ຕໍເຣດບອກ!! ເອົາເວລາເລືອກສີເສື້ອມາເລືອກກຳມະການໃຫ້ໄດ້ມາດຕະຖານດີບໍ່

 

ເຟີນັນໂດ ຕໍເຣດ ກອງໜ້າ ແອັດເລຕິໂກ ມາດຣິດ ສຸດເຊັງສະຫາພັນບານເຕະເອີຣົບ ເຮັດໜ້າທີ່ສຸດກາກ ແລະ ສົ່ງກຳມະການທີ່ບໍ່ມີມາດຕະຖານລົງຕັດສິນ ຫຼັງຕົນເອງຖືກໄລ່ອອກຈາກສະໜາມໃນເກມ ຢູຟາ ແຊມປຽນລີກ ນັດທີ່ຕົ້ນສັງກັດບຸກເສຍ ບາເຊໂລນາ ເມື່ອວັນອັງຄານທີ່ຜ່ານມາບອກວ່າ ຢູຟາ ທິແຕ່ໄປສົນໃຈເລື່ອງຊຸດລົງແຂ່ງ ແລະ ບໍ່ເລືອກກຳມະການທີ່ມີລະດັບລົງມາເຮັດໜ້າທີ່ ພ້ອມຮັບເປັນມື້ທີ່ບໍ່ດີໃນຊີວິດການລົງຟາດແຄ່ງ ແຕ່ເຊື່ອ “ກາໝີ” ຍັງມີລຸ້ນເຂົ້າຮອບ.

 

ເຟີນັນໂດ ຕໍເຣດ ຫົວຫອກ “ກາໝີ” ແອັດເລຕິໂກ ມາດຣິດ ສະໂມສອນດັງຈາກ ລາ ລີກາ ສະເປນ ອອກມາກ່າວເມື່ອວັນພຸດນີ້ວ່າ ເຂົາບໍ່ພໍໃຈຢ່າງຍິ່ງກັບສະຫະພັນບານເຕະເອີຣົບ (ຢູຟາ) ແລະ ຜູ້ຕັດສິນ ເຟລິກ ໄບ ຫຼັງຈາກທີ່ຕົນເອງຖືກໄລ່ອອກໃນເກມ ຢູຟາ ແຊມປຽນລີກ ຮອບ 8 ທີມສຸດທ້າຍນັດທຳອິດທີ່ບຸກໄປເສຍໃຫ້ ບາເຊໂລນາ 1-2 ເມື່ອວັນອັງຄານທີ່ຜ່ານມາ.

 

ຕໍເຣດ ຍິງໃຫ້ ແອັດ ມາດຣິດ ຂຶ້ນນຳກ່ອນແຕ່ກໍຕ້ອງຖືກໄລ່ອອກຫຼັງຈາກຖືກເຫຼືອງ 2 ໃບຕັ້ງແຕ່ເຄິ່ງທຳອິດເຮັດໃຫ້ ບາຊາ ພິກກັບມາເອົາຊະນະ 2-1 ໄດ້ສຳເລັດ ແລະ ພາຍຫຼັງການແຂ່ງຂັນອະດີດດາວຍິງ ລີເວີພູ ກໍສະແດງຄວາມບໍ່ພໍໃຈຢ່າງຍິ່ງກັບການເຮັດໜ້າທີ່ຂອງ ຢູຟາ ທີ່ໃຫ້ຄວາມສົນໃຈກັບເລື່ອງສີຊຸດແຂ່ງຂັນຫຼາຍກວ່າເລືອກຜູ້ຕັດສິນ ເຊິ່ງເຂົາເບິ່ງວ່າບໍ່ມີຄວາມສາມາດໃນການລົງເຮັດໜ້າທີ່ໃນເກມໃຫຍ່.

 

“ມັນໜ້າເສຍດາຍທີ່ ຢູຟາ ສົນໃຈແຕ່ເລື່ອງການປ່ຽນຊຸດແຂ່ງຂອງເຮົາ ແລະ ສົ່ງຜູ້ຕັດສິນທີ່ບໍ່ມີຄວາມສາມາດລົງເຮັດໜ້າທີ່ໃນເກມ ແຊມປຽນລີກ ຮອບກ່ອນຮອງຊະນະເລີດ ມັນເປັນໜຶ່ງໃນມື້ທີ່ຫ່ວຍແຕກທີ່ສຸດໃນຊີວິດຂ້ອຍໃນຖານະນັກກິລາ ຂ້ອຍເສຍໃຈທີ່ເຮັດໃຫ້ທີມເຫຼືອ 10 ຄົນ ຂ້ອຍຮູ້ສຶກວ່າຕ້ອງຮັບຜິດຊອບທີ່ເຮັດໃຫ້ທີມບໍ່ຊະນະ ຂ້ອຍແນ່ໃຈວ່າດ້ວຍໂຕຜູ້ຫຼິ້ນ 11 ຄົນມັນຈະແຕກຕ່າງອອກໄປຢ່າງຫຼາຍ ແຕ່ຂ້ອຍກໍພູມໃຈທີ່ໄດ້ຫຼິ້ນໃຫ້ທີມນີ້ ຜົນການແຂ່ງຂັນບໍ່ໄດ້ບໍ່ດີໄປໝົດ ທີ່ ກັນເດລອນ ທຸກຢ່າງເປັນໄປໄດ້” ຕໍເຣດ ກ່າວ.