ດື່ມກາເຟແບບໃດໂດຍບໍ່ເສຍສຸຂະພາບ

ພະນັກງານຫ້ອງການຫລາຍ​ຄົນເຊົ້າ​ມາ​ກໍ​ກາ​ເຟ​ໜຶ່ງ​ຈອກຕົກ​ສວາຍໆ​ຢາກນອນ​ອາດຈະ​ມີ​​ອີກ​ໜຶ່ງຈອກຫລື​ຖ້າ​ຄືນໃດ​ຕ້ອງ​ຢູ່​ເຮັດ​ໂອ​ທີຫລື​ກຽມ​ພີ​ເຊນຈົນ​ເດິກອາດຈະ​ມີ​ຈອກທີ່​ສາມ ເຊື່ອ​ວ່າ​ທຸກ​ຄົນ​ຮູ້​ດີ​ວ່າ​ການ​ດື່ມ​ກາ​ເຟ​ຫລາຍ​ເກີນ​ໄປ​ເປັນ​ຜົນ​ເສຍ​ຕໍ່​ຮ່າງກາຍ​ທັງ​ນອນ​ບໍ່​ຫລັບ,ຫົວ​ໃຈ​ເຕັ້ນ​ໄວ​ຜິດ​ປົກກະຕິຫລື​ທີ່​ບາງ​ຄົນ​ເກີດ​ອາການ​ມື​ສັ່ນ,ໃຈ​ສັ່ນ​ແລ້ວ​ຍັງ​ເຮັດໃຫ້​ຜູ້​ປ່ວຍ​ພະຍາດ​ຫົວ​ໃຈ​ແລະ​ຄວາມ​ດັນ​ເລືອດ​ສູງ​ມີ​ອາການ​ຫລາຍ​ຂຶ້ນ​ນໍາອີກ​ແຕ່​ຖ້າ​ເປັນ​ຄໍ​ກາ​ເຟ​ໂຕແທ້ໆບໍ່​ອາດ​ຫລີກ​ລ້ຽງ​ການ​ດື່ມ​ກາ​ເຟ​ໄດ້​ເລຍມື້ນີ້ມີ​ວິທີ​ດື່ມ​ກາ​ເຟ​ແບບໃດ​ໃຫ້​ບໍ່​ ເສຍ​ສຸຂະ​ພາບ​ມາ​ຝາກ​

1.ເລືອກ​ກາ​ເຟ​ທີ່​ມີ​ຄຸນນະພາບ​ສູງ
ບາງ​ຄົນ​ອາດ​ບໍ່​ຮູ້ວ່າ​ກາ​ເຟ​ຖື​ເປັນ​ໜຶ່ງ​ໃນ​ພືດ​ທີ່​ມີ​ການ​ໃຊ້​ຢາ​ຂ້າ​ແມງ​ໃນ​ການປູກຝັງ​ຫລາຍ​ທີ່ສຸດ​ຊະນິດ​ໜຶ່ງ​ເລີຍ​ເພາະ​ສະ​ນັ້ນ​ເຮົາ​ເລືອກ​ກາ​ເຟ​ຄຸນນະພາບ​ສູງ​ໂດຍ​ສະເພາະ​ຢ່າງ​ຍິ່ງ​ພວກ​ທີ່​ເປັນorganicແລ້ວ​ນອກ​ຈາກ​ເຮົາ​ຈະ​ຫລີກ​ລ້ຽງ​ສານ​ຕົກ​ຄ້າງ​ຈາກ​ຢາ​ຂ້າ​ແມງ​ໄດ້​ແລ້ວເຮົາ​ຍັງ​ໄດ້​ໂບ​ນັດ​ຄື​ກິ່ນ​ແລະ​ລົດ​ຊາດ​ທີ່​ດີກວ່າ​ນໍາອີກ​

2.ເລືອກ​ເຄື່ອງ​ເຮັດ​ກາ​ເຟ​ຄຸນນະພາບ​ສູງ
ຖ້າ​ນ້ຳ​ຮ້ອນ​ຈາກ​ການ​ຕີ​ກາ​ເຟ​ໄຫລ​ຜ່ານ​ເຄື່ອງ​ເຮັດ​ກາ​ເຟ​ທີ່​ເຮັດ​ຈາກ​ພາ​ສຕິ​ກອາດ​ເຮັດໃຫ້​ສານ​ເຄ​ມີ​ຈາກ​ພາສຕິກ​ໄຫລ​ລົງ​ໄປ​ປະສົມ​ໃນ​ກາ​ເຟ​ໄດ້ແລະ​ການ​ຮັບ​ສານ​ເຄ​ມີ​ປະ​ເພດ​ນີ້​ຫລາຍໆ​ຈະ​ເຮັດໃຫ້​ລະບົບ​ຮໍໂມນ​​ຜິດ​ປົກກະຕິເພາະ​ສະ​ນັ້ນ​ຖ້າ​​ເລືອກ​ເຄື່ອງ​ເຮັດ​ກາ​ເຟ​ແບບ​ເອດ​ເພດ​ໂຊ​ທີ່​ມີ​ຄຸນນະພາບ​ສູງຜ່ານ​ການ​ຮັບຮອງ​ຄວາມ​ປອດ​ໄພ​ຮຽບຮ້ອຍ​ກໍ​ໝົດ​ກັງ​ວົນ​ເລື່ອງ​ນີ້​ໄປ​ໄດ້​ເລີຍ​

3.ເລືອກ​ດື່ມ​ພ້ອມ​ກັບ​ກິນ​ອາຫານ​ທີ່ດີ
ຄົນອັງ​ກິດພວກເຂົາ​ຍັງມີAfternoon Teaພ້ອມ​ຂອງ​ວ່າງ​ໜ້າ​ກິນບໍ່​ໄດ້​ມີ​ພຽງ​ເພາະ​ໂຊງາມ​​ດອກແຕ່​ມັນ​ມີ​ປະໂຫຍດ​ນໍາອີກການ​ດື່ມ​ກາ​ເຟ​ກັບ​ອາຫານ​ທີ່​ມີ​ໂປ​ຕີນ,ໄຂ​ມັນແລະ​ຄາລໂບ​ໄຮ​ເດດອາຫານ​ຫລື​ຂອງ​ວ່າງ​ເຫລົ່າ​ນີ້​ຈະ​ຊ່ວຍ​ໃຫ້​ຮ່າງກາຍ​ຄ່ອຍໆ​ຮັບ​ຄາ​ເຟ​ອີນ​ຊ້າໆເທື່ອລະ​ຫນ້ອຍ​ເທື່ອລະ​ຫນ້ອຍແລະ​ດົນ​ຂຶ້ນ​ໂດຍ​ທີ່​ເຮົາ​ບໍ່​ຕ້ອງ​ອັດ​ເຂົ້າໄປ​ອີກ​ຫລາຍໆ​ຈອກຮູ້​ແບບນີ້​ແລ້ວ​ເທື່ອ​ໜ້າ​ກິນ​​ກາ​ເຟ​ໄປ​ພ້ອມໆ​ກັບ​ໄຂ່​1ໜ່ວຍຄຸກ​ກີ​1ອັນຫລື​ແຊນ​ວິດ​1​ຫໍ່​ຈະດີກ່ວາ

4.ເລືອກ​ດື່ມ​ໃຫ້​ຖືກ​ເວລາ
ເວລາ​ທີ່​ດື່ມ​ກາ​ເຟ​ຄວນ​ເລືອກ​ເປັນ​ໄລຍະ​ກ່ອນ14.00ໂມງຖ້າ​ດື່ມ​ຫລັງ14.00ໂມງອາດ​ເຮັດໃຫ້​ຮ່າງກາຍ​ມີ​ບັນຫາ​ນອນ​ບໍ່​ຫລັບແລະ​ພະຍາຍາມ​ເລືອກ​ກາ​ເຟ​ທີ່​ມີ​ເບດ​ເປັນ​ເອດ​ເພດ​ໂຊເຊັ່ນ:ອາເມລິ​ກາ​ໂນ່,ຄາ​ປູ​ຊິ​ໂນ່,ຫລື​ລາ​ເຕ້ແທນ​ກາ​ເຟ​ປົກກະຕິຫລື​ແບບ 3-in-1 ເພາະ​ຈະ​ມີ​ປະລິມານ​ຄາ​ເຟ​ອີນ​ແລະ​ນ້ຳ​ຕານ​ຫນ້ອຍ​ກວ່າ

5.ເລືອກ​ດື່ມ​ກາ​ເຟ​ກ່ອນ​ອອກ​ກຳ​ລັງ​ກາຍ
ຖ້າ​ຢາກ​ອອກ​ກຳ​ລັງ​ກາຍ​ເພື່ອ​ລະ​ລາຍ​ໄຂ​ມັນ​ລອງ​ຈິບ​ກາ​ເຟ​ກ່ອນ​ໜ້ອຍໜຶ່ງນອກ​ຈາກ​ຈະ​ຊ່ວຍ​ເຜົາ​ຜານ​ໄຂ​ມັນ​ໄດ້​ໄວ​ຂຶ້ນ​ແລ້ວຍັງ​ຊ່ວຍ​ເພີ່ມ​ອັດຕາ​ການ​ເຜົາ​ຜານ​ພະລັງ​ງານ​ໃນ​ຮ່າງກາຍ​ໃຫ້​ສູງ​ຂຶ້ນ​ນໍາອີກ​

6.ເລືອກ​ດື່ມ​ກາ​ເຟ​ບໍ່​ໃສ່​ນ້ຳ​ຕານ,ຄີມ​ທຽມ,ຫລື​ອື່ນໆ​ດີ​ທີ່​ສຸດ
ຖ້າ​​ຕິດ​ກາ​ເຟ​ຫລາຍ​ແທ້ໆຢາກ​ໃຫ້​ລອງ​ດື່ມ​ກາ​ເຟ​ດຳ​ທີ່​ບໍ່​ໃສ່​ນ້ຳ​ຕານ,ຄີມ​ທຽມ,ນົມຫລື​ອື່ນໆ ແລ້ວ​ດື່ມ​ໃນ​ປະລິມານ​ຫນ້ອຍ​ໆ​ກິນ​ຊ້າ​ໆ​ໃຫ້​ພໍ​ຮູ້ສຶກ​ຕື່ນເພາະ​ຄົນ​ສ່ວນ​ໃຫຍ່​ບໍ່​ໄດ້​ກິນກາ​ເຟ​ແລ້ວ​ຈະ​​​ຫາວ​ນອນບໍ່​ສົດ​ໃສຫລື​ໃຜ​ທີ່​ຕິດ​ຄາ​ເຟ​ອີນ​ອາດ​ມີ​ອາການ​ມື​ສັ່ນກະ​ວົນ​ກະ​ວາຍ ຫງຸດ​ຫງິດ​ໄດ້ລອງ​ດື່ມ​ພຽງ​ມື້​ລະ​ຈອກແລະ​ກິນ​ຊ້າ​ໆ​ເບິ່ງ​

(ເຖິງແມ່ນ​ກາ​ເຟ​ຈະ​ພໍ​ມີ​ປະໂຫຍດ​ຢູ່​ນຳແຕ່​ເຮົາ​ກໍ​ຢາກ​ແນະ​ນຳ​ໃຫ້​ດື່ມ​ຫນ້ອຍ​ໆບໍ່​ຈຳ​ເປັນ​ກໍ​ບໍ່​ຕ້ອງ​ດື່ມ​ທຸກ​ມື້ຖ້າ​ຢາກນອນ​ກໍ​ປ່ຽນ​ມາ​ນອນ​ໃຫ້​ໄວ​ຂຶ້ນຫລື​ຫາ​ຫມາກໄມ້​ສົດ​ມາກິນ​ເພື່ອ​ເພີ່ມ​ຄວາມ​ສົດ​ຊື່ນ​ແຈ່ມ​ໃສ​ໃນ​ຕອນ​ເຊົ້າ​ຈະ​ດີກວ່າ​)