ຕົວເລກຜູ້ຕິດເຊື້ອໄຂ້ເລືອດອອກຢູ່ສະຫວັນນະເຂດເພີ່ມຂຶ້ນກວ່າປີກາຍ

ທ່ານ ດຣ. ບົງສຸວັນ ພັນທະວົງສາ ຫົວໜ້າພະແນກສາທາລະນະສຸກແຂວງສະຫວັນນະເຂດໄດ້ເປີດເຜີຍໃນວັນທີ 3 ກໍລະກົດຜ່ານມາວ່າ: ການແຜ່ລະບາດຂອງພະຍາດໄຂ້ເລືອດອອກໃນທົ່ວແຂວງເຫັນວ່າມີທ່າອ່ຽງເພີ່ມຂຶ້ນພໍສົມຄວນອີງໃສ່ໂຕເລກນັບແຕ່ວັນທີ 1 ເດືອນມັງກອນ ຫາວັນທີ 30 ເດືອນມິຖຸນາ 2017 ມີຈຳນວນຄົນເຈັບໄຂ້ເລືອດອອກສະສົມທັງໝົດ 312 ຄົນ, ພົບໃນຈຳນວນ 107 ບ້ານ.

ໃນນີ້ພົບຜູ້ຕິດເຊື້ອພະຍາດໄຂ້ເລືອດອອກຫຼາຍກວ່າໝູ່ແມ່ນເມືອງ ໄຊບູລີ ຈຳນວນ 118 ຄົນ, ເມືອງອາດສະພັງທອງ ຈຳນວນ 52 ຄົນ, ເມືອງອຸທຸມພອນ 39 ຄົນ ແລະ ເມືອງໄກສອນພົມວິຫານ ຈຳນວນ 38 ຄົນ, ສຳລັບເມືອງທີ່ຍັງບໍ່ມີການລາຍງານຄົນເຈັບທີ່ເປັນໄຂ້ເລືອດອອກແມ່ນເມືອງນອງ.

ຫົວໜ້າພະແນກສາທາລະນະສຸກແຂວງໃຫ້ຮູ້ຕື່ມວ່າ: ປົກກະຕິສະພາບການແຜ່ລະບາດຂອງພະຍາດໄຂ້ເລືອດອອກໃນແຕ່ລະປີແມ່ນເມືອງໄກສອນພົມວິຫານພົບຄົນເຈັບຫຼາຍກວ່າໝູ່ໃນຈຳນວນ 15 ເມືອງ. ສະເພາະ ເມືອງໄຊບູລີ ທີ່ມີໂຕເລກພົບຜູ້ຕິດເຊື້ອພະຍາດໄຂ້ເລືອດອອກຫຼາຍແມ່ນບ້ານເວີນໃຕ້, ເວີນເໜືອ, ຕົ້ນແຫນ ແລະເຂດຊຸມຊົນອື່ນໆ.

ຂະນະທີ່ ວັນທີ 27-29 ມິຖຸນາ ຜ່ານມາບໍ່ມີການລາຍງານວ່າພົບຄົນເຈັບເພີ່ມຈັກກໍລະນີ ຖືໄດ້ວ່າສາມາດຢັບຢັ້ງໄດ້ແລ້ວໃນເຂດເມືອງດັ່ງກ່າວ. ຖ້າຫາກສົມທຽບເປັນເດືອນໄລຍະດຽວກັນປີຜ່ານມາເຫັນວ່າປີ 2017 ພົບຜູ້ຕິດເຊື້ອພະຍາດໄຂ້ເລືອດອອກຫຼາຍ ເພາະປີ 2016 ພົບຜູ້ຕິດເຊື້ອພະຍາດໄຂ້ເລືອດອອກສູງສຸດຮອດເດືອນ ກັນຍາ ພົບພຽງແຕ່ 140 ຄົນ ຈາກນັ້ນຕົວເລກຈຶ່ງຄ່ອຍຫຼຸດລົງ, ແຕ່ປີ 2017 ພັດມີຕົວເລກພົບຜູ້ຕິດເຊື້ອພະຍາດໄຂ້ເລືອດອອກເພີ່ມຂຶ້ນແຕ່ເດືອນກຸມພາ.

Cr: ເສດຖະກິດ-ການຄ້າ