ຕົກລົງຄ່າໂຕໄດ້ແລ້ວ!! ຈິງຈອກ ກຽມດຶງ ເຣມີ 10 ລ້ານປອນ

 

ສື່ຜູ້ດີຕີຂ່າວທັງ ເລສເຕີ ກັບ ເຊວຊີ ຕົກລົງກັນເຖິງເລື່ອງຄ່າໂຕຂອງ ໂລອິກ ເລມີ ກອງກາງເລືອດນ້ຳຫອມໄດ້ແລ້ວທີ່ລາຄາ 10 ລ້ານປອນ ຄາດວ່ານັກເຕະຝຣັ່ງຈະຍ້າຍໄປຟາດແຄ່ງໃນຮັງ ຄິງ ພາວເວີ ສະເຕດຽມ ກ່ອນຕະຫຼາດນັກເຕະໜ້າໜາວຈະປິດລົງໃນວັນຈັນນີ້.

 

“ເດລີ ມິນເລີ” ສື່ດັງຈາກເມືອງຜູ້ດີລາຍງານຂ່າວວ່າ ໂລອິກ ເລມີ ກອງໜ້າ ເຊວຊີ ສະໂມສອນຍັກໃຫຍ່ຈາກ ພຣີເມຍລີກ ອັງກິດ ຈະຍ້າຍໄປ ເລສເຕີ ຊີຕີ ຄູ່ແຂ່ງຮ່ວມລີກກ່ອນຕະຫຼາດຊື້ຂາຍນັກເຕະເດືອນມັງກອນຈະປິດລົງໃນວັນຈັນນີ້ ຫຼັງຈາກທີ່ ເຊວຊີ ກັບ ເລສເຕີ ບັນລຸຂໍ້ຕົກລົງເລື່ອງຄ່າໂຕທີ່ຈຳນວນ 10 ລ້ານປອນໃນການຍ້າຍຂອງນັກເຕະແລ້ວ.

ກອງໜ້າເລືອດນ້ຳຫອມກຽມຍ້າຍອອກຈາກຖິ່ນ ສະແຕມຝອດ ບຣິດ ຫຼັງ ເຊວຊີ ຕັດສິນໃຈປ່ອຍນັກເຕະເນື່ອງຈາກຫາກໍດຶງໂຕ ອະເລັກຊານເດີ ປາໂຕ ດາວຍິງເລືອດແຊມບາ ໃນຮູບການຢືມໂຕຈົນຈົບລະດູການນີ້ເມື່ອວັນເສົາທີ 30 ມັງກອນທີ່ຜ່ານມາໂດຍມີ ນິວຄາສເຊິນ ສົນໃຈດຶງໂຕໄປຮ່ວມທັບ ແຕ່ເບິ່ງວ່ານັກເຕະອາດຍ້າຍໄປຫຼິ້ນໃຫ້ກັບ ເລສເຕີ ຫຼາຍກວ່າ.

 

ລ່າສຸດສື່ຈາກອັງກິດຕີຂ່າວວ່າທັງ ເຊວຊີ ແລະ ເລສເຕີ ຕົກລົງຄ່າໂຕເລື່ອງການຍ້າຍທີມຂອງນັກເຕະໄດ້ທີ່ 10 ລ້ານປອນແລ້ວ ແລະ ອະດີດດາວເຕະ ໂອລິມປິກ ມາກແຊ ແລະ ຄວີນສະປາກ ຈະຍ້າຍໄປຫຼິ້ນໃຫ້ກັບ “ຈິງຈອກເງິນ” ຢ່າງເປັນທາງການວັນຈັນນີ້.