ທູເຄິນປັດຂ່າວກຽມຂາຍກິນເທີ

 

ໂທມັສ ທູເຄິນ ຜູ້ຈັດການທີມ ໂບຣຸສເຊຍ ດອດມຸນ ອອກມາໂຕ້ຂ່າວກຽມຂາຍ ມັດທິອັສ ກິນເທີ ກອງຫຼັງຂອງທີມໃຫ້ກັບ ອາເຊນອນ ຮຽບຮ້ອຍພ້ອມກັບຢ້ຳຊັດເຈນວ່າ ກິນເທີ ຈະຍັງເປັນນັກເຕະຂອງ “ເສືອເຫຼືອງ” ຄືເກົ່າ.

 

ໂທມັສ ທູເຄິນ ຜູ້ຈັດການທີມຂອງ ໂບຣຸສເຊຍ ດອດມຸນ ສະໂມສອນດັງຂອງ ບຸນເດສລີກາ ເຢຍລະມັນ ຢືນຢັນຊັດເຈນວ່າຊ່ວງຊຳເມີນີ້ ມັດທິອັສ ກິນເທີ ກອງຫຼັງເລືອດເບຍຈະບໍ່ຍ້າຍອອກຈາກຖິ່ນ ຊິກເນົາ ອິດູນາ ພາກ ຢ່າງແນ່ນອນ ຫຼັງຈາກທີ່ນັກເຕະມີຂ່າວກ່ຽວພັນກັບ ອາເຊນອນ ສະໂມສອນຍັກໃຫຍ່ຂອງ ພຣີເມຍລີກ.

 

ກ່ອນໜ້ານີ້ມີກະແສຂ່າວວ່າ “ປືນໃຫຍ່” ກຳລັງໃຫ້ຄວາມສົນໃຈ ກິນເທີ ເນື່ອງຈາກເປັນນັກເຕະທີ່ຫຼິ້ນໄດ້ທຸກຕຳແໜ່ງໃນແນວຮັບ ແລະ ຂ່າວລືດັ່ງກ່າວກໍຍິ່ງມີນ້ຳໜັກຂຶ້ນອີກເມື່ອເຂົາບໍ່ມີຊື່ຕິດທັບ “ເສືອເຫຼືອງ” ຊຸດໄປທົວພຣີຊີຊັນທີ່ເອເຊຍ.

 

ຢ່າງໃດກໍຕາມຫຼ້າສຸດ ທູເຄິນ ອອກມາປິດຂ່າວລືຮຽບຮ້ອຍພ້ອມກັບຢ້ຳຊັດເຈນວ່າດາວເຕະທີມຊາດເຢຍລະມັນຍັງຈະເປັນນັກເຕະຂອງ ດອດມຸນ ຄືເກົ່າ.

 

“ກ່ອນໜ້ານີ້ມີຂ່າວສະໂມສອນເຢຍລະມັນຢາກໄດ້ເຂົາ ແລະ ມາຕອນນີ້ເປັນສະໂມສອນອັງກິດທີ່ຢາກໄດ້ໂຕເຂົາ ເຊິ່ງຂ້ອຍກໍບໍ່ຮູ້ດອກວ່າມັນເປັນເລື່ອງແທ້ ຫຼື ບໍ່ ແຕ່ເຮົາຂໍຢືນຢັນແບບຊັດເຈນວ່າ ມັດທິອັສ ເປັນນັກເຕະຂອງເຮົາ ແລະ ຍັງຈະເປັນນັກເຕະຂອງເຮົາຕໍ່ໄປ” ທູເຄິນ ກ່າວ.