ຕິດໃຈເດັກຜີ!! ເຟເນບາເຊ ຫວັງດຶງ ມາຕາ ຮ່ວມທັບ

 

ເຟເນບາເຊ ເບິ່ງແລ້ວວ່າຈະມັກນັກເຕະຈາກຄ້າຍ ແມນ ຢູໄນເຕັດ ເປັນພິເສດໂດຍລ່າສຸດມີຂ່າວພ້ອມດຶງໂຕ ຮວານ ມາຕາ ດາວເຕະເລືອດກະທິງອອກຈາກຖິ່ນ ໂອນ ທຣາຟເຟິດ ອີກຄົນໜຶ່ງ.

 

ເຟເນບາເຊ ສະໂມສອນດັງຈາກ ຊູເປີລີກ ຕຸລະກີ ຕົກເປັນຂ່າວເມື່ອວັນພະຫັດທີ່ຜ່ານມາວ່າມີຄວາມສົນໃຈທີ່ຈະເຊັນສັນຍາດຶງ ຮວານ ມາຕາ ກອງກາງກອງ ແມນເຊສເຕີ ຢູໄນເຕັດ ສະໂມສອນດັງຈາກລີກຜູ້ດີມາເສີມທັບຊ່ວງຊຳເມີນີ້.

 

ດາວເຕະທີມຊາດສະເປນຍ້າຍມາຈາກ ເຊວຊີ ມາຮ່ວມທັບ “ຜີສາດແດງ” ເມື່ອຊ່ວງເດືອນມັງກອນປີ 2013 ແລະ ລະດູການນີ້ໄດ້ຮັບໂອກາດລົງຫຼິ້ນຢ່າງຕໍ່ເນື່ອງພາຍໃຕ້ການນຳທັບຂອງ ຫຼຸຍ ຟານກາວ.

 

ຢ່າງໃດກໍຕາມ ດ້ວຍການທີ່ ໂຊເຊ ມູຣິນໂຢ ນາຍໃຫຍ່ເລືອດຝອຍທອງມີແນວໂນ້ມວ່າຈະເຂົ້າມາຄຸມທັບ ຜີສາດແດງ ແທນ ຫຼຸຍ ຟານກາວ ຫຼັງຈາກຈົບລະດູການນີ້ເຮັດໃຫ້ ມາຕາ ອາດຈະເລືອກອຳລາຖິ່ນ ໂອນ ທຣາຟເຟິດ ເນື່ອງຈາກວ່າ ມູຣິນໂຢ ເປັນຄົນຂາຍເຂົາໃຫ້ກັບ ຜີສາດແດງ ສະໄໝຄຸມ ເຊວຊີ.

 

ດ້ວຍເຫດດັ່ງກ່າວເຮັດໃຫ້ ເຟເນບາເຊ ພ້ອມທີ່ຈະດຶງໂຕ ມາຕາ ມາຮ່ວມທັບໂດຍ ອາສ ສື່ກິລາຊັ້ນນຳແດນກະທິງລະບຸວ່າຍອດທີມຈາກແດນໄກ່ງວງພ້ອມທຸ່ມຄ່າເມື່ອຍສຸດງາມໄປລໍ້ໃຈນັກເຕະລາຍນີ້.

 

ປັດຈຸບັນ ເຟເນບາເຊ ທີ່ຫາກໍດຶງ ນານີ ກັບ ໂຣບິນ ຟານ ເພີຊີ ມາຈາກ ແມນຢູ ເມື່ອຊ່ວງຊຳເມີທີ່ຜ່ານມາກຳລັງຢູ່ອັນດັບ 2 ໃນຕາຕາລາງຄະແນນລີກນຳຫຼັງ ເບຊິກຕັສ ຈ່າຝູງຢູ່ 4 ແຕ້ມ.