ດ່ວນ!! ລັດສັ່ງຍຸບໂຮງງານໄມ້ໃນປ່າສະຫງວນ 16 ແຫ່ງ ພາຍໃນເດືອນນີ້

ນີ້ກໍເປັນທ້າຍເດືອນກຸມພາ ແລ້ວລັດຖະບານໄດ້ສັ່ງໃຫ້ເຈົ້າໜ້າທີ່ກ່ຽວຂ້ອງ ໂດຍສະເພາະກະຊວງອຸດສາຫະກຳ ແລະການຄ້າ, ກະຊວງກະສິກຳ ແລະປ່າໄມ້, ທ້ອງຖິ່ນຕະຫຼອດຮອດພາກສ່ວນທີ່ກ່ຽວຂ້ອງສືບຕໍ່ຂຸ້ນຂ້ຽວຍຸບເລີກໂຮງງານປຸງແຕ່ງໄມ້ທີ່ຕັ້ງຢູ່ໃນເຂດປ່າສະຫງວນຈຳນວນ 16 ແຫ່ງໃຫ້ສຳເລັດພາຍໃນເດືອນນີ້.

ກອງປະຊຸມລັດຖະບານສະໄໝສາມັນປະຈໍາເດືອນກຸມພາ ໄດ້ໄຂຂຶ້ນໃນວັນທີ 23 ແລະປິດລົງໃນວັນທີ 24 ກຸມພາ 2017 ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ.

ກອງປະຊຸມລັດຖະບານຄັ້ງນີ້ ໄດ້ພ້ອມກັນສຸມໃສ່ປຶກສາຫາລື ແລະຕົກລົງຮັບຮອງ ໃນດ້ານຫຼັກການຕໍ່ບັນດາເອກະສານສໍາຄັນຈໍານວນໜຶ່ງ ໜຶ່ງໃນນັ້ນກໍແມ່ນຜົນການຈັດຕັ້ງປະຕິບັດຄໍາສັ່ງສະບັບເລກທີ 15/ນຍ, ລົງວັນທີ 13 ພຶດສະພາ 2016 ວ່າດ້ວຍການເພີ່ມທະຄວາມເຂັ້ມງວດໃນການຄຸ້ມຄອງ ແລະການກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະທຸລະກິດໄມ້ ຕໍ່ກັບບົດລາຍງານດັ່ງກ່າວກອງປະຊຸມເຫັນດີເປັນເອກະພາບຕໍ່ຜົນງານ, ດ້ານດີ, ດ້ານອ່ອນໃນການຈັດຕັ້ງປະຕິບັດ ທັງນີ້ໄດ້ຊີ້ນໍາໃຫ້ທຸກຂະແໜງການ ແລະທ້ອງຖິ່ນເອົາໃຈໃສ່ປະຕິບັດບາງວຽກງານຮີບດ່ວນດັ່ງນີ້:

ໃຫ້ຄະນະສະເພາະກິດ ສືບຕໍ່ຊອກໃຫ້ເຫັນໄດ້ຜູ້ກະທໍາຜິດ ແລະຜູ້ສົມຮູ້ຮ່ວມຄິດໃຫ້ການຮ່ວມມືໃນການລັກລອບຂຸດຄົ້ນໄມ້ ແລະສົ່ງອອກໄມ້ທີ່ຂັດກັບກົດໝາຍ ແລະລະບຽບການກ່ຽວກັບປ່າໄມ້ມາລົງໂທດຕາມລະບຽບກົດໝາຍຢ່າງເຂັ້ມງວດ, ການລົງໂທດນັ້ນບໍ່ສະເພາະແຕ່ພະນັກງານຂອງລັດ, ແຕ່ຕ້ອງລວມທັງຜູ້ປະກອບການທີ່ກະທໍາຜິດກໍ່ຕ້ອງລົງໂທດຕາມກົດໝາຍຢ່າງເຂັ້ມງວດ. 

ໃຫ້ກະຊວງອຸດສາຫະກໍາ ແລະການຄ້າເປັນເຈົ້າການສົມທົບກັບກະຊວງກະສິກໍາ ແລະປ່າໄມ້, ທ້ອງຖິ່ນ ແລະພາກສ່ວນທີ່ກ່ຽວຂ້ອງສືບຕໍ່ຍຸບເລີກໂຮງງານປຸງແຕ່ງໄມ້ ທີ່ຕັ້ງຢູ່ໃນເຂດປ່າສະຫງວນ ຈໍານວນ 16 ແຫ່ງ ໃຫ້ສໍາເລັດ ພາຍໃນເດືອນກຸມພາ 2017 ນີ້.

ໃຫ້ກະຊວງອຸດສາຫະກໍາ ແລະການ ຄ້າສືບຕໍ່ຊີ້ນໍາ ແລະຊຸກຍູ້ການສົ່ງອອກ ໄມ້ປອກ ແລະໄມ້ຝານ ທີ່ຍັງຕົກຄ້າງຈໍາ ນວນ 2.418 ແມັດກ້ອນ ເພື່ອສົ່ງອອກ ໃຫ້ສໍາເລັດໂດຍໄວ.

ມອບໃຫ້ກະຊວງກະສິກໍາ ແລະປ່າໄມ້ສົມທົບກັບກະຊວງອຸດສາຫະກໍາ ແລະ ການຄ້າລົງສົມທົບກັບແຂວງອັດຕະປື ເພື່ອດໍາເນີນການກວດກາໃຫ້ລະອຽດກ່ຽວກັບໄມ້ເສຍຫາຍ ແລະໄມ້ໄຟໄໝ້ ຈໍານວນ 8.705 ແມັດກ້ອນ ແລ້ວລາຍງານລັດຖະບານ.

ສໍາລັບໄມ້ຜ່ານຈໍານວນ 2.910,161 ໂຕນ (ໄມ້ຂະຍຸງຈໍານວນ 1.681,4 ໂຕນ, ໄມ້ປະດົງຈໍານວນ 923,6 ໂຕນ ແລະໄມ້ດູ່ ຈໍານວນ 305 ໂຕນ) ຢູ່ແຂວງສະຫວັນນະເຂດ ແລະໄມ້ທີ່ບໍ່ມີເອກະສານ, ຊຶ່ງເປັນໄມ້ທີ່ນອນໃນບ້ວງເຮັດທົດລອງ ຈໍານວນ 7.783,4 ແມັດກ້ອນ ແລະ 3.718,8 ໂຕນ ຢູ່ແຂວງສາລະວັນ ແມ່ນມອບໃຫ້ກະຊວງອຸດສາຫະກໍາ ແລະການຄ້າສົມທົບກັບພາກສ່ວນທີ່ກ່ຽວຂ້ອງອອກແຈ້ງການໃຫ້ຜູ້ປະກອບການຖອກພັນທະຕາມກໍານົດເວລາທີ່ລະບຸໄວ້ໃນບົດບັນທຶກລະຫວ່າງຄະນະສະເພາະກິດສູນກາງ ແລະແຂວງທີ່ກ່ຽວຂ້ອງ ເພື່ອໃຫ້ສາມາດນໍາໄປປຸງແຕ່ງ, ຖ້າຜູ້ປະກອບການຫາກບໍ່ມາຖອກພັນທະຕາມກໍານົດເວລາແມ່ນໃຫ້ຢຶດໄມ້ຈໍານວນດັ່ງກ່າວມາເປັນຂອງລັດ.

ສໍາລັບໄມ້ທີ່ຜູ້ປະກອບການເກັບຊື້ນໍາປະຊາຊົນຢູ່ແຂວງຄໍາມ່ວນ, ຊຶ່ງເປັນໄມ້ທີ່ບໍ່ມີການອະນຸມັດ ແລະມີແຫຼ່ງທີ່ມາ ບໍ່ຖືກຕ້ອງຈໍານວນ 8.063,8 ແມັດກ້ອນ ແມ່ນມອບໃຫ້ແຂວງຄໍາມ່ວນອອກຂໍ້ຕົກລົງອາຍັດໄມ້ຈໍານວນດັ່ງກ່າວມາເປັນຂອງລັດ.

ທັງນີ້ ໃຫ້ຄະນະສະເພາະກິດສືບຕໍ່ກວດກາ ແລະເກັບກໍາຂໍ້ມູນໃຫ້ລະອຽດຊັດເຈນກ່ຽວກັບດ່ານທີ່ມີການອະນຸມັດ ໃຫ້ສົ່ງໄມ້ອອກໄປຕ່າງປະເທດມີດ່ານໃດແດ່ ? ແລະພາກສ່ວນໃດ ແລະພະນັກງານຜູ້ໃດເປັນຜູ້ອະນຸມັດໃຫ້ສົ່ງອອກ, ພະນັກງານຂອງລັດທີ່ໃຫ້ການຮ່ວມມື ແລະສົມຮູ້ຮ່ວມຄິດກັບຜູ້ປະກອບການທີ່ລັກລອບສົ່ງອອກໃຫ້ສືບຕໍ່ຄົ້ນຄວ້າຢ່າງຈິງຈັງ ແລະສະຫຼຸບສັງລວມລາຍງານລັດຖະບານຕາມເວລາອັນຄວນ.

ທີ່ມາ: ເສດຖະກິດ-ສັງຄົມ