ທຸ່ມໝົດຕົວ!! ຜີເທ 85 ລ້ານປອນຫວັງດຶງລູກາກູ

 

ເດລີ ສະຕາ ສື່ຂອງອັງກິດລະບຸ ແມນ ຢູໄນເຕັດ ຈະທຸ່ມເງິນເຖິງ 85 ລ້ານປອນເພື່ອເປັນຄ່າຫົວຂອງ ໂຣເມລູ ລູກາກູ ຫົວຫອກຂອງ ເອເວີຕັນ ໂດຍພວກເຂົາຈະໃຫ້ຄ່າເມື່ອຍສູງເຖິງ 230,000 ປອນຕໍ່ອາທິດ.

 

ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງເວທີ ພຣີເມຍລີກ ຈະຍື່ນຂໍ້ສະເໜີຈຳນວນເງິນເຖິງ 85 ລ້ານປອນເພື່ອຂໍຊື້ ໂຣເມລູ ລູກາກູ ກອງໜ້າຮ່າງຍັກຂອງ ເອເວີຕັນ ຕາມການລາຍງານຂອງ ເດລີ ສະຕາ ສື່ຂອງເມືອງຜູ້ດີ.

 

ລູກາກູ ຕົກເປັນຂ່າວຢ່າງໜັກວ່າຈະຍ້າຍທີມໃນຊ່ວງຊຳເມີນີ້ ຫຼັງຈາກທີ່ປະຕິເສດທີ່ຈະຕໍ່ສັນຍາກັບທີມ ເຊິ່ງເຊື່ອກັນວ່າ ເຊວຊີ ຢາກດຶງເຂົາໄປຮ່ວມທີມ ຫຼັງຈາກທີ່ ອັນໂຕນີໂອ ຄອນເຕ ຜູ້ຈັດການທີມ ເຊວຊີ ຕ້ອງການຕົວເລືອກຝີຕີນດີໃນເກມບຸກ.

 

ຢ່າງໃດກໍຕາມ ເດລີ ສະຕາ ເຜີຍວ່າ ໂຊເຊ ມູຣິນໂຢ ນາຍໃຫຍ່ ແມນ ຢູໄນເຕັດ ບອກກັບ ເອັດ ວູດເວິດ ຮອງປະທານບໍລິຫານຂອງທີມເອງວ່າໃຫ້ທຸ່ມໝົດຕົວເພື່ອດຶງ ລູກາກູ ມາເສີມຄົມໃຫ້ໄດ້ເຊິ່ງນັ້ນລວມເຖິງການໃຫ້ຄ່າຕົວເຖິງ 85 ລ້ານປອນ ແລະ ເອເວີຕັນ ກໍອາດຈະຮັບຂໍ້ສະເໜີນັ້ນດ້ວຍ ຫຼັງເຊື່ອກັນວ່າພວກເຂົາຕັ້ງຄ່າຫົວຂອງ ລູກາກູ ໄວ້ທີ່ 70 ລ້ານປອນ ໂດຍທີ່ສື່ເຈົ້າເກົ່າຍັງເສີມອີກວ່າ “ຜີສາດແດງ” ຈະໃຫ້ຄ່າເມື່ອຍນັກເຕະສູງເຖິງ 230,000 ປອນຕໍ່ອາທິດອີກດ້ວຍ.

 

ບົດຄວາມໃຫມ່ໆ