ຕັດສິນຈຳເລີຍຊາວຕ່າງປະເທດ 4 ຄົນ ນຳໃຊ້ບັດເຄຼດິດປອມ ກົດເອົາເງິນເກືອບ 200 ກວ່າລ້ານ

ຕັດສິນຈຳເລີຍຊາວຕ່າງປະເທດ 4 ຄົນ ນຳໃຊ້ບັດເຄຼດິດປອມ ກົດເອົາເງິນເກືອບ 200 ກວ່າລ້ານ

ຄະນະສານອາຍາສານປະຊາຊົນຂັ້ນຕົ້ນ ນະຄອນຫຼວງວຽງຈັນ ໄດ້ເປີດປະຊຸມສານ ໂດຍນຳເອົາຄະດີລັກຊັບຂອງໝູ່ ແລະ ການນຳໃຊ້ເອກະສານປອມ ທີ່ມີຈຳເລີຍເປັນຄົນຕ່າງປະເທດ 4 ຄົນ ຂຶ້ນມາພິຈາລະນາ ຕາມຄຳສັ່ງຟ້ອງ ຜູ້ຖືກຫາຂຶ້ນສານ ເລກທີ 1224, ເລກທີ 1225, ເລກທີ 1226 ແລະ ເລກທີ 1227/ອຍກ. ນວ ລົງວັນທີ 21 ກັນຍາ 2017 ຈຳເລີຍ 4 ຄົນ: ຊື່ທ້າວ ລາໂດເລຊາໂວ ອາຍຸ 46 ປີ ຢູ່ບ້ານສີລີຕ້າ ເມືອງສີລີຕ້າ ປະເທດບຸນກາລີ, ທ້າວ ອັນເດຼ ມາຕີເຊວິດ ອາຍຸ 32 ປີ ຢູ່ບ້ານໂນໂວດວາ ເລັສກີ້ ເມືອງຊີໂຕມ້ຽນສະກີ້ ແຂວງໂນໂວດວາ ເລັສກີ້, ທ້າວ ມາກຊິມ ອັນດູສະໂກ ອາເລັກ ແຊນເດີ ອາຍຸ 30 ຢູ່ບ້ານນາວາຣັດ ເມືອງວາຣິນສະກີ້ ແຂວງຊີຕົມມິສໂກຍ ທັງສອງ ຂຶ້ນກັບປະເທດອູແກຣນ ທີ່ຖືກເຈົ້າໜ້າທີ່ກັກຕົວໃນວັນທີ 6 ເມສາ 2016 ແລະ ທ້າວ ໂຈນາທອນ ແດນ ນ້ຽວ ອາຍຸ 30 ປີ ຢູ່ບ້ານ 48 ແອັດມິນເຕີ້, ເມືອງວອນໂບຣ ແຂວງອົດສະຕຣາລີ ຕາເວັນຕົກ ປະເທດອົດສະຕຣາລີ ຖືກກັກ ຕົວໃນວັນທີ 12 ມັງ ກອນ 2017; ພວກກ່ຽວໄດ້ເດີນທາງເຂົ້າມາທາງສະໜາມບິນວັດໄຕ ເພື່ອນຳເອົາບັດ ATM ປອມ ເລາະກົດເງິນຕາມຕູ້ທະນາຄານຕ່າງໆ ໃນນະຄອນຫຼວງວຽງຈັນ ສ້າງຜົນເສຍຫາຍເກືອບ 200 ລ້ານກີບ.
ອົງການໄອຍະການປະຊາຊົນ ນະຄອນຫຼວງວຽງຈັນ ໄດ້ຂຶ້ນຖະແຫຼງການກະທຳຜິດຂອງພວກ ຈຳເລີຍໃນຫ້ອງປະຊຸມ ສານ ຕາມຄຳຖະແຫຼງ ເລກທີ 858/ອຍກ ນວ ລົງວັນທີ 21 ກັນຍາ 2017 ທີ່ລະບຸຄຳສາລະພາບຂອງພວກຈຳເລີຍ ໃນຂັ້ນເຈົ້າໜ້າທີ່ວ່າ: ທ້າວ ລາໂດເລ ຊາໂວ ໄດ້ ເດີນທາງເຂົ້າມາປະເທດລາວໃນວັນທີ 15 ຕຸລາ 2016 ທາງສະ ໜາມບິນວັດໄຕ ແລະ ເຂົ້າພັກຢູ່ໂຮງແຮມແຫ່ງໜຶ່ງເຂດບ້ານສີຫອມ ເມືອງຈັນທະບູລີ ນະຄອນຫຼວງວຽງຈັນ ເພື່ອນຳເອົາບັດເຄຼດິດປອມແປງຂໍ້ມູນຈຳນວນ 165 ບັດ ທີ່ໄດ້ເອົານຳ ທ້າວ ອິວານ ຄົນປະເທດດຽວກັນ ເປັນຜູ້ ກະກຽມໃຫ້ ເພື່ອມາເລາະກົດເອົາເງິນໃນຕູ້ ATM ຂອງທະນາຄານ ທົ່ວໃນຄອນຫຼວງວຽງຈັນ, ສ່ວນບັດເຄຼດິດນັ້ນ ແມ່ນໄດ້ລັກເອົາຂໍ້ມູນນຳບັນຊີຂອງລູກຄ້າທະນາຄານ ແລ້ວນຳມາກ໋ອບໃສ່ບັດເຄຼດິດ, ຜ່ານມາ ທ້າວ ລາໂດເລ ສາ ມາດກົດເງິນນຳຕູ້ ATM ນະຄອນຫຼວງວຽງຈັນ ໄດ້ຈຳນວນ 95.996.000 ກີບ, ມາວັນທີ 21 ຕຸລາ 2016 ເຈົ້າ ໜ້າທີ່ກໍສາມາດກັກຕົວໄດ້ ພ້ອມຂອງກາງບັດເຄຼດິດ 1 ບັດ ແລະ ເງິນກີບຈຳນວນ 5.308.000 ກີບ ພ້ອມທັງ ເຂົ້າກວດຄົ້ນຫ້ອງພັກ ພົບເງິນຈຳນວນ 107.040.000 ກີບ, ຄອມພິວເຕີໂນດບຸກ 1 ເຄື່ອງ, ເຄື່ອງກ໋ອບປີ້ ລະຫັດບັດ ຫຼື ເຄື່ອງຮູດ (MSR) 1 ເຄື່ອງບັດ ເຄຼດິດຈຳນວນ 165 ບັດ ເງິນໂດລາ 310 ໂດລາ ແລະ ເອກະສານ ຜ່ານແດນຈຳນວນໜຶ່ງ.
ທ້າວ ອັນເດຼ ມາຕິເຊວິດ ແລະ ທ້າວ ມາກ ຊິມ ອັນດູສໂກ ໄດ້ເດີນທາງມາຮອດປະເທດລາວ ໃນວັນທີ 3 ເມສາ 2016 ທັງສອງໄດ້ພ້ອມກັນ ເຂົ້າພັກທີ່ໂຮງແຮມແຫ່ງໜຶ່ງ ເຂດເມືອງຈັນທະ ບູລີ ນະຄອນຫຼວງວຽງຈັນ ໂດຍ ໄດ້ນອນຄົນລະຫ້ອງ. ຈາກນັ້ນ, ທັງສອງໄດ້ພາກັນໄປເລາະຮູດເງິນຕາມຕູ້ ATM ທີ່ໄດ້ກະກຽມບັດມາໄດ້ເງິນປະ ມານຜູ້ລະ 500.000-600.000 ກີບ ຜ່ານ ການເຄື່ອນລັກລອບກົດເອົາເງິນຕາມຕູ້ ATM ມາວັນທີ 6 ເມສາ 2016 ເຈົ້າໜ້າທີ່ວິຊາສະເພາະໄດ້ເຂົ້າປຸກຈັບຄ່າຫ້ອງພັກ ສາມາດກວດຄົ້ນຫ້ອງໄດ້ບັດເຄຼດິດປອມຈຳນວນ 20 ກວ່າບັດ ແລະ ເງິນກີບຜູ້ລະ 200.000 ກວ່າກີບ ແລະ ເງິນໂດລາຈຳນວນ 200 ໂດລາ.
ສ່ວນທ້າວ ໂຈນາທອນ ແດນນ້ຽວ ເດີນທາງມາຮອດປະເທດລາວ ໃນວັນທີ 11 ມັງ ກອນ 2017 ໂດຍຜ່ານຂົວມິດ ຕະພາບລາວ-ໄທ 1 ເພື່ອມາກົດເອົາເງິນຕາມຕູ້ ATM ໂດຍໄດ້ກະ ກຽມບັດປອມຈຳນວນ 14 ບັດ ໂດຍແມ່ນພັກ ພວກຊື່ທ້າວ ຮອຍ ສັນຊາດເລບານອນ ເປັນ ຜູ້ກ໋ອບປີຂໍ້ມູນຂອງລູກຄ້າຈາກທະນາຄານຕ່າງໆ ລົງໃນບັດເຄຼດິດ, ຜ່ານການເຄື່ອນໄຫວກົດເອົາ ເງິນຈຳນວນ 50 ກວ່າຄັ້ງ ໄດ້ເງິນ 1.050.000 ກີບ ເພາະບາງບັດແມ່ນບໍ່ສາມາດ ກົດເອົາເງິນໄດ້, ມາວັນທີ 12 ເມສາ 2017 ຈຶ່ງຖືກກັກຕົວ ພ້ອມຂອງກາງບັດເຄຼດິດປອມຈຳນວນ 8 ບັດ ໄປດຳ ເນີນຄະດີ.
ຜ່ານການຄົ້ນຄວ້າບັນດາຂໍ້ມູນຫຼັກຖານ ແລະ ເອກະສານຕ່າງໆ ທີ່ມີໃນສຳນວນຄະດີຢ່າງລະອຽດຖີ່ຖ້ວນ, ຮອບດ້ານ ແລະ ພາວະວິໄສແລ້ວເຫັນວ່າ: ພວກຈຳເລີຍທັງ 4 ຄົນນີ້ ໄດ້ກະທຳຜິດຕໍ່ກົດໝາຍອາຍາ ທີ່ແຕະຕ້ອງຕໍ່ກຳມະສິດ ຂອງລວມໝູ່, ຕໍ່ລະບຽບບໍລິຫານ ແລະ ຄວາມ ຍຸຕິທຳຂອງສາທາລະນະລັດ ປະຊາທິປະໄຕ ປະຊາຊົນລາວ ຕາມ ກົດໝາຍອາຍາມາດຕາ 108, ມາດຕາ 161 ຢ່າງແທ້ຈິງ. ສະນັ້ນ, ຄະນະສານອາ ຍາ ສານປະຊາຊົນຂັ້ນຕົ້ນ ນະ ຄອນຫຼວງວຽງຈັນ ຈຶ່ງເຫັນຄວນລົງໂທດຕັດອິດສະຫຼະພາບ ທ້າວ ລາໂດເລ ຊາໂວ 5 ປີ ປັບໃໝ 6.500.000 ກີບ ແລະ ຕັດອິດສະຫຼະພາບ ຈຳນວນ 2-3-4 ຜູ້ ລະ 5 ປີ ປັບໃໝຜູ້ລະ 5.500.000 ກີບ.