ທາງການ!!ໂດ້ຕໍ່ສັນຍາຊຸດຂາວຮອດ 2021

 

ເຣອັນ ມາດຣິດ ລະບຸແລ້ວວ່າ ຄຣິສຕຽນໂນ ໂຣເນົາໂດ ຫົວຫອກຄົນດັງຈະເຊັນສັນຍາສະບັບໃໝ່ກັບທີມວັນຈັນນີ້ ໂດຍທີ່ຈະຕໍ່ສັນຍາຈົນຮອດເດືອນມິຖຸນາປີ 2021.

 

ເຣອັນ ມາດຣິດ ສະໂມສອນຍັກໃຫຍ່ຂອງ ລາ ລີກາ ສະເປນປະກາດວ່າ ຄຣິສຕຽນໂນ ໂຣເນົາໂດ ດາວຍິງຊູເປີສະຕາຈະຕໍ່ສັນຍາກັບທີມໃນວັນຈັນນີ້.

 

ຈາກສັນຍາເກົ່າແລ້ວ ໂຣເນົາໂດ ມີສັນຍາກັບທີມຮອດປີ 2018 ເຊິ່ງນັ້ນເຮັດໃຫ້ເຂົາຕົກເປັນຂ່າວກ່ຽວກັບການຍ້າຍທີມຢ່າງຕໍ່ເນື່ອງໂດຍສະເພາະກັບ ແມນເຊສເຕີ ຢູໄນເຕັດ ໜຶ່ງໃນທີມເກົ່າຂອງເຂົາ ແລະ ກັບ ປາຣີ ແຊັງ-ແຊັກແມັງ ທີມມະຫາເສດຖີຂອງຝຣັ່ງ.

 

ຢ່າງໃດກໍຕາມຫຼ້າສຸດ ມາດຣິດ ລະບຸວ່າກັບຕັນທີມຊາດປັອກຕຸຍການຕົກລົງທີ່ຈະຕໍ່ສັນຍາກັບທີມໄປຈົນຮອດວັນທີ 30 ມິຖຸນາປີ 2021 ແລ້ວໂດຍຈະມີການຈັດພິທີຢ່າງເປັນທາງການໃນວັນຈັນນີ້.

 

ຖະແຫຼງການຂອງ ເຣອັນ ມາດຣິດ ລະບຸວ່າ “ການຕໍ່ສັນຍາຂອງ ໂຣເນົາໂດ ຢ່າງເປັນທາງການຈະມີຂຶ້ນໃນວັນຈັນນີ້ ເວລາ 13.30 ຕາມເວລາທ້ອງຖິ່ນທີ່ສະໜາມ ຊານດິເອໂກ ເບີນາເບວ ກອງໜ້າເລືອດຝອຍທອງຈະຕໍ່ສັນຍາຈົນຮອດວັນທີ 30 ມິຖຸນາ 2021 ໂດຍຈະມີປະທານ ຟໍເຣນຕິໂນ ເປເຣດ ກັບຕົວນັກເຕະເອງມາເຂົ້າຮ່ວມງານໃນເທື່ອນີ້”.