ດິມາເຣຍ ຢືນຢັນຊີວິດໃນນະຄອນ ປາຣີ ດີເລີດ

ອັງເກວ ດິມາເຣຍ ປີກໂຕເກັ່ງ ປາຣີ ແຊັງ-ແຊັກແມັງ ບອກຕົ້ນສັງກັດກຳລັງພັດທະນາຂຶ້ນເລື້ອຍໆ ແລະ ມີແຮງກະຕຸ້ນທີ່ດີ ຫຼັງຈາກທີ່ບຸກໄປຊະນະ ນອງ ເມື່ອວັນເສົາ ພ້ອມກັບຢຶນຢັນວ່າຊີວິດໃນນະຄອນປາຣີ ສຸດເພີເຟັກ.

ອັງເກວ ດິມາເຣຍ ປີກຈອມພິ້ວຂອງ “ເປເອັດເຊ” ສະໂມສອນຍັກໃຫຍ່ຈາກແດນນໍ້າຫອມ ອອກມາເຜີຍວ່າ ຊ່ວງເວລາຂອງເຂົາກັບ “ເປເອັດເຊ” ມີແຕ່ເລື່ອງດີໆ 100% ນັບຕັ້ງແຕ່ຍ້າຍຈາກ ແມນຢູ ທີມຈາກເມືອງຜູ້ດີ ພຣີເມຍລີກ ອັງກິດ ມາຢູ່ໃນຖິ່ນ ປາກ ເດິ ແພຣັງ ດ້ວຍຄ່າໂຕເຖິງ 40 ລ້ານປອນ ເມື່ອຊ່ວງລະດູການທີ່ຜ່ານມາ.

ກອງກາງຈາກອາເຈນຕິນາ ທີ່ຫາກໍຍິງປະຕູໃນເກມທີ່ ປາຣີ ບຸກໄປຊະນະ ນອງ 4-1 ເມື່ອວັນທີ 26 ກັນຍາທີ່ຜ່ານມາ ເປີດເຜີຍວ່າທັງເຂົາ ແລະ ເພື່ອນຮ່ວມທີມມີພື້ນຖານຂອງແຮງຈຸງໃຈທີ່ດີເລີດໃນລະດູການນີ້.

“ມັນເປັນ 100% ຂ້ອຍຮູ້ຈັກ (ມາໂກ້) ແວຣັດຕິ ເລັກນ້ອຍ, ຕິເອໂກ້ ຊິວວາ, ອິບຣາ (ຊະລາຕັນ ອິບຣາຮິໂມວິດ) ຂ້ອຍຮູ້ຈັກຜູ້ຫຼິ້ນທຸກຄົນຈາກໂທລະພາບ ແຕ່ເມື່ອມາຮອດ ຂ້ອຍຈຶ່ງໄດ້ເຫັນຄຸນະພາບທີ່ແທ້ຈິງຂອງພວກເຂົາ ການຝຶກມັນດີ ເຮົາໂຊກດີທີ່ໄດ້ຊ້ອມໃນສະໜາມທີ່ດີ ແລະ ພັດທະນາຢ່າງຕໍ່ເນື່ອງໃນທຸກລະດັບທຸກມື້”.

“ຂ້ອຍຄິດວ່ານັ້ນແມ່ນສິ່ງທີ່ເຮັດໃຫ້ເຮົາພັດທະນາ ເຈົ້າສາມາດເຫັນສະໂມສອນເຕີບໃຫຍ່ຂຶ້ນຢ່າງວ່ອງໄວ ແລະ ນັ້ນແມ່ນແຫຼ່ງທີ່ມາຂອງແຮງກະຕຸ້ນອັນດີເລີດສຳລັບພວກນັກເຕະເຊັ່ນກັນ” ດິມາເຣຍ ກ່າວ.

...........................................................................................................................................