ທ່ານຮອງນາຍົກ ຕ້ອນຮັບຄະນະຜູ້ແທນອົງການ UNFPA

   ວັນ​ທີ 14 ກັນຍາ 2015 ທີ່ກະຊວງ​ສຶກ​ສາ​ທິ​ການ ແລະ ກີລາ ທ່ານ ພັນ​ຄຳ ວິພາ​ວັນ ຮອງນາຍົກລັດຖະມົນຕີ ລັດຖະມົນຕີ ວ່າການ​ກະຊວງ​ສຶກ​ສາ​ທິ​ການ ແລະ ກີລາ ໄດ້​ຕ້ອນຮັບ​ການ​ເຂົ້າຢ້ຽມ​ຄຳນັບ​ຂອງ​ທ່ານ​ນາງ Kate Gilmore ຜູ້​ຊ່ວຍ​ເລຂາທິ ການໃຫຍ່​ອົງການ ​ສປຊ ຮອງ​ອຳນວຍ​ການ​ໃຫຍ່ ອົງການ UNFPA ແລະ ທ່ານ​ນາງ ໂຢ​ຣິ​ໂກະ ຢາ​ສຸກາ​ວາ ຜູ້ອຳນວຍການ​ອົງ ການ UNFPA ປະຈຳ​ພາກ​ພື້ນ​ອາຊີ-ປາ​ຊີ​ຟິກ ພ້ອມ​ດ້ວຍ​ຄະນະ ເນື່ອງໃນ​ໂອກາດ​ທີ່​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່​ລາວ ລະຫວ່າງ​ວັນ​ທີ 14-15 ກັນຍາ 2015 ເພື່ອ​ຕິດຕາມ​ວຽກ​ງານການ​ຮ່ວມ​ມື ແລະ ປືກ​ສາ​ຫາລືແຜນການ​ຮ່ວມ​ມື​ໃນຕໍ່ ໜ້າ ລະຫວ່າງ ​ສປປ ລາວ ແລະ ອົງການ UNFPA.

   ໂອກາດ​ດັ່ງກ່າວ ທ່ານ​ຮອງນາຍົກລັດຖະມົນຕີກໍ່​ໄດ້​ໃຫ້ການຕ້ອນຮັບ​ຢ່າງ​ອົບ​ອຸ່ນ ພ້ອມ​ທັງ​ຕີລາຄາ​ສູງ​ຕໍ່​ການ​ມາ​ຢ້ຽມຢາມ ແລະ ເຮັດ​ວຽກ​ຢູ່​ລາວ​ຂອງ​ທ່ານນາງ Kate Gilmore ໃນ​ຄັ້ງ​ນີ້ ໄດ້​ປະກອບສ່ວນ​ຢ່າງ​ຫ້າວຫັນ​ໃນການ​ຊຸກຍູ້-ສົ່ງເສີມ​ການ​ພົວພັນ ແລະ ການ​ຮ່ວມ​ມື​ລະຫວ່າງ​ລັດຖະ​ບານ ​ສປປ ລາວ ແລະ ອົງການ UNFPA ກໍ່​ຄື​ການ​ຊ່ວຍເຫຼືອ ແລະ ໃຫ້ການ​ສະໜັບສະໜູນດ້ານ​ຕ່າງໆ​ຂອງ​ອົງການ UNFPA ໃຫ້​ແກ່ ​ສປປ ລາວ ໃນການ​ພັດທະນາ​ເສດຖະກິດ-ສັງຄົມ ໂດຍ​ສະເພາະ​ແມ່ນ​ ໃນ​ວຽກງານ​ການ​ພັດທະນາ​ຊັບ​ພະຍາກອນ​ມະນຸດ ແລະ ຂົງເຂດ​ຂະແໜງ​ການ​ການ​ສຶກ​ສາ​ ໃຫ້​ມີການ​ຂະຫຍາຍຕົວ ແລະ ກ້າວເຂົ້າ​ສູ່​ລວງ​ເລິກ​ຍິ່ງ​ຂຶ້ນ ໃນ​ຕອນທ້າຍ​ທ່ານ​ຮອງ​ນາຍົກ​ລັດ​ຖະ​ມົນຕີ ຍັງ​ໄດ້​ອວຍພອນ​ໄຊ​ໃຫ້​ທ່ານນາງ Kate Gilmore ພ້ອມ​ດ້ວຍຄະນະ ​ຈົ່ງ​ມີ​ສຸຂະພາບ​ເຂັ້ມແຂງຈົ່ງ​ປະສົບ​ຜົນສຳເລັດ ໃນ​ການມາ​ປະຕິບັດ​ໜ້າທີ່​ວຽກ​ງານ​ຢູ່ລາວ​ຄັ້ງ​ນີ້.

   ໂອກາດ​ດຽວ​ກັນ ທ່ານ​ນາງ Kate Gilmore ກໍ່​ໄດ້​ສະແດງຄວາມ​ຂອບໃຈ ຕໍ່​ການ​ຕ້ອນຮັບອັນ​ອົບ​ອຸ່ນ​ຂອງ​ທ່ານ​ຮອງ​ນາຍົກ ລັດຖະມົນຕີ ພ້ອມ​ທັງ​ໄດ້​ແຈ້ງຈຸດປະສົງ​ໃນ​ການ​ເດີນທາງ​ມາເຮັດ​ວຽກ​ຢູ່ ​ສປປ ລາວ ກໍ່​ຄືການພົວພັນ ແລະ ຮ່ວມ​ມືລະ ຫວ່າງລັດຖະບານລາວ ແລະ ອົງການ UNFPA ໃຫ້​ມີ​ການ​ຂະ​ຫາຍ​ຕົວດີ​ຂຶ້ນ​ເລື້ອຍໆ.

   ຂ່າວ​ແຈ້ງ​ຕື່ມ​ວ່າ: ວັນ​ທີ 15 ກັນຍາ 2015 ທ່ານ ​ສຈ.​ດຣ. ເອກ​ສະຫວ່າງ ວົງ​ວິຈິດ ລັດ​ຖະມົນຕີ​ວ່າການ​ກະຊວງ​ສາ​ທາ​ລະ ນະ​ສຸກ ໄດ້​ຕ້ອນຮັບ​ການ​ເຂົ້າ​ຢ້ຽມຄຳນັບ​ຂອງ​ທ່ານ​ນາງ ໂຢ​ຣິ​ໂກະ ຢາ​ສຸ​ກາ​ວະ (Yoriko Yasukawa) ຜູ້ອຳນວຍການ​ອົງການ ສະ ຫະ​ປະຊາ​ຊາດ ກອງ​ທຶນ​ສຳລັບ​ປະຊາກອນ UNFPA ປະຈຳພາກ​ພື້ນ​ອາຊີ​ປາ​ຊີ​ຟິກ ທ່ານ​ນາງ ເຄດ ກິວ​ມໍ (Kate Gilmore) ຜູ້​ຊ່ວຍ​ເລຂາທິການ​ໃຫຍ່​ອົງການ​ສະຫະ​ປະຊາ​ຊາດ ທັງ​ເປັນຮອງ​ອຳນວຍ​ການ​ຂອງ​ອົງການ UNFPA ພ້ອມ​ດ້ວຍ​ຄະນະ ໃນ​ໂອກາດ​ທີ່​ມາ​ຢ້ຽມຢາມ ແລະ ເຮັດວຽກ​ຢູ່ ​ສປປ ລາວ.

ທີ່ມາ  www.vientianemai.net