ຕາມຄາດ!!ໂຣເນົາໂດຊິວລາງວັນນັກເຕະດີເດັ່ນຟີຟາ

 

ຄຣິສຕຽນໂນ ໂຣເນົາໂດ ຊູເປີສະຕາດັງຂອງ ເຣອັນ ມາດຣິດ ຂຶ້ນຮັບລາງວັນນັກເຕະດີເລີດຂອງ ຟີຟາ ປະຈຳປີ 2016 ມາຄອງໄດ້ຕາມຄາດຂະນະທີ່ ລີໂອເນວ ເມສຊີ ກັບ ອັອງຕວນ ກຣິສມັນ ເຂົ້າມາເປັນອັນດັບ 2 ແລະ 3 ຕາມລຳດັບ.

 

ຄຣິສຕຽນໂນ ໂຣເນົາໂດ ກອງໜ້າຂອງ ເຣອັນ ມາດຣິດ ສະໂມສອນຍັກໃຫຍ່ຂອງ ລາ ລີກາ ສະເປນ ໄດ້ລາງວັນນັກເຕະດີເລີດຂອງສະຫະພັນບານເຕະນາໆຊາດ ຫຼື ຟີຟາ ປະຈຳປີ 2016 ມາຄອບຄອງຮຽບຮ້ອຍໂດຍພິທີມອບລາງວັນຈັດຂຶ້ນທີ່ເມືອງຊູຣິກປະເທດສະວິດເຊີແລນເມື່ອວັນຈັນທີ່ຜ່ານມາ.

 

ດາວເຕະອາຍຸ 31 ປີເຮັດຜົນງານໄດ້ດີ ແລະ ປະສົບຄວາມສຳເລັດກັບຢ່າງຫຼວງຫຼາຍມາຕະຫຼອດປີ 2016 ໂດຍເຂົາຊ່ວຍຕົ້ນສັງກັດໄດ້ແຊມ ຢູຟາ ແຊມປຽນລີກ ເມື່ອປາຍເດືອນພຶດສະພາຕໍ່ດ້ວຍການນຳທີມຊາດປັອກຕຸຍການຂຶ້ນຄອງບັນລັງແຊມ ຢູໂຣ 2016 ມາຄອງໄດ້ຢ່າງຍິ່ງໃຫຍ່ໃນຊ່ວງຊຳເມີພ້ອມທັງຍັງເຮັດສະຖິຕິຍິງປະຕູລວມທັງການຫຼິ້ນໃຫ້ກັບສະໂມສອນ ແລະ ທີມຊາດຕະຫຼອດປີ 2016 ສູງເຖິງ 59 ລູກອີກດ້ວຍ.

 

“ວ້າວວວ!! ມັນເຫຼືອເຊື່ອອີ່ຫຼີ ມັນບໍ່ແມ່ນເທື່ອທຳອິດແຕ່ສຳລັບລາງວັນນີ້ມັນຄືເທື່ອທຳອິດ ມັນເປັນຄວາມຮູ້ສຶກທີ່ດີ ກະຄືທີ່ຂ້ອຍເຄີຍບອກໄປຫຼາຍເທື່ອແລ້ວວ່າ ປີທີ່ຜ່ານມາເປັນປີແຫ່ງຄວາມຝັນສຳລັບຂ້ອຍເລີຍ ມັນບໍ່ມີຫຍັງຕ້ອງສົງໄສ ເຣອັນ ມາດຣິດ ໄດ້ແຊມ ແຊມປຽນລີກ ແລະ ທີມຊາດກໍໄດ້ແຊມ ຢູໂຣ 2016 ເປັນຄັ້ງທຳອິດໃນປະຫວັດສາດ”.

 

ສຳລັບ ລີໂອເນວ ເມສຊີ ກອງໜ້າທີມຊາດອາເຈັນຕິນາຂອງ ບາເຊໂລນາ ໄດ້ຮັບການໂຫວດຫຼາຍເປັນອັນດັບ 2 ຂະນະທີ່ ອັອງຕວນ ກຣິສມັນ ດາວຍິງທີມຊາດຝຣັ່ງຂອງ ແອັດເລຕິໂກ ມາດຣິດ ເຂົ້າມາເປັນອັນດັບ 3.

 

ທັງນີ້ ໂຣເນົາໂດ ເຄີຍໄດ້ຮັບລາງວັນດັ່ງກ່າວສະບັບດັ້ງເດີມມາແລ້ວ 3 ປີເມື່ອປີ 2008, 2013 ແລະ 2014 ໂດຍ 2 ເທື່ອຫຼັງເປັນຕອນທີ່ ຟີຟາ ຈັບມືຮ່ວມເຮັດລາງວັນກັບທາງນິຕິຍະສານ ຟຣັອງ ຟຸດບອນ.

 

ບົດຄວາມໃຫມ່ໆ