ທ່ານນາງ Clinton ສັນຍາວ່າ ຈະວາງ ມາດຕະການ ລົງໂທດ ຕໍ່ອີຣ່ານ ຖ້າລະເມີດ ສັນຍາ

ຜູ້​ສະ​ໝັກ​ຮັບ​ເລືອກ​ຕັ້ງ​ ປະທານາທິບໍດີ ຂອງ​ພັກ​ເດ​ໂມແຄຣັດ ທ່ານ​ນາງ Hilary Clinton ​ໄດ້​ກ່າວ​ໃນ​ພຸດ​ວານ​ນີ້​ວ່າ, ​ຖ້າ​ຫາກ​ທ່ານ​ນາງ​ໄດ້​ຖືກ​ເລືອກ​, ທ່ານນາງ​ຈະ​ວາງ​ມາດ​ຕະການ​ລົງ​ໂທດ​ຕໍ່ອີ​ຣ່ານ ແມ່ນ

ແຕ່​ການລະ​ເມີ​ດພຽງ​ແຕ່​ໜ້ອຍ​ດຽວຕໍ່ຂໍ້​ຕົກລົງ​ນິວ​ເຄລຍ ​ແລະ “ຈະ​ບໍ່​ລັງ​ເລ​ໃຈ” ຕໍ່ການ ເອົາມາດຕະ​ການ​ທາງ​ທະຫານຖ້າ​ເທເຮຣ່ານ ຫາກ​ພະຍາຍາມ​ທີ່ຈະ ຊອກຫາຊ່ອງທາງ ເພື່ອໃຫ້ມີອາວຸດນິວ​ເຄລຍ ຢູ່ໃນຄວາມຄອບຄອງ

ການ​ກະທຳ​ດັ່ງກ່າວ​ນັ້ນປະກົດ​ວ່າ​ຈະກ້າວ​ໄປ​ໄກ​ກວ່າ ທ່າ​ນ ບາຣັກ ​ໂອ​ບາ​ມາ, ​ເຊິ່ງ​ໄດ້​ປະຕິຍານ​ຢ່າງ​ຊ້ຳ​ແລ້ວ​ຊ້ຳ​ອີກ​ວ່າ ທາງ​ເລືອກ​ການ​ໃຊ້ກຳລັງ ທະຫານ​ແມ່ນ​ຍັງຄົງ​ຢູ່​ເທິງ​ໜ້າ​ໂຕະ ຖ້າ ​ອີຣ່ານ ບໍ່​ປະ​ຕິ​ບັດ​ຕາມ​ສັນຍາ.

ອະດີດ​ລັດຖະ​ມົນ​ຕີ​ການ​ຕ່າງປະ​ເທດ ທ່ານ​ນາງ Clinton ​ໄດ້​ກ່າວ​ໃນ​ການ​ໃຫ້​ຄຳ​ປາ​ໄສ​ ທີ່​ສະ​ຖາ​ບັນ Brookings, ອົງການ​ກາ​ນຄົ້ນຄວ້າທີ່ ນະຄ​ອນຫຼວງວໍ​ຊິງ​ຕັນ ວ່າ “ພວກ​ເຮົາ​ຄວນ​ຄາດໝາຍ​ລ່ວງ​ໜ້າ​ວ່າ ອີຣ່ານ ຈະ​ທົດ​ສອບປະທານາທິບໍດີ​ຄົນ​ຕໍ່​ໄປ. ພວກ​ເຂົາ​ຢາກ​ເຫັນ​ວ່າ​ພວກ​ເຂົາ​ຈະ​ສາມາດ​ປ່ຽນ​ທິດ​ທາງ​ຂອງ​ກົດ​ລະບຽບ​ໄດ້​ຫຼາຍ​ສ່ຳ​ໃດ.”

ທ່ານ​ນາງ​ກ່າວຕື່ມ​ວ່າ “ຂ້າພະ​ເຈົ້າ​ຈະ​ເປັນ​ຄົນ​ປ້ອງ​ກັນ​ເສັ້ນໝາຍ ​ຕໍ່​ການບໍ່​ຍິນ​ຍອມ​ເຮັດ​ຕາມ​ສັນຍາຂອງ ອີຣ່ານ.”

ໃນການ​ກ່າວ​ເພື່ອ​ປ້ອງ​ກັນ​ຂໍ້​ຕົກລົງ​ທີ່​ໄດ້​ທຳ​ການ​ເຈລະຈາ​ໂດຍສະຫະ ລັດ ​ແລະ ຫ້າ​ປະ​ເທດ​ມະຫາ​ອຳນາດ​ໂລກ, ທ່ານ​ນາງ​ໄດ້​ກ່າວວ່າ ທ່ານ​ນາງ​ຈະເຕືອນ ອີຣ່ານ ວ່າ “ສະຫະລັດ ຈະ​ບໍ່​ມີ​ວັນ​ອະນຸຍາດ​ໃຫ້ ພວກ​ເຈົ້າ ມີອາວຸດ​ນິວ​ເຄລຍຢູ່ໃນຄວາມຄອບ ຄອງຢ່າງ​ເດັດຂາດ.”

ການ​ໃຫ້​ຄຳ​ປາ​ໄສ​ຂອງ​ທ່ານ​ນາງ Clinton ​ໃນ​ວັນ​ພຸ​ດວານ​ນີ້​ແມ່ນ​ສ່ວນ​ໜຶ່ງ​ຂອງ​ການ ຖະແຫຼງທາງ​ດ້ານ​ການ​ເມືອງ ​ໃນ​ນະຄອນຫຼວງ ວໍ​ຊິງ​ຕັນ ​ທີ່ກ່າວເຖິງຜົນດີແລະຜົນເສຍ ຂອງຂໍ້​ຕົກລົງ​ນິວ​ເຄລຍ ກັບອີຣ່ານ.

ນັກ​ທຸລະ​ກິດທ່ານ Donald Trump​ ​ໄດ້​ລວມ​ໂຕ​ກັບ​ເພື່ອນ​ຮ່ວມ​ພັກ Republican ທີ່​ຫວັງ​ເປັນ​ປະທານາທິບໍດີ ຄືສະມາຊິ​ສະພາສູງຈາກ ລັດ ​Texas ທ່ານ Ted Cruz ​ແລະ ພວກ ອະນຸລັກ​ນິຍົມ​ທີ່​ສຳຄັນ​ອື່ນ​ໆ ທີ່ຕຶກສະພາສະຫະລັດ ໃນ “ການ​ໂຮມຊຸມນຸມ​ເພື່ອຢຸດ​ຂໍ້​ຕົກລົງ​ນິວ​ເຄລຍ ກັບອີຣ່ານ.”

ທີ່ມາ  http://lao.voanews.com/