ດ່ວນ!!ງູໃຫຍ່ສັ່ງເດັ້ງປິໂອລີອອກຈາກຕັ່ງນາຍໃຫຍ່ແລ້ວ

 

“ງູໃຫຍ່” ອິນເຕີ ມິລານ ສັ່ງເດັ້ງ ສະເຕຟານໂນ ປິໂອລີ ອອກຈາກຕັ່ງນາຍໃຫຍ່ຮຽບຮ້ອຍແລ້ວ ຫຼັງຜົນງານຂອງທີມໄລຍະຫຼັງບໍ່ດີໂດຍ ສະເຕຟານໂນ ເວັກຄີ ນາຍໃຫຍ່ທີມເຍົາວະຊົນຈະຂຶ້ນມາຄຸມທັບແທນຈົນຈົບລະດູການ.

 

ອິນເຕີ ມິລານ ສະໂມສອນຍັກໃຫຍ່ຂອງ ກັນໂຊ ຊີຣີ ອາ ອີຕາລີປະກາດປົດ ສະເຕຟານໂນ ປິໂອລີ ອອກຈາກຕຳແໜ່ງຜູ້ຈັດການທີມເປັນທີ່ຮຽບຮ້ອຍເມື່ອວັນອັງຄານທີ່ຜ່ານມາ ໂດຍມີຜົົນບັງຄັບໃຊ້ທັນທີ.

 

ກຸນຊືຊາວອີຕາລຽນອາຍຸ 51 ປີເຂົ້າມາຄຸມທີມ “ງູໃຫຍ່” ດ້ວຍສັນຍາ 18 ເດືອນເມື່ອຊ່ວງເດືອນພຶດສະພາປີກາຍ ແຕ່ເຂົາກໍໄດ້ຢູ່ໃນຕຳແໜ່ງໄດ້ພຽງແຕ່ປະມານ 6 ເດືອນເທົ່ານັ້ນ ຫຼັງຈາກທີ່ ອິນເຕີ ມິລານ ມີຜົນງານທີ່ຫ່ວຍຂັ້ນເທບໃນໄລຍະຫຼັງ ໂດຍຊະນະໃຜບໍ່ເປັນເລີຍໃນເກມລີກ 7 ນັດຫຼ້າສຸດ ເຊິ່ງແບ່ງເປັນການປລາໄຊ 5 ສະເໝີ 2 ຈົນຕອນນີ້ທີມອັນດັບຕົກລົງໄປຢູ່ທີ 7 ຂອງຕາຕາລາງຮຽບຮ້ອຍ.

 

“ເອຟຊີ ອິນແຕນາຊິໂອນາເລ ມິລາໂນ ຂໍປະກາດວ່າທາງສະໂມສອນໄດ້ແຍກທາງກັບ ສະເຕຟານໂນ ປິໂອລີ ແລະ ທີມສະຕາບຂອງເຂົາຮຽບຮ້ອຍ ອິນເຕີ ຂໍຂອບໃຈ ສະເຕຟານໂນ ແລະ ທີມງານຂອງເຂົາທີ່ທຸ່ມເຮັດວຽກຢ່າງໜັກເພື່ອສະໂມສອນມາຕະຫຼອດ 6 ເດືອນທີ່ຜ່ານມາໂດຍ ສະເຕຟານໂນ  ເວັກຄີ ຜູ້ຈັດການທີມເຍົາວະຊົນ ຈະຂຶ້ນມາຄຸມທີມແທນທັນທີ ສຳລັບສາມເກມທີ່ເຫຼືອຂອງລະດູການນີ້ ຕອນນີ້ສະໂມສອນກຳລັງຈະເລີ່ມວາງແຜນສຳລັບລະດູການໜ້າ” ຖະແຫຼງການຢືນຢັນຜ່ານເວັບໄຊຢ່າງເປັນທາງການຂອງສະໂມສອນ.

 

ອິນເຕີ ຈະເປີດຮັງ ຈູເຊັບເປ ເມອັດຊາ ດວນກັບ ຊາດຊູໂອໂລ ວັນອາທິດທີ 14 ພຶດສະພາກ່ອນທີ່ຈະດວນກັບ ລາຊິໂອ ແລະ ອູດິເນເຊ ໃນສອງນັດສຸດທ້າຍ.