນ 6 ຂັ້ນ 7 ແມ່ນ: ປະທານປະເທດ ຄວບຕຳແໜ່ງເລຂາທິການໃຫຍ່,ຊັ້ນ 6 ຂັ້ນ 6 ແມ່ນ:ປະທານປະເທດ ແລະ ເລຂາທິການໃຫຍ່,ຊັ້ນ 6 ຂັ້ນ 5 ແມ່ນ:​ ປະທານສະພາແຫ່ງຊາດ, ນາຍົກລັດຖະມົນຕີ ແລະ ຮອງປະທານປະເທດ.

ຊັ້ນ 6 ຂັ້ນ 4 ແມ່ນ: ກຳມະການກົມການເມືອງສູນກາງພັກ; ຊັ້ນ 6 ຂັ້ນ 3 ແມ່ນ: ເລຂາທິການສູນກາງພັກ, ຮອງປະທານສະພາແຫ່ງຊາດ ແລະ ຮອງນາຍົກລັດຖະມົນຕີ.

ຊັ້ນ 6 ຂັ້ນ 2 ແມ່ນ: ກຳມະການສູນກາງພັກ, ຫົວໜ້າຄະນະຂອງພັກ, ປະທານສູນກາງແນວລາວສ້າງຊາດ, ລັດຖະມົນຕີກະຊວງ ແລະ ຫົວໜ້າອົງການທຽບເທົ່າກະຊວງ, ລັດຖະມົນຕີປະຈຳສຳນັກງານ ນາຍົກລັດຖະມົນຕີ, ລັດຖະມົນຕີ ຫົວໜ້າຫ້ອງວ່າການ ສຳນັກງານນາຍົກລັດຖະມົນຕີ, ປະທານ ຫຼື ເລຂາອົງການຈັດຕັ້ງມະຫາຊົນຂັ້ນສູນກາງ ຫຼື ທຽບເທົ່າ, ປະທານສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດ, ປະທານອົງການກວດກາລັດຖະບານ; ປະທານອົງການກວດສອບແຫ່ງລັດ, ຜູ້ວ່າການທະນາຄານແຫ່ງ ສປປ ລາວ, ປະທານກຳມາທິການສະພາແຫ່ງຊາດ, ເລຂາທິການສະພາແຫ່ງຊາດ, ຫົວໜ້າຫ້ອງວ່າການສຳນັກງານປະທານປະເທດ, ເລຂາຄະນະພັກນະຄອນຫຼວງ, ເລຂາຄະນະພັກແຂວງ, ເຈົ້າຄອງນະຄອນຫຼວງ, ເຈົ້າແຂວງ ແລະ ຕໍາແໜ່ງອື່ນ ທຽບເທົ່າຕຳແໜ່ງບໍລິຫານດັ່ງກ່າວ ທີ່ໄດ້ກຳນົດໃນກົດໝາຍ ແລະ ລະບຽບການ.

ຊັ້ນ 6 ຂັ້ນ 1 ແມ່ນ: ກຳມະການສຳຮອງສູນກາງພັກ, ຮອງຫົວໜ້າຄະນະຂອງພັກ, ຮອງປະທານສູນກາງແນວລາວສ້າງຊາດ, ຮອງລັດຖະມົນຕີ ແລະ ຮອງຫົວໜ້າອົງການທຽບເທົ່າກະຊວງ, ຮອງລັດຖະມົນຕີປະຈຳນັກງານນາຍົກລັດຖະມົນຕີ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງປະທານ ຫຼື ຮອງເລຂາອົງການຈັດຕັ້ງມະຫາຊົນຂັ້ນສູນກາງ ຫຼື ທຽບເທົ່າ, ຮອງປະທານສານປະຊາຊົນສູງສຸດ, ຮອງຫົວໜ້າອົງການໄອຍະການປະຊາຊົນສູງສຸດ, ຮອງປະທານອົງການກວດກາລັດຖະບານ, ຮອງປະທານອົງການກວດສອບແຫ່ງລັດ, ຮອງຜູ້ວ່າການທະນາຄານແຫ່ງ ສປປ ລາວ, ຮອງປະທານກຳມາທິການສະພາແຫ່ງຊາດ, ຮອງເລຂາທິການສະພາແຫ່ງຊາດ, ຮອງຫົວໜ້າຫ້ອງວ່າການສຳນັກງານປະທານປະເທດ, ຫົວໜ້າທະບວງ, ຫົວໜ້າອົງການທຽບເທົ່າທະບວງ, ອະທິການບໍດີມະຫາວິທະຍາໄລ, ປະທານສະພາປະຊາຊົນ ຂັ້ນແຂວງ, ຮອງເລຂາຄະນະພັກນະຄອນຫຼວງ, ຮອງເລຂາຄະນະພັກແຂວງ, ຮອງເຈົ້າຄອງນະຄອນຫຼວງ, ຮອງເຈົ້າແຂວງ ແລະ ຕໍາແໜ່ງອື່ນ ທຽບເທົ່າຕຳແໜ່ງບໍລິຫານດັ່ງກ່າວ ທີ່ໄດ້ກຳນົດໄວ້ໃນກົດໝາຍ ແລະ ລະບຽບການ.

ນອກຈາກ, ມີການແບ່ງຊັ້ນ ແລະ ຂັ້ນບໍລິຫານສຳລັບພະນັກງານການນຳລະດັບສູງແລ້ວ ດຳລັດສະບັບດັ່ງກ່າວຍັງມີຫຼາຍໆເລື່ອງທີ່ໜ້າສົນໃຈ, ເຊິ່ງທີມງານພວກເຮົາຈະນໍາສະເໜີໃຫ້ທ່ານຜູ້ອ່ານໄດ້ຮູ້ໃນຕໍ່ໄປ.