ທີມກູ້ໄພອິນໂດເນເຊຍເຊື່ອ ເສຍຊີວິດໝົດລໍາ 189 ສົບ ເຮືອບິນ “Lion air” ຕົກ

ສໍານັກຂ່າວຕ່າງປະເທດລາຍງານຈາກນະຄອນຈາກາຣຕາ ປະເທດອິນໂດເນເຊຍ ເມື່ອວັນທີ່ 29 ຕຸລາ 2018 ວ່າ ເຮືອບິນໂດຍສານແບບໂບອິ້ງ 737 MAX ສາຍການບິນອິນໂດເນເຊຍ Lion air ເຊິ່ງໃຊ້ງານພຽງບໍ່ເທົ່າໃດເດືອນ ແຕ່ຫາຍໄປຈາກຈໍເຣດາ 13 ນາທີ ຫຼັງບິນຂື້ນມາຈາກສະໜາມບິນໃນນະຄອນຈາກາຣຕາ ຈົນພົບວ່າ ເຮືອບິນປະສົບເຫດຕົກໃນທະເລ ຫຼັງຈາກນັກບິນແຈ້ງຫໍບັງຄັບການວ່າຂໍກັບສະໜາມບິນຈາກາຣຕາ

ເວັບໄຊສະແດງຂໍ້ມູນການບິນລະບຸວ່າ ເຮືອບິນເລັ່ງຄວາມໄວສູງ ແລ້ວເກີດສູນເສຍກໍາລັງຫລຸດລະດັບລົງມາຢ່າງວ່ອງໄວໃນເວລາບໍ່ເທົ່າໃດນາທີຫຼັງຫາຍໄປຈາກຈໍເຣດາຣ
ທ່ານ ບໍາບັງ ເຊີຣໂຢ ອາຈິ ຜູ້ອໍານວຍການຝ່າຍປະຕິບັດການສໍານັກງານຄົ້ນຫາ ແລະ ກູ້ໄພ ກ່າວວ່າຕາມຄາດໝາຍຂອງຕົນນັ້ນບໍ່ມີໃຜລອດຊີວິດມາໄດ້ ເພາະສະພາບສົບທີ່ພົບນັ້ນຮ່າງກາຍບໍ່ສົມບູນ ແລະ ເວລາກໍ່ຜ່ານມາຫຼາຍຊົ່ວໂມງແລ້ວ ດັ່ງນັ້ນຈຶ່ງຄາດວ່າຜູ້ໂດຍສານ ແລະ ຈຸບິນທັງໝົດ 189 ຄົນຄົງເສຍຊີວິດທັງໝົດ

ເຮືອບິນໂດຍສານຂອງສາຍການບິນອິນໂດເນເຊຍ  Lion air ຖ້ຽວບິນເຈທີ 160 ພ້ອມຜູ້ໂດຍສານເປັນຜູ້ໃຫຍ່ 178 ຄົນ ເດັກ 3 ຄົນ ລວມເປັນ 181 ຄົນ ຂະນະທີ່ຈຸບິນມີ 8 ຄົນປະກອບດ້ວຍນັກບິນ 2 ຄົນ ແລະ ຈຸບິນ 6 ຄົນ ເດີນທາງຈາກນະຄອນຈາກາຣຕາມຸ່ງໜ້າສູ່ຈຸດໝາຍປາຍທາງທີ່ເມືອງປັງກັລ ປິນັງ ແຕ່ຂາດການຕິດຕໍ່ເມື່ອເວລາ 6:30 ໂມງ ເຊົ້າວັນຈັນທີ່ 29 ຕຸລາ 2018 ຕາມເວລາທ້ອງຖິ່

ສໍາລັບທີມຊ່ວຍເຫຼືອ ແລະ ກູ້ໄພນັ້ນມີນັກດໍານໍ້າທັງໝົດ 40 ຄົນຢູ່ໃນທີມຊ່ວຍເຫຼືອ ແລະ ກູ້ໄພ 150 ຄົນທີ່ປະຕິບັດງານຢູ່ຈາກເຫດເຮືອບິນຕົກຄັ້ງນີ້ ເຊິ່ງເຊື່ອວ່າເຮືອບິນໄດ້ຕົກລົງໃນນໍ້າເລິກປະມານ 30-40 ແມັດ