ທັງຢາກຫົວທັງລຳຄານວ່າເສືອໃຕ້ທີມແຕກ

 

ໂທມັສ ມຸນເລີ ຫົວຫອກ ບາເຢິນ ມິວນິກ ເຜີຍທັງຫົວທັງລຳຄານກັບຂ່າວລືຄວາມແຕກແຍກພາຍໃນທີມ ບອກວ່າເປັນເລື່ອງທີ່ສ້າງຂຶ້ນມາທັງນັ້ນ ແລະ ຄົນທີ່ເຮັດກໍຫວັງທີ່ຈະເຫັນຕົ້ນສັງກັດຕົກຕ່ຳລົງເພື່ອຄວາມສູສີໃນບຸນເດສລີກາ.

 

ໂທມັສ ມຸນເລີ ກອງໜ້າຂອງ ບາເຢິນ ມິວນິກ ສະໂມສອນຍັກໃຫຍ່ຈາກ ບຸນເດສລີກາ ເຢຍລະມັນ ອອກມາເຜີຍເມື່ອວັນຈັນທີ່ຜ່ານມາວ່າ ເຂົາທັງຮູ້ສຶກຕະຫຼົກ ແລະ ລຳຄານກັບຂ່າວລືເລື່ອງຄວາມແຕກຫັກພາຍໃນທີມຂອງຕົນທີ່ມີອອກມາໃນເວລານີ້.

 

ກ່ອນໜ້ານີ້ມີລາຍງານໃນເຢຍລະມັນວ່ານັກເຕະລາຍໜ່ຶ່ງຂອງ ບາເຢິນ ມິວນິກ ອ້າງວ່າບັນຍາກາດຂອງທີມພາຍໃນການຄຸມບັງຫຽນຂອງ ເປັບ ກວາດິໂອລາ ກຳລັງຕົກຕ່ຳຈາກການທີ່ນາຍໃຫຍ່ຈະໄປຄຸມທັບ ເຮືອໃບສີຟ້າ ໃນອັງກິດໃນຊ່ວງຈົບລະດູການນີ້.

 

ນອກຈາກນີ້ ຍັງມີການເວົ້າເຖິງເລື່ອງຄວາມລະສ່ຳລະສາຍພາຍໃນທີມ ບາເຢິນ ເມື່ອໜັງສືພິມອ້າງຂ່າວວ່າ ອາຕູໂຣ ວິດາວ ກອງກາງຂອງທີມມີອາການເມົາມາຝຶກຊ້ອມໃນຊ່ວງການເຂົ້າເກັບໂຕໜ້າໜາວທີ່ ກາຕາ ເມື່ອເດືອນມັງກອນ.

 

ເຫດການນີ້ເຮັດໃຫ້ດາວເຕະ ຊີລີ ແລະ ບາເຢິນ ຕ້ອງຟ້າວອອກມາປະຕິເສດພ້ອມກັບປະກາດກຽມດຳເນີນາການຟ້ອງໜັງສືພິມທີ່ປ່ອຍຂ່າວແລ້ວ ແລະ ລ່າສຸດ ມຸນເລີ ກໍອອກມາຢືນຢັນວ່າທຸກຢ່າງເປັນໄປໄດ້ດ້ວຍດີສຳລັບ ບາເຢິນ ໃນເວລານີ້.

 

“ມັນເປັນຕາຢາກຫົວ ເລື່ອງນີ້ຍັງເປັນຕາລຳຄານອີກ ໂດຍສະເພາະໃນເວລາທີ່ມັນເປັນເລື່ອງຂອງສ່ວນບຸກຄົນ ຂ້ອຍບໍ່ຄິດວ່າມັນຖືກຕ້ອງແນ່ນອນ ມັນເປັນການສ້າງເລື່ອງເນື່ອງຈາກມີການປ່ຽນນາຍໃຫຍ່ຄົນໃໝ່ ມັນເຈຕະນາກໍ່ກວນ ບາເຢິນ ຂ້ອຍເຂົ້າໃຈວ່າບາງຄົນໃນເຢຍລະມັນຢາກເຫັນຊ່ອງວ່າງຫຼຸດລົງລະຫວ່າງອັນດັບ 1 ແລະ 2 ໃນບຸນເດສລີກາ” ມຸນເລີ ກ່າວ.