ຖ້ຳພະເຈົ້າຄຳຕັນ ເມືອງປາກແບງ

ຖ້ຳພະເຈົ້າຄຳຕັນ ບ້ານປາກເງີຍ, ຕັ້ງຢູ່ຫ່າງຈາກເທດສະບານ ເມືອງປາກແບງ ປະມານ 16 ກິໂລແມັດ. ເສັ້ນທາງເຂົ້າເຖິງ ແມ່ນສາມາດເຂົ້າເຖິງໄດ້ 2 ເສັ້ນທາງຄື: ທາງລົດຈາກ ເມືອງປາກແບງ ຫາບ້ານປາກເງີຍ ປະມານ 12 ກິໂລແມັດ, ຂີ່ເຮືອຈາກ ບ້ານປາກເງີຍ ຂຶ້ນໄປຫາຖ້ຳ ປະມານ 20 ນາທີ. ເປັນຖ້ຳນ້ອຍ ມີຄວາມຍາວ ປະມານ 30 ແມັດ, ກວ້າງປະມານ 2-15 ແມັດ ແລະ ສູງປະມານ 5-10 ແມັດ. ເປັນຖ້ຳທີ່ຄົ້ນພົບໃໝ່, ທ່າແຮງຂອງຖ້ຳ ແມ່ນຕັ້ງໃກ້ກັບ ແມ່ນ້ຳຂອງ, ມີທຳມະຊາດທີ່ສວຍງາມ ແລະ ສາມາດສ້າງເປັນກິດຈະກຳທ່ອງທ່ຽວ ຕໍ່ກັບແຫຼ່ງທ່ອງທ່ຽວອື່ນ ເຊັ່ນ: ບ້ານປາກເງີຍ, ການຂີ່ເຮືອ ທ່ອງທ່ຽວ, ບ້ານປິ່ງ ແລະ ປ່າຊາພັນປີ ເຊື່ອມຕໍ່ກັບ ແຂວງບໍ່ແກ້ວ.

ຖ້ຳນີ້ ເປັນຖ້ຳໜຶ່ງທີ່ປະກອບດ້ວຍ ທຳມະຊາດທີ່ສວຍງາມ ມາແຕ່ດຶກດຳບັນ, ໄດ້ຄົ້ນພົບໂດຍຊາວບ້ານຊື່ ທ້າວ ເຕາະ ຢູ່ບ້ານຫ້ວຍເປາະ, ຄັ້ງວັນທີ 11 ກັນຍາ 2009 ຊຶ່ງຜູ້ກ່ຽວ ໄດ້ທຳມາຫາກິນ, ບັງເອີນພົບເຫັນໂຕເຈຍ ຈຳນວນຫຼວງຫຼາຍຢູ່ ບໍລິເວນດັ່ງກ່າວ ກໍ່ເລີຍສົນໃຈເຂົ້າໄປເບິ່ງ ກໍເຫັນວ່າມີຖ້ຳ ແລະ ມີເຈຍຫຼາຍ, ລາວຈິ່ງເອົາມາບໍລິໂພກ ແລະ ເອົາມາຂາຍ ໃຫ້ຊາວບ້ານປາກເງີຍ, ປະຊາຊົນບ້ານປາກເງີຍ ເຫັນວ່າພີ່ນ້ອງເຜົ່າກຶມມຸ ເອົາໂຕເຈຍຈຳ ນວນຫຼວງຫຼາຍ ມາຂາຍຜິດປົກກະຕິ ໃນແຕ່ລະວັນ ເລີຍສົນໃຈໄປຖາມ ເຖິງກົກປາຍສາເຫດ ແລະ ທີ່ມາ, ເມື່ອຮູ້ຂ່າວອຳນາດການປົກຄອງ ບ້ານປາກເງີຍ ຈຶ່ງແຕ່ງຕັ້ງຊາວບ້ານ ໄປສຳຫຼວດເບິ່ງ ໃນທີ່ສຸດກໍ່ໄດ້ພົບເຫັນ ຖ້ຳດັ່ງກ່າວ. ພາຍໃນຖ້ຳເບື້ອງຂວາມື ມີແຜ່ນຫີນ ເປັນຮູບແທ່ນບູຊາ, ຫຼັງແທ່ນ ມີຮູບ ແມງກະເບື້ອ, ຊ້າຍມືເປັນເສົາອິນແຂວນ, ທາດກອງເຂົ້າ, ກ້ອນເສົ້າລືສີ, ຂາງ ແລະ ອື່ນໆ ຕາມຄວາມເຊື່ອຖື ຂອງຊາວບ້ານ. ຖ້ຳດັ່ງກ່າວຕັ້ງຢູ່ ເຂດສັກສິດ ທີ່ຊາວບ້ານ ເຄີຍເຊື່ອຖືມາ ເປັນເວລາຊ້ານານ ເຊິ່ງມີນິທານ ເລົ່າສືບຕໍ່ກັນມາວ່າ: ເປັນຖ້ຳພະຍານາກ ແລະ ເປັນບ່ອນຈຳສິນ ຂອງລືສີທີ່ຊາວບ້ານ ຮຽກວ່າ ຖ້ຳພະເຈົ້າຄຳຕັນ ໃນອະດີດ. ຢູ່ໃນຖ້ຳ ມີບໍ່ນ້ຳແຫ່ງໜຶ່ງ ທີ່ຊາວບ້ານ ຕັກເອົາມາບູຊາ ແຕ່ບໍ່ແຫ້ງ, ໃຊ້ເທົ່າໃດກໍ່ຍັງຄືເກົ່າ ບໍ່ວ່າໃນລະດູໃດກໍ່ຕາມ. ຢູ່ມາ ຄືນໜຶ່ງ ໄດ້ມີຊາວບ້ານຄົນໜຶ່ງ ຝັນວ່າພະລືສີຜູ້ເຝົ້າ ຢູ່ທີ່ນັ້ນຈົ່ມວ່າ ຜູ້ໃດກໍ່ພາກັນຕັກເອົາແຕ່ນ້ຳໄປ ພະອົງຫານ້ຳຈະລ້າງໜ້າກໍ່ບໍ່ມີ ຫຼັງຈາກນັ້ນ ນ້ຳກໍ່ໄດ້ແຫ້ງລົງ ເທື່ອລະເລັກລະນ້ອຍຈົນໝົດ. ກໍ່ຍ້ອນຊາວບ້ານ ເຂົ້າໄປລົບກວນສະຖານທີ່ ສັກສິດຂອງລືສີ; ລືສີຈິ່ງເຮັດໃຫ້ນໍ້າແຫ້ງ.

…………………………………………………………….

ຂໍຂອບໃຈທີ່ມາ : http://www.laogov.gov.la