ທ່ານສັນຕິພາບ ພົມວິຫານ ລົງຢ້ຽມຢາມເຂດການຜະລິດບ້ານປົ່ງນາ

ໃນວັນທີ 8 ກັນຍາ 2015 ນີ້, ທ່ານ ສັນຕິພາບ ພົມວິຫານ ຮອງເຈົ້າແຂວງໆສະຫວັນນະເຂດ ພ້ອມຄະນະ ໄດ້ລົງຕິດຕາມ ແລະ ຢ້ຽມຢາມການຜະລິດຂອງປະຊາຊົນບ້ານປົ່ງນາ ເມືອງອາດສະພັງທອງ ໂດຍມີທ່ານ ລຳທອງ ຂອບສີລາວົງ ເລຂາພັກເມືອງ, ເຈົ້າເມືອງໆອາດສະພັງທອງ ພ້ອມດ້ວຍພະນັກງານຫຼັກແຫຼ່ງຂອງເມືອງເປັນຜູ້ນຳໜ້າພາທາງໃນຄັ້ງນີ້ດວຍ. 


ທ່ານ ບຸນກວ້າງ ແກ້ວວົງສັກ ນາຍບ້ານປົ່ງນາ ໄດ້ລາຍໃຫ້ຮູ້ວ່າ: ບ້ານປົ່ງນາຕັ້ງຫ່າງຈາກເທສະບານເມືອງອາດສະພັງທອງປະມານ 7 ກິໂລແມັດ, ປະກອບມີ 78 ຫຼັງຄາເຮືອນ, 96 ຄອບຄົວ, ມີພົນລະເມືອງທັງໝົດ 531 ຄົນ, ປະກອບອາຊີບເຮັດນາ, ປູກຝັງ ແລະ ລ້ຽງສັດເປັນຕົ້ນຕໍ ເພື່ອສ້າງລາຍຮັບໃຫ້ແຕ່ລະຄອບຄົວ, ບ້ານມີເສັ້ນທາງທຽວໄດ້ຕະຫຼອດ 2 ລະດູ, ມີໄຟຟ້າໃຊ້ທຸກຫຼັງຄາເຮືອນ, ໃຊ້ນ້ຳສະອາດ, ນ້ຳບາດານກວມເອົາ 80%, ບ້ານມີເນື້ອທີ່ນາປີ 280 ເຮັກຕາ, ນາແຊງ 3,5 ເຮັກຕາ, ໃນການຜະລິດປະຊາຊົນໄດ້ໃຊ້ຝຸ່ນຄອກເປັນພື້ນຖານກັບຝຸ່ນວິທະຍາສາດຢ່າງກວ້າງຂວາງ ສະເລ່ຍສະມັດຕະພາບການຜະລິດໄດ້ 2 ໂຕນ/ເຮັກຕາ, ສະເລ່ຍໃສ່ພົນລະ ເມືອງບ້ານຜູ້ໜຶ່ງໄດ້ 1.057 ກິໂລຕໍ່ຄົນ. ການປູກພືດລະດູແລ້ງໃຫ້ກາຍເປັນສິນຄ້າກໍ່ໄດ້ມີຄວາມພົ້ນເດັ່ນ ສາມາດສົ່ງຂາຍພາຍໃນຕະຫຼາດຕົວເມືອງອາດສະພັງທອງ ແລະ ຍັງຂາຍໄປຕະຫຼາດເມືອງອື່ນໆອີີກ. ພິເສດປະຊາຊົນພາຍໃນບ້ານກໍ່ຍັງສາມາດຜະລິດແນວພັນເຂົ້າຂາຍ ຊຶ່ງລວມມີເນື້ອທີ່ການຜະລິດຈຳນວນ 23 ເຮັກຕາ ສະເພາະໃນປີນີ້ຂາຍໄດ້ແລ້ວກວ່າ 7 ໂຕນ ເຊິ່ງຖ້າຫາກວ່າຄວາມຕ້ອງການຂອງຕະຫຼາດເພີ່ມຂຶ້ນກໍ່ສາມາດຕອບສະໜອງໄດ້ເຖິງ 30-40 ໂຕນ. ຈາກສະພາບການຜະລິດຄືດັ່ງກ່າວ ຈິ່ງເກີດມີຄອບຄົວຕົວແບບໃນການຜະລິດປູກພືດລະດູແລ້ງ 5 ຄອບຄົວ, ມີລາຍຮັບ 10-15 ລ້ານກີບຕໍ່ປີ, ຄອບຄົວຕົວແບບໃນການປູກເຂົ້າ 3 ຄອບຄົວ, ມີລາຍຮັບນັບແຕ່ 15-30 ລ້ານກີບ, ຄອບຄົວຕົວແບບລ້ຽງສັດ 3 ຄອບຄົວ, ມີລາຍຮັບນັບແຕ່ 10-15 ລ້ານກີບ, ພາຍໃນບ້ານມີຊົນລະປະທານຂະໜາດນ້ອຍ 1 ແຫ່ງ, ຕິດຕັ້ງປັ່ນນ້ຳດ້ວຍລະບົບໄຟຟ້າໃຊ້ເຄື່ອງຈັກສູບນ້ຳຈຳນວນ 2 ເຄື່ອງ, ສູບນ້ຳຈາກຫ້ວຍແຈລະມ໋ອງ ເພື່ອທຳການປູກພືດລະດູແລ້ງ ທີ່ມີເນື້ອທີ່ 6 ເຮັກຕາ, ເພື່ອເຮັດໃຫ້ປະຊາຊົນມີລາຍຮັບເພີ່ມຂຶ້ນຢ່າງຫຼວງຫຼາຍ. ຄຽງຄູ່ກັນນີ້ ທາງບ້ານປົ່ງນາ ກໍ່ໄດ້ຮຽກຮ້ອງໃຫ້ທາງການນຳພັກ-ລັດ ຊ່ວຍແກ້ໄຂໃນການຍົກລະດັບຂົວຈົມ ແລະ ການດຶງໄຟຈາກໄລກະທະ+ການຕິດຕັ້ງຈັກດູດນ້ຳ ເພື່ອຮັບໃຊ້ການຜະລິດໃນລະດູແລ້ງ ໃຫ້ພຽງພໍ.


ໂອກາດນີ້, ທ່ານ ສັນຕິພາບ ພົມວິຫານ ກໍ່ໄດ້ມີການແລກປ່ຽນບົດຮຽນ ພ້ອມທັງໂອ້ລົມກັບພໍ່ແມ່ປະຊາຊົນຢ່າງເປັນກັນເອງ ໃນນີ້ທ່ານໄດ້ເນັ້ນໃຫ້ອຳນາດການປົກຄອງ ແລະ ພໍ່ແມ່ປະຊາຊົນພາຍໃນບ້ານປົ່ງນາ ຈົ່ງໄດ້ເອົາໃຈໃສ່ໃນການຮັກສາມູນເຊື້ອອັນດີງາມທີ່ທາງບ້ານຍາດມາໄດ້ໃນໄລຍະຜ່ານມາ ກໍ່ຄືມູນເຊື້ອຄວາມດຸໝັ່ນໃນການທຳການຜະລິດໃຫ້ກາຍເປັນສິນຄ້າຫຼາຍຂຶ້ນ ໂດຍໜູນໃຊ້ບັນດາທ່າແຮງຕ່າງໆທີ່ມີພາຍໃນບ້ານໃຫ້ເກີດປະໂຫຍດສູງສຸດ ທັງນີ້ກໍ່ເພື່ອນຳເອົາບ້ານເຮົາກາຍເປັນບ້ານພັດທະນາ, ປະຊາຊົນມີຄວາມຢູ່ດີກິນດີເທື່ອລະກ້າວ. ໂອກາດຽວກັນ ທ່ານຮອງເຈົ້າແຂວງສະຫວັນນະເຂດ ຍັງໄດ້ມອບອຸປະກອນການສຶກສາ ແລະ ກິລາແກ່ບ້ານປົ່ງນານຳອີກ. 


ຫຼັງຈາກນັ້ນ ກໍ່ໄດ້ລົງເບິ່ງຂົວຈົມຫ້ວຍແຈລະມ໋ອງ ທີ່ທາງປະຊາຮຽກຮ້ອງໃຫ້ຍົກລະດັບໃຫ້ສູງກວ່າເກົ່າ,ລົງຢ້ຽມຢາມເຂດການກໍ່ສ້າງວັດປ່າ ແລະ ຈຸດການຜະລິດແນວພັນເຂົ້າຂອງບ້ານປົ່ງນາ. ຈາກນັ້ນ ກໍ່ໄດ້ລົງຢ້ຽມຢາມກຸ່ມປູກຜັກອິນຊີຂອງບ້ານຫົວເມືອງ ຂອງເມືອງອາດສະພັງທອງນຳອີກ

ທີ່ມາ Savanhphuttana News