ຕວກ​ກີ ຢືນຢັນຈະບໍ່ກັບປະເທດ​ຈົນ​ກວ່າ​ຈະ​ຊະ­ນະ IS ໄດ້!!

        ຮອງ​ປະ­ທາ­ນາ­ທິ­ບໍ­ດີ ສ ອາເມ​ຣິ​ກາ ໂຈ ໄບ​ເດິນ ກ່າວ​ຕໍ່​ຜູ້​ສື່ຂ່າວ​ຫຼັງ​ການ​ພົບ​ປະ​ກັບ​ປະ​ທາ​ນາທິ​ບໍ­ດີ​ຕວກ​ກີ ເທ​ຢິບ ເອ​ໂດການ ເມື່ອ​ວັນ​ທີ 25 ສິງ­ຫາ​ວ່າ ຕວກ​ກີ ພ້ອມ​ທີ່​ຈະ​ມີ­ໜ້າ​ຢູ່​ໃນ​ຊີ​ຣີ ໄປ​ຈົນກວ່າ​ຈະ​ຂັບ​ໄລ່​ອົງ­ການ​ລັດ​ອິ​ສລາມ (IS) ອອກໄປ​ຈາກ​ປະ­ເທດນີ້ ທ່ານ ໄບ​ເດິນ ເວົ້າ​ວ່າ ຕວກ​ກີ ໄດ້​ຄ່ອຍໆ​ມີ​ການ​ປ່ຽນ­ແປງ​ທາງດ້ານ​ແນວ​ຄິດ ຊຶ່ງ​ຕາມ​ນັ້ນ­ແລ້ວ ເຂົາ­ເຈົ້າ​ເຫັນ​ໄດ້​ວ່າ IS ເປັນ​ໄພຄຸກ​ຄາມ​ຕໍ່​ຊະ​ຕາ​ກຳ​ຂອງ​ຕວກ​ກີ.

          ຄຳ​ຖະ­ແຫຼງ​ດັ່ງ­ກ່າວ​ຂອງ​ທ່ານ ໄບ​ເດິນ ມີ​ອອກ​ມາ​ໃນ​ຂະ­ນະ​ທີ່ອຳ­ນາດ​ການ​ປົກ­ຄອງ​ຊີ​ຣີ ສະແດງ​ປະ­ຕິ­ກິ­ລິ­ຍາ​ບໍ່​ເຫັນພ້ອມ​ຕໍ່ການ​ທີ່​ຕວກ​ກີ ນຳ​ເອົາ​ລົດ​ຖັງ ລົດ​ຫຸ້ມ​ເກາະ ແລະ ທະ­ຫານ​ຈຳນວນ​ຫຼາຍ ເຂົ້າ​ໄປ​ໃນ​ດິນ­ແດນທາງ​ພາກ​ເໜືອ​ຊີ​ຣີ ໂດຍ​ທາງການ​ຊີ​ຣີ ຖື​ວ່າ­ ການ​ກະ­ທຳ​ເຊັ່ນນັ້ນ ເປັນ​ການ​ລະ­ເມີດ​ຢ່າງ​ຮ້າຍແຮງ​ຕໍ່​ອຳ­ນາດ​ອະ­ທິ­ປະ​ໄຕ​ຂອງ​ຊີຣີ ກະ­ຊວງການ​ຕ່າງ­ປະ­ເທດ​ຊີ​ຣີ ເນັ້ນ​ໜັກ​ວ່າ ການ​ຕໍ່­ຕ້ານ​ການ​ກໍ່ການ​ຮ້າຍ​ຄວນ​ດຳ­ເນີນ​ໄປ​ທີ່​ພຽງການ​ປະ­ສານ​ສົມ­ທົບ ແລະ ໂດຍໄດ້​ຮັບ​ອະ­ນຸ­ຍາດ​ຈາກ​ທາງ​ການ​ຊີຣີ​ເທົ່າ​ນັ້ນ ໃນ​ຂະ­ນະ​ດຽວ​ກັນ ຣັດເຊຍ ກໍ່​ມີ​ຄວາມ​ກັງ­ວົນ​ກ່ຽວ​ກັບການ­ເຄື່ອນ­ໄຫວ​ດັ່ງ­ກ່າວ​ຂອງຕວກ​ກີ ເຊັ່ນ​ກັນ.

          ຂະ­ນະ​ດຽວ​ກັນ ອົງ­ການ​ຕິດຕາມ​ສິດ­ທິ​ມະ­ນຸດ​ຊີ​ຣີ (SOHR) ໃຫ້​ຮູ້​ວ່າ ມີ​ສາ­ມັນ​ຊົນ​ເສຍ​ຊີ­ວິດ 15 ຄົນ ໃນ​ນັ້ນ​ເປັນ​ເດັກ­ນ້ອຍ 11 ຄົນ ໃນ​ເຫດ­ການ​ໂຈມ​ຕີ​ດ້ວຍ​ລະເບີດ​ຖັງທີ່​ເກີດ​ຂຶ້ນ​ໃນ​ວັນ​ທີ 25 ສິງ­ຫາ ທີ່​ນະ­ຄອນອາ​ເລບ​ໂປ ໃນ​ສ່ວນ​ຂອງຝ່າຍ​ແບ່ງ​ແຍກ​ດິນແດນ​ຄວບ​ຄຸມ​ຢູ່ SOHR ຍັງ​ໃຫ້ຮູ້​ຕື່ມ​ວ່າ ໃນ​ວັນ​ດຽວ​ກັນ ກອງ​ກຳລັງ​ລຸກ​ຮື​ຂຶ້ນ ໄດ້​ໂຈມ​ຕີ​ເຂດ​ທີ່​ຝ່າຍລັດ­ຖະ­ບານ​ຄວບ​ຄຸມ​ຢູ່​ດ້ານ​ຕາເວັນ​ຕົກ​ນະ­ຄອນອາ​ເລບ​ໂປ ເປັນເຫດ​ໃຫ້​ມີ​ຜູ້​ເສຍ​ຊີ­ວິດ 8 ຄົນ ໃນນັ້ນ​ເປັນ​ເດັກ­ນ້ອຍ 2 ຄົນ.

ແຫຼ່ງຂ່າວ: ໜັງສືພິມວຽງຈັນໃໝ່

ບົດຄວາມໃຫມ່ໆ