ທ່ານຮອງປະທານປະເທດ ຕ້ອນຮັບທູດກູເວດເຂົ້າອຳລາ

ທ່ານ ບຸນ​ຍັງ ວໍລະ​ຈິດ ຮອງປະທານ​ປະເທດ ໄດ້​ຕ້ອນຮັບ​ການເຂົ້າ​ຢ້ຽມ​ຄຳນັບ​ອຳ​ລາ​ຂອງທ່ານ Nabeel Al Dakhee ເອກ​ອັກ​ຄະ​ລັດ​ຖະ​ທູດ​ວິສາມັນ ​ຜູ້​ມີ​ອຳນາດ​ເຕັມ​ແຫ່ງ​ລັດ​ກູ​ເວດ ປະຈຳ ​ສປປ ລາວ ໃນ​ວັນ​ທີ 28 ກັນຍາ 2015 ຢູ່​ທຳ​ນຽບ​ປະທານ​ປະເທດ ເນື່ອງໃນ​ໂອກາດ​ທີ່​ທ່ານ​ຈະ​ສຳເລັດ​ ການ​ປະຕິບັດ​ໜ້າທີ່​ການ​ທູດ​ປະຈຳ ​ສປປ ລາວ ໃນ​ທ້າຍ​ເດືອນຕຸລາ 2015 ນີ້.

ໂອກາດ​ນີ້ ທ່ານ​ຮອງ​ປະທານປະເທດ ໄດ້​ຕີ​ລາຄາ​ສູງ​ຕໍ່​ຜົນ​ສຳເລັດ ​ໃນ​ການ​ປະຕິບັດ​ໜ້າທີ່​ການທູດ​ປະຈຳ​ລາວ​ຂອງ​ທ່ານ Nabeel Al Dakhee ເຊິ່ງ​ໃນ​ໄລຍະ​ທີ່​ປະຕິບັດ​ໜ້າທີ່​ຢູ່​ລາວ ທ່ານ​ເອງ​ໄດ້​ປະກອບສ່ວນ​ຢ່າງ​ຫ້າວຫັນ​ ເຂົ້າ​ໃນ​ການ​ຊຸກຍູ້​ເສີມ​ຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ລະຫວ່າງ​ສອງ​ປະເທດ ລາວ-ກູ​ເວດ ໃຫ້​ກ້າວ​ເຂົ້າ​ສູ່​ລວງເລິກ​ອີກ​ບາດກ້າວ​ໜຶ່ງ ເຊິ່ງ​ໄດ້ປະກອບສ່ວນ​ສຳຄັນ​ ໃຫ້ການ​ພັດທະ​ນາ​ເສດຖະກິດ-ສັງຄົມຂອງລາວ​ເປັນ​ຢ່າງ​ດີ ໂດຍ​ສະເພາະ ການ​ໃຫ້​ທຶນ​ກູ້​ຢືມ​ດອກ​ເບ້ຍ​ຕ່ຳແກ່​ໂຄງການ​ຕ່າງໆ ແລະ ຕອນທ້າຍ​ທ່ານ​ຮອງ​ປະທານ​ປະເທດ ຍັງ​ໄດ້​ອວຍພອນ​ໃຫ້​ທ່ານ​ທູດ ​ຈົ່ງມີ​ສຸຂະພາບ​ເຂັ້ມແຂງ ປະສົບ​ຜົນສຳເລັດ​ໃນ​ໜ້າທີ່​ວຽກ​ງານ​ໃໝ່ຂອງ​ທ່ານ ພ້ອມ​ທັງ​ເດີນທາງກັບ​ຄືນ​ປະເທດ​ດ້ວຍ​ຄວາມ​ສະຫວັດ​ດີ​ພາບ.

ຕອນ​ທ້າຍ​ທ່ານ Nabeel Al Dakhee ໄດ້​ສະແດງ​ຄວາມ​ຂອບໃຈ​ຕໍ່​ການ​ຕ້ອນຮັບ​ອັນ​ອົບ​ອຸ່ນ ຂອງ​ທ່ານ​ຮອງ​ປະທານ​ປະເທດ ພ້ອມ​ທັງ​ສະແດງ​ຄວາມ​ຂອບໃຈ​ຢ່າງ​ຈິງ​ໃຈ​ ມາ​ຍັງ​ບັນດາ​ການ​ນຳພັກ-ລັດ ຕະຫຼອດ​ຮອດ​ປະຊາຊົນ​ລາວ​ບັນດາເຜົ່າ​ ທີ່​ໄດ້​ໃຫ້ການ​ສະໜັບສະໜູນຮ່ວມ​ມື​ ແລະ ອໍານວຍ​ຄວາມ​ສະດວກ​ທຸກ​ຢ່າງ​ ຕະຫຼອດ​ໄລຍະ​ການ​ປະຕິບັດ​ໜ້າທີ່​ຂອງ​ຕົນ​ຢູ່​ລາວ​ຄັ້ງ​ນີ້​ຕື່ມ​ອີກ.

ທີ່ມາ  http://www.vientianemai.net