ຕຳຫຼວດຈັບນາຍໜ້າ ຄ້າໂສເພນີໄດ້ພ້ອມກັບລູກນ້ອງ 7 ຄົນ

25 ເມ­ສາ 2013, ເຈົ້າ​ໜ້າທີ່​ຕຳ­ຫຼວດ​ສະ­ກັດ​ກັ້ນ ແລະ ຕ້ານການ​ຄ້າ​ມະ­ນຸດ ປກສ ນະຄອນຫຼວງວຽງ​ຈັນ ໄດ້​ກັກ​ຕົວ​ນາຍ​ຫນ້າ​ຄ້າ​ໂສເພນີ 1ຄົນ ແລະ ສາວ​ບໍລິການ​ໂສເພນີ ຈຳນວນ 7ຄົນ ທີ່​ກຳລັງ​ຕິດຕໍ່​ຊື້ຂາຍ ປະເວນີ​ຢູ່​ເຮືອນ​ພັກ​ແຫ່ງ​ຫນຶ່ງ​ທີ່​ບ້ານບຶງ​ຂະ​ຫຍອງ ເມືອງ​ສີ​ສັດຕະ​ນາກ ນະຄອນ​ຫຼວງ​ວຽງ​ຈັນ ແລ້ວ​ນຳ​ຕົວ​ມາສືບສວນສອບ​ສວນ ເພື່ອ​ດຳເນີນ​ຄະດີ ແລະ ສຶກ​ສາ​ອົບຮົມ. ນາຍ​ຫນ້າ​ຄ້າ​ໂສເພນີ​ຄື: ທ້າວ ສາຍ​ພິນ ຫລື ແຈັກ​ກີ້ ອາຍຸ 27ປີ ນັກ​ສຶກ​ສາ​ຢູ່​ບ້ານ​ໂພນ​ສີ​ນວນ ເມືອງ​ສີ​ສັດຕະ​ນາກ ນະຄອນຫລວງວຽງ​ຈັນ ແລະ ສາວ​ບໍ­ລິການ​ຄື: ນາງ ວອນ, ນາງ ສະ​ຕາ, ນາງ ແຂກ, ນາງ ສົ້ມ, ນາງ ນ້ຳ ຢູ່​ເມືອງ​ສີ​ສັດຕະ​ນາກ, ນາງ ຄຳ ເມືອງ​ໄຊ​ເຊດ​ຖາ ນະຄອນຫຼວງ​ວຽງ​ຈັນ ແລະ ນາງ ຕຸນ ເມືອງນ້ຳ​ບາກ ແຂວງ​ຫຼວງ​ພະ​ບາງ.ທ່ານ ພັຕ ແສງ​ທອງ ເກື້ອ​ບຸນລ່ຳ ຫົວ­ຫນ້າ​ພະ​ແນກ​ສະ­ກັດ​ກັ້ນ ແລະ ຕ້ານ​ການ​ຄ້າ​ມະນຸດ ປກສ ນະ­ຄອນຫຼວງ​ວຽງ​ຈັນ ກ່າວ​ວ່າ: “ ໄດ້​ຕິດຕາມ​ພຶດຕິ​ກຳ​ກຸ່ມ​ຄ້າ​ໂສເພນີ​ດັ່ງກ່າວຢ່າງ​ຈິງ​ຈັງ ເພາະ​ພວກ​ກ່ຽວ​ແມ່ນ​ ມີ​ເຈຕະນາ​ເຄື່ອນ​ໄຫວ​ຄ້າຂາຍ​ໂສເພນີ​ຢ່າງ​ເປີດ​ແປນ ​ສ້າງ​ຄວາມ​ເສື່ອມ​ເສຍ​ທາງ​ດ້ານ​ ຮີດຄອງ​ປະເພນີ​ຂອງ​ຊາດ ແລະ ກົດຫມາຍ​ອາຍາ​ແຫ່ງ ສປປ ລາວ ແລະ ເປັນ​ການ​ຂາຍ​ປະເວນີ​ແບບ​ລັກສະນະໂລດ​ໂຜນ ເຮັດ​ໃຫ້​ສັງຄົມ​ບໍ່​ມີ​ຄວາມເປັນ​ລະ­ບຽບ​ຮຽບ​ຮ້ອຍ ແລະ ບາງ​ຄົນ​ເຄີຍ​ຖືກ​ເຈົ້າ​ຫນ້າ­ທີ່​ກັກ​ຕົວ​ມາ​ສຶກ​ສາອົບ­ຮົມ ແລະ ມອບ​ໃຫ້​ຜູ້​ປົກ­ຄອງ​ດູ​ແລ, ແຕ່​ກໍ່​ກັບ​ມາ​ຄ້າ​ປະເວນີ​ຄືເກົ່າ ໂດຍ​ບໍ່​ຄຳນຶງ​ເຖິງ​ລະ­ບຽບ​ກົດໝາຍ. ສາວ​ບໍລິ­ການ​ທັງ 7 ຄົນ ໃຫ້­ການວ່າ: ໄດ້​ມາ​ເຊົ່າ​ເຮືອນ​ຢູ່​ນຳ ທ້າວ ສາຍພິນ ດ້ວຍ​ຄວາມ​ສະ­ໝັກ​ໃຈ ໂດຍຊັກ​ຊວນ​ກັນ​ມາ​ເອງ ບໍ່​ມີ​ຜູ້​ໃດ​ບັງ­ຄັບ ເພື່ອ​ຫາ​ລາຍ​ໄດ້​ດ້ວຍ​ການ​ຂາຍ​ປະ­ເວ­ນີ​ເຊິ່ງ​ມີ​ນາຍ​ຫນ້າ ທ້າວ ສາຍ​ພິນ ເປັນຜູ້​ຕິດ­ຕໍ່​ຫາ​ແຂກ​ຜູ້​ຊາຍ​ມາ​ໃຫ້ ເມື່ອ​ມີແຂກ​ແລ້ວ ທ້າວ ສາຍ​ພິນ ຈະ​ພາ​ໄປ​ສົ່ງ​ຕາມ​ສະ­ຖານທີ່​ຕ່າງໆ​ເຊັ່ນ: ເຮືອນ​ພັກ, ໂຮງແຮມ ແລະ ບ່ອນ​ພັກ​ເຊົາ​ອື່ນໆ. ພາຍຫຼັງ​ຮັບ­ແຂກ​ແລ້ວ ທ້າວ ສາຍ​ພິນ ກໍ່​ກັບ​ມາ​ຮັບ​ເອົາ ​ມາ​ເຮືອນ​ເພື່ອ​ລໍ​ຮັບແຂກ​ຕໍ່​ໄປ.ຕາມ​ການ​ສອບ​ສວນ​ຂອງ​ເຈົ້າຫນ້າທີ່​ຕຳຫຼວດ ທ້າວ ສາຍ​ພິນ ຮັບສາລະພາບ​ວ່າ: ໄດ້​ເຄື່ອນ​ໄຫວ​ຄ້າ​ໂສເພນີ​ແທ້ດ້ວຍ​ການ​ຊອກ​ຫາ​ຜູ້­ຍິງ​ເພື່ອໃຫ້​ຄົນ​ອື່ນ​ເສບ​ສົມ ແລ້ວ​ເກັບ​ເອົາ​ເງິນຄ່າ​ນາຍ​ຫນ້າ ແລະ ໄດ້​ຢຶດ​ຖື​ເອົາ​ອາຊີບນີ້​ມາ​ແຕ່​ປີ 2012 ໂດຍ​ອາ­ໄສ​ເຊົ່າເຮືອນ​ຢູ່​ບ້ານ​ໂພນ​ສີ​ນວນ ເມືອງ​ສີ​ສັດຕະ​ນາກ ໃນ​ລາຄາ 7.000 ບາດ​ຕໍ່ເດືອນ ແລ້ວ​ຊອກ​ເອົາ​ຍິງ​ສາວ​ຈາກ​ຕ່າງບ້ານ ເມືອງ, ແຂວງ ມາ​ພັກ​ເຊົາ​ຢູ່​ນຳແລ້ວ​ເກັບ​ຄ່າ​ເຊົ່າ​ຄົນ​ລະ 1.000 ບາດຕໍ່​ເດືອນ ແລະ ຕິດ­ຕໍ່​ຫາ​ແຂກ​ທາງ​ໂທລະ​ສັບ​ຕາມ​ໂຮງແຮມ, ເຮືອນ​ພັກທີ່ຕ້ອງການ​ຊື້​ປະເວນີ ເມື່ອ​ຫາ​ແຂກໄດ້​ແລ້ວ​ກໍ່​ເອົາ​ສາວ​ບໍລິການ​ໄປ​ໃຫ້ແຂກ​ເລືອກ​ເອົາ. ພາຍຫຼັງ​ຫຼັບ​ນອນນຳ​ແຂກ​ແລ້ວ ກໍ່​ເອົາ​ລົດ​ໄປ​ຮັບ​ເອົາ​ກັບເຮືອນ, ລາຄາ​ສາວ​ບໍລິການ​ຕັ້ງ​ລາຄາ ນອນ​ນຳ​ແຂກ​ຊົ່ວຄາວ​ແມ່ນ 1.000 ບາດ​ຕໍ່​ຄົນ, ສາວ​ບໍລິການ​ໄດ້ 400 ບາດ, ນາຍ​ຫນ້້າ 600 ບາດ, ຄ້າງ​ຄືນ 1.500 ບາດ, ສາວ​ບໍລິການ​ໄດ້ 800 ບາດ, ທີ່​ເຫລືອ​ແມ່ນ​ນາຍ​ຫນ້້າ​ຫັກ​ເອົາ.ປະຈຸ​ບັນ, ຄະດີ​ດັ່ງກ່າວເຈົ້າ​ໜ້າທີ່​ຕຳຫຼວດ​ ກຳລັງ​ສະຫລຸບ​ສຳນວນ​ຄະດີ​ສົ່ງ​ ໃຫ້​ໄອ​ຍະ​ການ​ສັ່ງ​ຟ້ອງ​ສານ​ຕັດສິນ​ຕາມ​ລະບຽບ​ກົດໝາຍ​ອາຍາ​ແຫ່ງ ສປປ ລາວ ສ່ວນ​ສາວ​ໂສເພ­ນີ​ທັງ 7 ຄົນ ເຈົ້າ​ຫນ້າທີ່​ຕຳຫລວດ​ພະ​ແນກ​ສະກັດ​ກັ້ນ ແລະ ຕ້ານ​ການ​ຄ້າ​ມະນຸດ ປກສ ນະຄອນ­ຫຼວງ​ວຽງ​ຈັນ ໄດ້​ສຶກສາ​ອົບຮົມ​ທາງ​ດ້ານ​ກົດຫມາຍ ແລະ ແຈ້ງ​ສູນ​ໃຫ້​ຄຳ​ປຶກສາ ແລະ ປົກ​ປ້ອງແມ່ຍິງເດັກນ້ອຍ​ມາ​ສຶກ​ສາ​ອົບຮົມເພື່ອ​ໄປ​ປະກອບ​ອາຊີບ​ໃຫມ​ທີ​ບໍ່​ຂັດ​ກັບກົດຫມາຍ ແລ້ວ​ເຮັດ​ບົດ​ບັນທຶກ​ມອບໃຫ້​ຜູ້​ປົກ­ຄອງ ແລະ ອຳນາດ​ການ​ປົກຄອງ​ບ້ານ​ສືບຕໍ່​ໄປ​ສຶກ​ສາ​ອົບຮົມ.

 

ຂໍ້ມູນຈາກ http://www.ecom.org.la

 

ສໍ ເມືອງຊຳ

ບົດຄວາມໃຫມ່ໆ