ທົດລອງໂຄງການລົບລ້າງພະຍາດໄຂ້ຍູງຢູ່ເມືອງນອງ

ໂຄງການທົດລອງເພື່ອລົບລ້າງພະຍາດໄຂ້ຍູງ ຫຼືມາເລເຣຍ ໄດ້ເປີດກອງປະຊຸມ ເພື່ອປຶກສາຫາລືຮ່ວມກັນກັບອຳນາດການປົກຄອງເມືອງ ເຊິ່ງໄດ້ຈັດຂຶ້ນໃນວັນທີ 23 ພະຈິກ 2015 ທີ່ຫ້ອງປະຊຸມສາທາລະນະສຸກເມືອງນອງ.ເຂົ້າຮ່ວມໃນກອງປະຊຸມໃນຄັ້ງນີ້ ມີທ່ານ ບຸນຍົມ ນວນລາສີ ຮອງເຈົ້າເມືອງໆນອງ ທັງເປັນປະທານຄະນະກຳມະການໂຄງການທົດລອງລົບລ້າງໄຂ້ຍູງຂັ້ນເມືອງ, ມີທ່ານ ດຣ ຕຽງຄຳ ປ້ອງວົງສາ ຫົວໜ້າຂະແໜງໄຂ້ຍູງ, ແມ່ກາຝາກ ແລະ ແມງໄມ້ແຂວງ, ມີຊ່ຽວຊານໂຄງການປະຈຳພາກສະໜາມ, ຄະນະກຳມະການຂັ້ນເມືອງ ແລະ 4 ບ້ານເປົ້າໝາຍ 4 ບ້ານເຂົ້າຮ່ວມ.
ທ່ານ ດຣ ຕຽງຄຳ ປ້ອງວົງສາ ຫົວໜ້າຂະແໜງໄຂ້ຍຸງແມ່ກາຝາກ ແລະ ແມງໄມ້ແຂວງກ່າວວ່າ: ໂຄງການທົດລອງລົບລ້າງໄຂ້ຍູງ ເປັນການລິເລີ່ມເພື່ອເປັນການລົບລ້າງພະຍາດດັ່ງກ່າວໃຫ້ໝົດ ເຊິ່ງໃນຫຼາຍໆປະເທດກໍ່ໄດ້ມີການຈັດຕັ້ງປະຕິບັດມາແລ້ວເຊັ່ນ: ປະເທດໄທ, ພະມ້າ, ກຳປູເຈຍ ແລະ ຫວຽດນາມ ສຳລັບໃນ ສປປລາວ ເມືອງນອງ ນັບວ່າເປັນເມືອງທຳອິດ ທີ່ມີໂຄງການລົບລ້າງພະຍາດໄຂ້ຍູງລາຍ ແລະ ເປັນໂຄງການຮ່ວມມືລະຫວ່າງໂຮງໝໍມະໂຫສົດ ແລະ ແວວຄຳຕຣັສ ມະຫາວິທະຍາໄລ ອ໋ອກຝອດ ກໍ່ຄືພະແນກສາທາລະນະສຸກແຂວງ, ຂະແໜງໄຂ້ຍູງແມ່ກາຝາກ ແລະ ແມງໄມ້ແຂວງ ເຊິ່ງໃນເດືອນ ກໍລະກົດ 2015 ຜ່ານມາ ໂຄງການດັ່ງກ່າວໄດ້ລົງສຳຫຼວດໄຂ້ຍູງກວດເລືອດ ໃນ 10 ບ້ານຂອງເມືອງນອງ, ໂດຍພົບວ່າ 20 % ຂອງປະຊາຊົນ ມີສຸຂະພາບແຂງແຮງ (ບໍ່ມີໄຂ້ຍູງ) ແຕ່ມີເຊື້ອໄຂ້ຍູງຢູ່ໃນຮ່າງກາຍ, ບຸກຄົນດັ່ງກ່າວເຖິງຈະບໍ່ມີອາການຫຍັງ ແຕ່ເຂົາເຈົ້າສາມາດແຜ່ເຊື້ອໃຫ້ຄົນອື່ນໄດ້ ໂດຍມີຍູງເປັນພາຫະນະນຳເຊື້ອ ແລະ ສາມາດເປັນໄຂ້ຍູງໄດ້. ສຳລັບການເຮັດທົດລອງໃນເບື້ອງຕົ້ນນີ້ແມ່ນໄດ້ກຳນົດເອົາ 4 ບ້ານຄື: ບ້ານໂອ້ຍຕານຕີບ, ບ້ານພູໝາກມີ້, ບ້ານທ່າເທ ແລະ ບ້ານຊວງໃຕ້ ເພາະທັງ4 ບ້ານດັ່ງກ່າວນີ້ ເປັນບ້ານທີ່ຖືເຊື້ອໄຂ້ຍູງຫຼາຍກວ່າໝູ່ ໂດຍຈະໃຫ້ຄົນໃນ 2 ບ້ານກິນຢາແບບທົ່ວປວງຊົນເປັນໄລຍະ ແລະ ຕິດຕາມກວດເລືອດ, ສ່ວນອີກ 2 ບ້ານ ຈະໄດ້ມີການຕິດຕາມສົມທຽບກັນລະຫວ່າງບ້ານທີ່ໃຫ້ຢາແບບປວງຊົນໄດ້ຮັບຜົນ ແລະ ມີປະສິດທິພາບຫຼາຍສ່ຳໃດ, ເພາະຕົວຢາທີ່ໃຊ້ເປັນຢາທີ່ມີຄຸນະພາບສູງ, ໂຄງການທົດລອງລົບລ້າງໄຂ້ຍູງນີ້ຈະໄດ້ເລີ່ມແຕ່ສົກປີ 2015 – 2016 ເປັນຕົ້ນໄປກຳນົດ 3 ປີ.