ຖາວອນເທົ່ານັ້ນ!! ກິກບໍ່ສົນຄຸມຜີແບບຊົ່ວຄາວ

 

ເດິ ມິນເລີ ສື່ດັງຂອງເກາະອັງກິດຕີຂ່າວ ໄຣອັນ ກິກສືຂວາຂອງ ຫຼຸຍ ຟານກາວ ນາຍໃຫຍ່ ແມນເຊສເຕີ ຢູໄນເຕັດ ບໍ່ຢາກເປັນພຽງຜູ້ຈັດການຊົ່ວຄາວໃຫ້ “ຜີສາດແດງ” ອີກແລ້ວເພາະເຊື່ອວ່າມັນຮອດເວລາແລ້ວທີ່ຕົນຈະໄດ້ຄຸມທີມແບບເຕັມໂຕ.

 

ໄຣອັນ ກິກ ຜູ້ຊ່ວຍຜູ້ຈັດການທີມ ແມນເຊສເຕີ ຢູໄນເຕັດ ສະໂມສອນຈາກ ພຣີເມຍລີກ ບໍ່ສົນໃຈທີ່ຈະຮັບງານຄຸມ “ຜີສາດແດງ” ແບບຊົ່ວຄາວອີກຮອບຕາມການລາຍງານຂອງ ເດິ ມິນເລີ ສື່ດັງຂອງເມືອງຜູ້ດີ.

 

ກະແສຂ່າວເລື່ອງທີ່ ຫຼຸຍ ຟານກາວ ຜູ້ຈັດການທີມ ແມນ ຢູໄນເຕັດ ຈະຖືກປົດອອກຈາກຕຳແໜ່ງມັນຮຸນແຮງຂຶ້ນເລື້ອຍໆຫຼັງຈາກທີ່ພວກເຂົາອອກໄປເສຍ ຊັນເດີແລນ ເມື່ອວັນເສົາທີ່ຜ່ານມາ ໂດຍປັດຈຸບັນແຊມລີກສູງສຸດເມືອງຜູ້ດີ 20 ສະໄໝຢູ່ອັນດັບ 5 ຂອງຕາຕາລາງນຳຫຼັງ ແມນເຊສເຕີ ຊີຕີ ທີມໃນອັນດັບ 4 ເຊິ່ງເປັນໂຄຕາສຸດທ້າຍຂອງການໄດ້ສິດໄປຫຼິ້ນ ແຊມປຽນລີກ ລະດູການໜ້າຢູ່ 6 ແຕ້ມໃນຂະນະທີ່ເກມເຫຼືອໃຫ້ຫຼິ້ນພຽງ 12 ນັດ.

 

ຫຼາຍຝ່າຍເຊື່ອກັນວ່າ ແມນ ຢູໄນເຕັດ ແຍກທາງກັບ ຟານກາວ ແລ້ວນັ້ນ ໂຊເຊ ມູຣິນໂຢ ກໍຈະເຂົ້າມາຄຸມທັບແທນເຊິ່ງມັນກໍສວນທາງກັບຄວາມຕ້ອງການຂອງ ກິກ ເພາະເຂົາເຊື່ອວ່າມັນຮອດເວລາແລ້ວທີ່ຈະໄດ້ເປັນຜູ້ຈັດການທີມຢ່າງເຕັມຕົວໃຫ້ກັບສະໂມສອນທີ່ຫຼິ້ນໃຫ້ມາຕະຫຼອດອາຊີບ ແລະ ບໍ່ຢາກຄຸມທີມແບບຂັດຕາທັບອີກ ຫຼັງເຄີຍຮັບຕຳແໜ່ງນັ້ນຊ່ວງທີ່ ເດວິດ ມອຍ ຖືກປົດອອກຈາກຕຳແໜ່ງໃນເດືອນເມສາປີ 2014.

 

ທັງນີ້ລາຍງານລະບຸອີກວ່າ ແມນ ຢູໄນເຕັດ ຢ້ານວ່າ ກິກ ຈະລາອອກຈາກທີມຖ້າບໍ່ໄດ້ຮັບຕຳແໜ່ງຄຸມທີມຢ່າງຖາວອນ.