ດີຢາຣາ ພ້ອມທີ່ຈະຍ້າຍທີມທຸກເມື່ອ ຖ້າມີທີມໃຫຍ່ໆສົນໃຈ

ລາສຊານາ ດີຢາຣາ ຫ້ອງເຄື່ອງໂຕເກົ໋າຂອງ ໂອລິມປິກ ມາກແຊ ມີໂຕເລືອກສາມາດຍ້າຍທີມໄດ້ຕະຫຼອດເວລາ ຕອນເຊັນສັນຍາຍາວ 4 ປີ ຊ່ວງພັກລະດູການ ແລະ ຕົນເອງພ້ອມທີ່ຈະຍ້າຍທັນທີ ຖ້າວ່າມີທີມໃຫຍ່ໆ ຕິດຕໍ່ມາໃນເດືອນ ມັງກອນ ຫຼັງຈາກທີ່ຟອມດີ ຈົນກັບມາຕິດທີມຊາດອີກເທື່ອໜຶ່ງ ໂດຍບໍ່ຄິດວ່າກ່ອນໜ້ານີ້ບໍ່ມີທີມຫຼິ້ນ ແລະ ເປັນ ມາກແຊ ທີ່ຍື່ນໂອກາດໃຫ້.

ລາສຊານາ ດີຢາຣາ ກອງກາງໂຕຕັດເກມຂອງ ໂອລິມປິກ ມາກແຊ ສະໂມສອນຊັ້ນນຳແຫ່ງ ລີກ ແອັງ ຕົກເປັນຂ່າວວ່າ ມີໂຕເລືອກທີ່ຈະຍ້າຍອອກຈາກຖິ່ນ ສະຕາດ ເວໂລໂດຣມ ຊ່ວງຕະຫຼາດຊື້-ຂາຍນັກເຕະຮອບທີສອງເດືອນມັງກອນ ຕາມເງື່ອນໄຂທີ່ລະບຸໄວ້ໃນສັນຍາ ເຊິ່ງມີໂອກາດທີ່ເຂົາຈະຕັດສິນໃຈປ່ຽນສີເສື້ອກາງລະດູການ ຫຼັງຈາກທີ່ແຈ້ງເກີດໃໝ່ ແລະ ຫາກໍກັບມາຕິດທີມຊາດ ຝຣັ່ງ ອີກເທື່ອໜຶ່ງ.

ກອງກາງອາຍຸ 30 ປີ ເຊັນສັນຍາກັບ “ໂອເອັມ” ແບບບໍ່ມີຄ່າໂຕ ເມື່ອຊ່ວງພັກລະດູການ ແລະ ສະແດງຟອມການຫຼິ້ນໄດ້ຢ່າງດີ ແລະ ຈາກຜົນງານທີ່ໜ້າປະທັບໃຈຂອງຕົນເອງໃນເກມລີກ ບໍ່ພຽງແຕ່ເຮັດໃຫ້ ດີຢາຣາ ຖືກ ດີດິເຢ ເດຊອງ ນາຍໃຫຍ່ທີມຊາດ ຝຣັ່ງ ດຶງໂຕກັບໄປຕິດທີມຊາດອີກເທື່ອໜຶ່ງ ແຕ່ຍັງເປັນເປົ້າສົນໃຈຂອງບັນດາທີມຊັ້ນນຳໃນເອີຣົບອີກດ້ວຍ.

ລ່າສຸດ ມີລາຍງານລະບຸວ່າ ເຖິງວ່າ ອະດີດດາວເຕະ ປໍສະມັດ ແລະ ເຣອັນ ມາດຣິດ ທີ່ລົງສະໜາມເປັນຕົວຈີງໃຫ້ ມາກແຊ 7 ເກມໃນເກມລີກ ແລະ ຍິງໄປ 1 ປະຕູ ຈະມີສັນຍາກັບທີມດັງແດນນ້ຳຫອມອີກ 3 ປີເຄິ່ງ ແຕ່ເຊື່ອກັນວ່າ ເຂົາພ້ອມທີ່ຈະຍ້າຍໄປຢູ່ກັບທີມທີ່ມີສະກະຍະພາບດີກວ່າ ຊ່ວງເດືອນມັງກອນປີໜ້າ ແລະ ເຊື່ອກັນວ່າ ໜຶ່ງໃນເຫດຜົນທີ່ເຮັດໃຫ້ ດີຢາຣາ ຍອມເຊັນສັນຍາຍາວກັບ ໂອເອັມ ເພາະເຂົາບັງຄັບໃຫ້ທີມໃສ່ເງື່ອນໄຂອະນຸຍາດໃຫ້ເຂົາຍ້າຍທີມໄດ້ທຸກເວລາດ້ວຍນັ້ນເອງ.

............................................................................................................................................................................