ທົບທວນການຈັດຕັ້ງປະຕິບັດ ວຽກງານສາທາລະນະສຸກອາຊຽນ

 ກອງ​ປະຊຸມ​ສະພາ​ບໍລິຫານດ້ານ​ການ​ແພດ ແລະ ສາ​ທາລະນະ​ສຸກ​ສາດ​ເຂດ​ຮ້ອນຂອງອາ​ຊຽນ ຄັ້ງ​ທີ 54 ເພື່ອ​ທົບ​ທວນຄືນ​ການຈັດຕັ້ງ​ປະຕິບັດ​ໄລຍະຜ່ານ​ມາ ຈັດ​ຂຶ້ນ​ວັນ​ທີ 19-20 ສິງຫາ 2015 ທີ່​ນະຄອນຫຼວງ​ວຽງຈັນ ໂດຍ​ມີ​ທ່ານ ​ດຣ. ສົມ​ອົກ ກິ່ງສະ​ດາ ລັດຖະມົນຕີ​ຊ່ວຍ​ວ່າການກະຊວງ​ສາທາລະນະ​ສຸກ ທ່ານ ປາ​ຕັບ ສິງຫາ​ຊິ​ວາ​ນົນ ເລຂາ​ທິການ​ອົງການ​ລັດຖະມົນຕີ​ສຶກ​ສາອາຊີ​ຕາເວັນ​ອອກສຽງ​ໃຕ້ ມີ​ບັນດາ​ກົມ ພ້ອມ​ດ້ວຍ​ສະມາຊິກຈາກ 11 ປະເທດ​ເຂົ້າ​ຮ່ວມ.

 ອົງການ​ລັດຖະມົນຕີ​ສຶກ​ສາອາຊີ​ຕາເວັນ​ອອກສຽງ​ໃຕ້ ຫຼື​ເຄືອ​ຂ່າຍ Seameo Tropmed ສ້າງຕັ້ງ​ຂຶ້ນໃນ​ປີ 1966 ເປັນ​ອົງການ​ຮ່ວມ​ມື​ລະດັບ​ພາກ​ພື້ນ ສຳລັບ​ການ​ສຶກ​ສາ ການ​ເຝິກອົບຮົມ ການ​ຄົ້ນຄວ້າ​ວິທະຍາສາດດ້ານການ​ແພດ ແລະ ສາທາລະ ນະສຸກ​ສາດ​ເຂດ​ຮ້ອນ ເຊິ່ງ​ເຮັດ​ໜ້າທີ່ເປັນ​ຈຸດ​ໃຈກາງ​ປະສານ​ງານ ກ່ຽວ​ກັບ​ການ​ສຶກ​ສາ​ຂັ້ນ​ສູງ ແລະ ການ​ຄົ້ນຄວ້າ​ວິທະຍາ ສາດ​ດ້ານການ​ແພດ​ເຂດ​ຮ້ອນ ແລະ ສາທາ​ລະນະ​ສຸກ​ສາດ ໃນ​ນັ້ນ ອົງການ​ໄດ້​ມີ​ການເຄື່ອນໄຫວ ໂດຍຜ່ານ 3 ສູນຂອງ​ພາກ​ພື້ນ ເຊັ່ນ: Seameo Tropmed Regional Centers ເຊິ່ງ​ປະກອບ​ມີ ສູນ​ຈຸລິນ​ຊີ​ແມ່​ກາ​ຝາກ ແລະ ແມງໄມ້ ຢູ່​ປະເທດ​ມາ​ເລ​ເຊຍ ສູນ​ສາ​ທາລະນະ​ສຸກ​ສາດ ຄຸ້ມ​ຄອງ​ໂຮງໝໍ ແລະ ອະນາໄມ​ສິ່ງແວດລ້ອມ ຢູ່ມະຫາວິທະຍາໄລ​ຟິ​ລິບ​ປິນ ແລະ ສູນ​ການ​ແພດ​ເຂດ​ຮ້ອນ ຢູ່​ມະຫາວິທະຍາໄລ​ມະຫິ​ດົນ ປະເທດ​ໄທ.

 ທ່ານ​ນາງ ສົມ​ຈັນ ໄຊ​ສີດາ ຮັກສາ​ການ​ກົມ​ການ​ສຶກ​ສາ ແລະ ຄົ້ນ​ຄວ້າ ກະຊວງ​ສາທາລະນະສຸກ ກ່າວ​ວ່າ: ໄລຍະ​ຜ່ານ​ມາ ​ສປປ ລາວ ໄດ້​ເຄື່ອນ​ໄຫວ​ໃນເຄືອ​ຂ່າຍ​ດັ່ງກ່າວ​ຢ່າງ​ແຂງແຮງ ໃນ​ການ​ພັດທະນາພະນັກງານສາທາລະນະ​ສຸກ ແລະ ຮ່ວມ​ມືໃນ​ການ​ຄົ້ນຄວ້າ​ວິທະຍາສາດ ເພື່ອ​ປັບປຸງ​ການ​ເຂົ້າ​ເຖິງ​ການ​ບໍ​ລິການ ໃຫ້​ແກ່​ປະຊາຊົນ​ບັນດາເຜົ່າ​ຢ່າງ​ທົ່ວ​ເຖິງ ແລະ ມີ​ຄຸ​ນະພາບ ພ້ອມ​ທັງ​ໄດ້​ຮັບ​ທຶນ​ເຝິກ​ອົບຮົມ​ໄລຍະ​ສັ້ນ ແລະ ໄລຍະ​ຍາວ ໃຫ້​ແກ່​ພະນັກງານ​ໄປ​ເຝິກອົບຮົມ ຢູ່​ສູນ​ຂອງ​ເຄືອ​ຂ່າຍ Seameo Tropmed ປີ​ລະ​ຫຼາຍ​ຄັ້ງ ແລະ ມີ​ການ​ຮ່ວມ​ມື​ໃນ​ໂຄງການ​ຄົ້ນຄວ້າ​ ການ​ຄວບ​ຄຸມ​ຂອງ​ພະຍາດລະບາດ​ ໂດຍ​ສະເພາະ HIV/AIDS.

ທີ່ມາ vientiane mai