ທຳໃຈ..ສະເຕີຣິດບໍ່ປິດໂອກາດລາຫົງ

 

ແດນນຽວ ສະເຕີຣິດ ຫົວຫອກຂອງ ລີເວີພູ ຕົກເປັນຂ່າວວ່າພ້ອມທີ່ຈະເກັບເຄື່ອງຍ້າຍທີມໃນເດືອນມັງກອນນີ້ ເພາະທຳໃຈແລ້ວວ່າບໍ່ແມ່ນຕົວຫຼັກຂອງ ເຈີເກັນ ຄັອບ ຈົນເຮັດໃຫ້ຟອມບໍ່ສະໝຳ່ສະເໝີຈົນຮອດຕອນນີ້ແລ້ວຍັງຍິງປະຕູໃນເກມລີກບໍ່ໄດ້ເລີຍຈັກລູກ.

 

“ເດິ ຊັນ” ສື່ກິລາຂອງອັງກິດຕີຂ່າວວ່າ ແດນນຽວ ສະເຕີຣິດ ກອງໜ້າຂອງ ລີເວີພູ ບໍ່ປິດໂອກາດຍ້າຍທີມໃນເດືອນມັງກອນເຖິງວ່າຜົນງານຂອງ “ຫົງແດງ” ຈະດີຂຶ້ນເລື້ອຍໆແຕ່ເຂົາມີຄວາມຮູ້ສຶກວ່າບໍ່ໄດ້ຮັບຄວາມໄວ້ວາງໃຈຈາກ ເຈີເກັນ ຄັອບ ຜູ້ຈັດການທີມ ໂດຍມີ ເວສແຮມ ຢູໄນເຕັດ ແລະ ສະໂຕກ ຊີຕີ ພ້ອມກັນຍາດລາຍເຊັນ.

 

ຫົວຫອກອາຍຸ 27 ປີບໍ່ໄດ້ເປັນຕົວຈິງໃຫ້ “ຫົງແດງ” ທີ່ເກມບຸກຫຼັກໆຂອງ ຄັອບ ນໍາທີມໂດຍ ເຟລິບເປ ຄູຕິນໂຢ, ໂຣແບໂຕ ຟີມິໂນ, ຊາດິໂອ ມາເນ ແລະ ອະດຳ ລັນລານາ ໂດຍເຖິງວ່າເຂົາຈະໄດ້ຫຼິ້ນເລື້ອຍໆແຕ່ການບໍ່ໄດ້ເປັນຕົວຈິງແຖມຍິງໃນລີກບໍ່ໄດ້ຈັກລູກ ຈົນເຮັດໃຫ້ເຂົາເປີດໂອກາດຍ້າຍທີມໃນເດືອນມັງກອນໂດຍທີ່ມີ ເວສແຮມ ກັບ ສະໂຕກ ທີ່ພ້ອມຮັບເສັ້ງໃນລາຄາ 28 ລ້ານປອນ.

 

ຂະນະດຽວກັນໜຶ່ງໃນເຫດຜົນທີ່ເຊື່ອວ່າເຮັດໃຫ້ເຂົາຫຼຸດເປັນຕົວສຳຮອງເພາະເປັນນັກເຕະທີ່ຂາດທີມເວີກ ແລະ ເຫັນແກ່ຕົວໂດຍ ສະເຕີຣິດ ກ່າວວ່າ “ຂ້ອຍບໍ່ສົນໃຈເລີຍໃດ໋ວ່າໃຜຈະເປັນແບບໃດ ມັນບໍ່ຍຸຕິທຳ ບໍ່ຍຸຕິທຳເລີຍ ຂ້ອຍຮູ້ສຶກວ່າຂ້ອຍຊ່ວຍທີມໄດ້ ຂ້ອຍແອັດຊິດ ຍິງປະຕູ ໃຜຈະເວົ້າຈັ່ງໃດເຖິງຂ້ອຍບໍ່ແມ່ນເລື່ອງສຳຄັນ”.

 

“ແນ່ນອນວ່າຂ້ອຍມັກຍິງປະຕູ ແຕ່ຕາບໃດທີ່ທີມຊະນະນັ້ນຄືສິ່ງສຳຄັນທີ່ສຸດລວມເຖິງການທີ່ເຈົ້າມີສ່ວນໃນຜົນການແຂ່ງຂັນ ເຈົ້າເກັບກ່ຽວຄວາມໝັ້ນໃຈ ແລະ ເດີນໄປທາງໜ້າ ຂ້ອຍຢາກຍິງປະຕູ ແຕ່ທ້າຍທີ່ສຸດແລ້ວຜົນການແຂ່ງຂັນຂອງທີມສຳຄັນທີ່ສຸດ ແນ່ນອນວ່າການຍິງປະຕູຈະສຸດຍອດກໍຕາມ ນັກເຕະກອງໜ້າຢາກຍິງປະຕູທຸກຄົນຫັນລະ”.