ຕົວແທນປ໋າແຊມ!!ເອຟເອຄິດດຶງຣັງນິກຄຸມທັບຜູ້ດີ

 

ສະກາຍ ສະປອດ ສື່ກິລາຂອງເກາະອັງກິດຕີຂ່າວ ຣາຟ ຣັງນິກ ເປັນໜຶ່ງໃນເປົ້າໝາຍທີ່ສະມາຄົມບານເຕະອັງກິດຄິດຈະດຶງມາເປັນຜູ້ຈັດການທີມຄົນໃໝ່ຂອງທີມຊາດອັງກິດໂດຍທີ່ ຣັງນິກ ກໍເຄີຍເຂົ້າມາສຳພາດເພື່ອຮັບງານນີ້ຕອນທີ່ ຣອຍ ຮັດສັນ ຕ້ອງບອກລາທີມມາແລ້ວ.

 

ຣາຟ ຣັງນິກ ກຸນຊືວ່າງງານຊາວເຢຍລະມັນເປັນຄົນທີ່ສະມາຄົມບານເຕະອັງກິດ ຫຼື ເອຟເອກຳລັງພິຈາລະນາວ່າຈະໃຫ້ເຂົາເຂົ້າມາເປັນຜູ້ຈັດການທີມຄົນໃໝ່ຂອງທີມຊາດອັງກິດແທນທີ່ ແຊມ ເອົາລາໄດ໊ ຕາມການລາຍງານຂອງ ສະກາຍ ສະປອດ ນິວ ສື່ກິລາຂອງອັງກິດ.

 

ອັງກິດ ຕ້ອງເບິ່ງຫາຜູ້ຈັດການທີມຄົນໃໝ່ຫຼັງຈາກທີ່ ເອົາລາໄດ໊ ຈຳເປັນຕ້ອງລາອອກຈາກຕຳແໜ່ງເພາະເກີດເລື່ອງຂຶ້ນກັບການທີ່ເຂົາໄປແນະນຳແນວທາງຫຼີກລ່ຽງກົດຂອງ ເອຟເອ ໂດຍທີ່ ແກເຣັດ ເຊົາເກດ ກຸນຊືທີມຊາດອັງກິດລຸ້ນອາຍຸບໍ່ເກີນ 21 ປີຖືກດັນໃຫ້ຂຶ້ນມາຄຸມແທນໄປກ່ອນ.

 

ທັງນີ້ ຣັງນິກ ເຊິ່ງປັດຈຸບັນມີຕຳແໜ່ງຜູ້ອຳນວຍການກິລາຂອງ ແອເບ ໄລຊິກ ເຄີຍເຂົ້າມາສຳພາດເພື່ອລຸ້ນຮັບງານຄຸມອັງກິດຫຼັງຈາກທີ່ໝົດຍຸກຂອງ ຣອຍ ຮັດສັນ ມາແລ້ວ ນອກຈາກນີ້ ແດນ ແອັດເວິດ ປະທານເທັກນິກຄົນປັດຈຸບັນຂອງ ເອຟເອ ກໍຍັງຄຸ້ນເຄີຍກັບນາຍໃຫຍ່ອາຍຸ 58 ປີເປັນຢ່າງດີເພາະເຄີຍຕິດຕໍ່ເພື່ອໃຫ້ເຂົາມາເປັນຜູ້ຈັດການທີມ ເວສບຣອມວິດ ອາວບ້ຽນ ສະໄໝທີ່ຍັງເຮັດວຽກກັບ “ເດິ ແບັກກີ້”.

 

ສຳລັບ ຣັງນິກ ນັ້ນເຄີຍຄຸມມາແລ້ວຫຼາຍທີມເຊັ່ນ ເຟົາເອຟເບ ສະຕຸດກາດ, ຮັນໂນເວີ້ 96 ແລະ ຊາວເກ້ 04 ເປັນຕົ້ນໂດຍເຂົາເຄີຍໄດ້ແຊມ ເດເອຟເບ- ໂພຄານ ກັບ ຊາວເກ້ ໃນລະດູການ 2010-2011.