ດັບຝັນແຟນຜີ ໂດ້ຢັນຢູ່ຊຸດຂາວຕໍ່ຈົນກະຫຽນ

 

ແຟນຜີຕ້ອງເຊົາຄິດໄປເອງ!! ຄຣິສຕຽນໂນ ໂຣນັນໂດ ດາວຍິງຂອງ ເຣອັນ ມາດຣິດ ປະກາດຊັດເຈນວ່າຕ້ອງການຢູ່ກັບຕົ້ນສັງກັດຕໍ່ໄປຈົນກວ່າຈະຢຸດອາຊີບ ສ່ວນເລື່ອງຕໍ່ສັນຍາໃໝ່ແມ່ນຫຼັງຈົບເກມນັດຊິງ ຢູຟາ ແຊມປຽນລີກ ແລ້ວຈະບອກກັນອີກເທື່ອໜຶ່ງ.

 

ໂຣນັນໂດ ດາວຍິງຕີນລະເບີດຂອງ “ລາຊາຊຸດຂາວ” ເຣອັນ ມາດຣິດ ສະໂມສອນໃຫຍ່ຂອງ ລາ ລີກາ ຫັກເອິກແຟນບານຂອງ ຜີສາດແດງ ຫຼັງຈາກທີ່ປະກາດຢືນຢັນຊັດເຈນວ່າຕ້ອງການທີ່ຈະຢູ່ກັບຕົ້ນສັງກັດຕໍ່ໄປຈົນກວ່າຈະຢຸດອາຊີບ.

 

ກັບຕັນທີມຊາດປັອກຕຸຍການໃຊ້ເວລາໃນການຫຼິ້ນໃຫ້ທັບ “ຜີສາດແດງ” 6 ລະດູການໂດຍການຍິງໄປເບົາໆ 118 ລູກ ແລະ ໄດ້ແຊມ  9 ລາຍການກັບທີມດັງຈາກຖິ່ນ ໂອນ ທຣາຟເຟິດ ເຖິງວ່າ ໂຣນັນໂດ ຈະຍ້າຍໄປຢູ່ກັບ ເຣອັນ ແລ້ວແຕ່ເຂົາກໍຍັງເປັນໜຶ່ງໃນນັກເຕະຂວັນໃຈຂອງບັນດາແຟນບານ “ຜີແດງ” ຢູ່ຕະຫຼອດ.

 

ສຳລັບຕອນນີ້ສັນຍາຂອງ ໂຣນັນໂດ ກັບ ເຣອັນ ມາດຣິດ ຈະໝົດລົງໃນປີ 2018 ແລະ ກອງເຊຍ ຜີແດງ ຕາງກໍພາກັນຝັນວ່າເຂົາຈະກັບມາ ແມນຢູ ຈົນເລື່ອງດັ່ງກ່າວເປັນໄດ້ພຽງຝັນເມື່ອເຂົາຢືນຢັນວ່າຈະຂໍຢູ່ກັບທີມດັງຈາກນະຄອນມາດຣິດຕໍ່ໄປຈົນກວ່າຈະກະສຽນຈາກເກມລູກໜັງ.

 

ໂຣນັນໂດ ກ່າວວ່າ “ແນ່ນອນຂ້ອຍຕ້ອງການທີ່ຈະຢູ່ກັບທີມຕໍ່ໄປ ຂ້ອຍຄິດວ່າຂ້ອຍຈະກະສຽນທີ່ ເຣອັນ ມາດຣິດ ສ່ວນເລື່ອງການຕໍ່ສັນຍາສະບັບໃໝ່ຫຼັງຈົບເກມນັດຊິງ ຢູຟາ ແຊມປຽນລີກ ແມ່ນຕ້ອງຖ້າເບິ່ງຕໍ່ໄປ ເຣອັນ ມາດຣິດ ອາດຈະສະຫຼາດຫຼາຍໆຖ້າພວກເຂົາຂະຫຍາຍສັນຍາຂອງຂ້ອຍອອກໄປ”.